Apocalipsis 14:1-20
14 Chai qꞌuipaca Sion urcupi Malta Oveja shayacujtami ricurcani. Paihuanca 144.000 runacunapishmi carca. Paicunapaj frentepica Malta Ovejapaj shutitapish, paipaj Yayapaj shutitapishmi quillcashcata charincuna.
2 Jahua pachapica achca yacucuna huajiacuj shinata, sinchita cꞌulun nishca uyarij shinatami uyarcani. Ñuca uyashcaca cantajcuna paicunapaj arpapi tocashpa cantacuj shinami carca.
3 Paicunaca jatun tiyarinapaj ñaupajpi, chuscu querubincunapaj ñaupajpi, ancianocunapaj ñaupajpimi shuj mushuj cantota shina cantacuncuna. Cai cantotaca ni pi mana alli yachai tucurcachu, 144.000 runacunallami yachai tucurca. Paicunatami Diosca cai allpamanta randirca.
4 Paicunaca huarmicunapi mana mapayashca, chuyacunami can. Paicunaca Malta Oveja maita rijpipish paitami catincuna. Paicunaca punta pꞌucushca granocunata Diosmanpish, Malta Ovejamanpish cushca shina, gentecunapuramanta randishcacunami carca.
5 Paicunaca mana llullancunachu. Ima mapa illajcunami can.
6 Shujtaj ángel jahuajta volacujtami ricurcani. Chai angelca allpapi causajcunamanmi huiñaipaj caj alli huillaicunata huillacurca. Paica tucui llajtacunaman, tucui familiacunaman, tucui rimaicunaman, tucui pueblocunamanmi huillacurca.
7 Sinchita caparishpami: “Diosta manchaichij. Paita jatunyachichij. Gentecunata juzgana horaca ñami chayamushca. Shinaca jahua pachata, allpa pachata, mama cuchata, pugyucunatapish rurajta adoraichij” nicurca.
8 Qꞌuipaca segundo ángel shamushpaca: “¡Urmashcami! ¡Babilonia Jatun llajtaca urmashcami! Paica paipaj vinotami tucui llajta gentecunaman ubyachishca. Chai vinoca yallitaj huainayana* munaitami cun” nicurcami.
9 Tercer angelca paicunata catishpami sinchita caparishpa cashna nicurca: “Maijanpish manchanai millai animalta, paiman rijchajta rurashca animalta adoraj, frentepi, maquipi señalta chasquijca
10 Diospaj vinotapishmi ubyanga. Chai vinoca Dios yallitaj pꞌiñarishca cashcami. Chai vinoca imahuan mana chagrushcachu. Chaitami Diosca pai pꞌiñarishca copapi churanga. Jucha illaj angelcuna ricucujpi, Malta Oveja ricucujpimi ninahuan, azufrehuan paica llaquichishca canga.
11 Chai llaquichij cushnica huiñai huiñaita llujshicungallami. Manchanai millai animalta, paiman rijchajta rurashca animalta adorajcunapish, paipaj shutita señalta shina chasquijcunapish tutapish, punllapish mana samashpami llaquita apacungallacuna.
12 Chaimantami jucha illajcunaca ahuantanata minishtincuna. Paicunaca Diospaj mandashcacunatami cazuncuna, Jesuspi feta churashpami catincuna”* nicurcami.
13 Jahua pachamanta shuj rimashcatami uyarcani. Chai rimashcami: “Cai shimicunata quillcai. Diospaj espirituca: ‘Cunanmantapachaca Amitohuan shuj shinalla huañujcunaca cushicungacunami. Paicunapaj sinchi ruraicunamanta samarichun, paicunapaj ruraicunaca mana cungarishcachu canga’* ninmi” nicurca.
14 Chai qꞌuipaca shuj yuraj pꞌuyutami ricurcani. Chai pꞌuyu jahuapica runapaj churiman rijchaj pitajshimi tiyacurca. Paipaj umapica oro coronata churarishcami carca. Shinallataj paipaj maquipica filoyuj hocestami charicurca.
15 Shujtaj angelmi Diospaj huasi ucumanta* llujshirca. Chai angelmi pꞌuyu jahuapi tiyacujta sinchita caparishpaca: “¡Cosechana tiempoca ñami chayamushca, allpapica granocunaca ñami pꞌucushca. Cambaj hoceshuan cosechai!” nircami.
16 Chaimi pꞌuyu jahuapi tiyacujca allpapi pꞌucushca granocunataca paipaj hoceshuan cosecharca. Chashnami allpaca cosechashca saquirirca.
17 Jahua pachapi caj Diospaj huasi ucumantaca shujtaj angelmi llujshirca. Paipishmi filoyuj hocesta charicurca.
18 Altarmantaca shujtaj angelpishmi llujshirca. Paica ninata mandangapajmi autoridadta charirca. Filoyuj hocesta charicujtaca sinchita caparishpami paica: “¡Filoyuj hoceshuan allpapi pꞌucushca uva yuracunamanta uva ramacunata tandai. Uvacunaca ñami pꞌucushca!” nirca.
19 Chaimi angelca allpapi pꞌucushca uvataca hoceshuan cuchurca. Chashna cuchushpami uvata capina jatun jutcupi shitarca. Chai jatun jutcuca Dios yallitaj pꞌiñarishcatami ricuchin.
20 Chai uvacunataca llajta canllamanmi caballocunaca sarucurca. Uvacunata saruna jutcupica yahuarca caballocunapaj frenocunacama jundashpami casi 300 kilometrocunata* rirca.
Notacuna
^ Griego rimaipica: “pornéia” ninmi. “Huainayana” shimita huasha diccionariopi ricui.
^ Griego rimaipica: “Jesús crishcatami catincuna” ninmi.
^ Griego rimaipica: “paicunapaj rurashcacunaca paicunahuanmi ringa” ninmi.
^ Caipica Diospaj huasi ucu nishpaca Diospajlla ashtahuan chꞌicanyachishca ucumantami parlacun.
^ Griego rimaipica: “1.600 estadiocunata” ninmi. Shuj estadioca 185 metrocunatami charirca.
