Hechos 2:1-47
2 Pentecostés* fiesta punlla cajpica Jesusta catijcunaca tucuicunami chaillapitaj tandanacushca carcacuna.
2 Chashna tandanacushca cashpami jahua pachamanta ñapish jatun huaira shina huajiashpa shamujta uyarcacuna. Chai huaira shina shamushpami paicuna tiyacuj huasipi jundarca.
3 Chai qꞌuipami paicunaca lunyacuj uchilla cꞌallu shina ninacunata ricurcacuna. Chaicunaca chaupirishpami cada unopaj jahuapi asha asha tiyarirca.
4 Espíritu santo paicunapi jundajpimi espíritu yachachishca shina paicunaca chꞌican chꞌican shimicunapi rimai callarircacuna.
5 Chai punllacunapica muyundij allpapi tiyaj tucui llajtacunamanta Diosta tucui shunguhuan sirvij judiocunami Jerusalenpi carcacuna.
6 Huajiajta uyashpaca achca gentecunami tandanacurcacuna. Paicunapaj rimaipi Jesusta catijcuna parlacujta uyashpami achcata mancharircacuna.
7 Paicunaca yallitaj mancharishcacuna cashpami cashna nircacuna: “Ricuichij caipi tucui parlacujcunata. ¿Manachu paicunaca Galilea llajtamanta cancuna?
8 Shinaca ¿ima shinataj cada uno ñucanchij propio shimipi* paicuna parlacujtaca uyacunchijyari?
9 Ñucanchijcunaca Partiamanta, Mediamanta, Elammanta, Mesopotamiamanta, Judeamanta, Capadociamanta, Pontomanta, Asia llajtamanta,
10 Frigiamanta, Panfiliamanta, Egiptomanta, Cirene cꞌuchullapi saquirij Libia llajtacunamanta, Roma llajtamanta visitajcuna, judiocunapish, judiocuna yachachishcata catijcunapish,
11 Cretamanta, Arabiamantapishmari canchij. Tucui ñucanchijcunami Diospaj sumaj ruraicunataca ñucanchij shimillapitaj uyacunchij” nircacuna.
12 Chashnami tucuicuna mancharishpa imata mana rurai tucushpa caishuj chaishuj: “¿Caipica imataj tucucunyari?” nishpa tapurircacuna.
13 Ashtahuanpish shujtajcunaca paicunamanta burlarishpami: “Mishqui vinota* ubyashpamari macharishcacuna” nircacuna.
14 Shinapish 11 apostolcunandij shayarishpami Pedroca sinchita parlashpa gentecunamanca cashna nirca: “Judeapi causajcunalla, Jerusalenpi causajcunalla ñuca nishca shimicunata alli uyashpa caita yachaichij.
15 Cunanca casi las nueve de la mañanallamari. Cancuna yuyashca shinaca cai runacunaca mana machashcacunachu.
16 Ashtahuanpish profeta Joel nishca shimicunamari paicunapica pajtaricun. Profeta Joelca cashnami nirca:
17 ‘Diosca ninmi, tucuri punllacunapica ñuca espiritutami* tucui laya gentecunapaj jahuapi* jichasha. Chaipimi paicunapaj churicunapish, ushushicunapish ima tucunata huillangacuna. Shinallataj paicunapaj jovencunapish muscuipi shinami ricungacuna. Paicunapaj yuyajcunapish muscuicunatami charingacuna,
18 chai punllacunapica ñucata sirvij cꞌaricunapaj, huarmicunapaj jahuapipishmi ñuca espirituta jichasha. Chaipimi paicunapish ñuca ima nishcata huillangacuna.
19 Jahua pachapipish, cai allpapipish jatun milagrocunata rurashpami ricuchisha: chaipica yahuarpish, ninapish, yana cushnipishmi tiyanga.
20 Jehová* Diospaj jatun achijnicuj punlla manaraj shamujpica intipish amsayangami, lunapish yahuar shinami pucayanga.
21 Shinallataj Jehová* Diospaj shutita nishpa mañajcunaca tucuicunami quishpiringacuna’ nircami.
22 Israel llajtamanta runacunalla caita uyaichij: cancuna yachashca shinaca Nazareno nishca Jesustaca Diosmi cacharca. Diosca paihuanmi milagrocunatapish, manchanai ruraicunatapish, señalcunatapish cancunapaj chaupipi ricuchirca.
23 Shinapish cancunaca millai runacunapaj maquipi churashpami Jesustaca caspipi* clavashpa huañuchircanguichij. Diosca Jesushuan ima tucunata yachashpami chashna tucuchun saquirca.
24 Shinapish Diosmi paitaca huañuimanta* cacharichishpa causachirca. Chaimantami huañuica paitaca ña mana ashtahuan chari tucurca.
25 Paimantami Davidca cashna nin: ‘Jehová* Diosca punllantami ñuca ñaupajpi* can. Pai ñuca alli ladopi cashcamantami imapish ñucataca nunca mana cuyuchinga.
26 Chaimantami ñuca shunguca cushicurca, ñuca shimipish yallitaj cushicushpa parlarca. Ñucaca Diospimi shunguta churashpa causasha.
27 Ñucataca* Pambana Jutcupica* mana saquinguichu. Canta tucui shunguhuan sirvijpaj cuerpo ismuchunpish mana saquinguichu.
28 Causaiman apaj ñantami ñucamanca rijsichishcangui. Cambaj ñaupajpi cajpica yallitajmi cushichingui’ ninmi.
29 Huauquicuna, ñucanchij ñaupa yaya Davidmanta tucuita parlachun saquihuaichij. Paica huañurcami, shinallataj pambashcami carca. Shinapish paita pambashca jutcuca cunancamami ñucanchij llajtapi can.
30 Davidca profetami carca. Diosca Davidmanmi paipaj huahua huahuacunamantaca shujmi paipaj jatun tiyarinapica tiyaringa nishca carca. Chai nishcata Dios pajtachinataj cashcata yachashpami Davidca
31 Cristo causarina cashcata ña ricurca. Chaimantami paimanta parlashpaca paitaca Pambana Jutcupica* mana saquingachu. Paipaj cuerpopish mana ismungachu nirca.
32 Jesustaca Diosmi causachirca, chaitaca tucuicunami ricushcanchij.
33 Chaimantami Jesusca jahua pachaman huichiyashpa Diospaj alli ladopi tiyarishca. Shinallataj paipaj Yaya cusha nishca espíritu santotapishmi chasquishca. Chai espíritu santotami paica jichashca. Chaitami cancunapish ricushcanguichij, uyashcanguichij.
34 Davidca jahua pachamanca mana rircachu. Shinapish paillatajmi cashna nin: ‘Jehová* Diosca ñuca Amitotaca: “Ñuca alli ladopi tiyari.
35 Canta pꞌiñajcunata cambaj chaqui sarunapi churangacama” nircami’ ninmi.
36 Israel llajtapi causajcunalla caitami alli yachana canguichij. Jesustaca Diosmi Cristo cachun, ñucanchij Amito cachunpish churashca. Paitami cancunaca caspipi clavashpa huañuchircanguichij” nircami.
37 Chashna nishcata uyashpami paicunapaj shungupica yallitaj llaquirircacuna. Chaimantami Pedrotapish, caishuj apostolcunatapish: “Huauquicuna, ¿imatataj rurana canchij?” nishpa tapurcacuna.
38 Chashna tapujpimi Pedroca: “Arrepintirichij, cancunapaj juchacunata perdonachunca Jesucristopaj shutipi bautizarichij. Chashnami Dios cushca espíritu santotaca shuj regalota shina chasquinguichij.
39 Jehová* Diosca cancunamanpish, cancunapaj huahuacunamanpish, carupi causajcunamanpish, tucui pai agllashcacunamanmi espíritu santota cusha nirca” nirca.
40 Shujtaj shimicunahuanpishmi tucuita huillashpa paicunataca: “Ama tucuchishca cangapajca cai millai gentecunamanta caruyaichij” nishpa aconsejarca.
41 Pedro huillashcata alli chasquijcunaca bautizarircacunami. Chai punllapica 3.000 gentecunami* Jesusta catijcunahuan tandanacurcacuna.
42 Paicunaca apostolcuna yachachishcatami yachashpa catircacuna. Caishujhuan chaishujhuan tandalla pasangapaj,* micungapaj, Diosta mañangapajpishmi tandanacujcuna carca.
43 Ashtahuanpish apostolcunaca mancharina ruraicunata, achca milagrocunatami rurai callarircacuna. Chaita ricushpami gentecunaca* Diosta manchai callarircacuna.
44 Jesusta mushuj catijcunaca tucuicunami paicuna imalla charishcataca caishuj chaishuj convidanacujcuna carca.
45 Paicunapaj allpacunata, tucui imalla charishcacunatapish cꞌatushpami tandashca cullquitaca minishtijcunaman chaupishpa cuj carcacuna.
46 Punllantami tucuicuna tandalla Diospaj huasiman* rijcuna carca. Shinallataj chꞌican chꞌican huasicunapimi micujcuna carca. Paicunaca caishuj chaishujmi cushicushpa micunataca caranacujcuna carca. Shungumantami
47 Diostapish alabarcacuna. Gentecunapaj ñaupajpipish allimi ricurijcuna carca. Shinallataj tucui punllacunami Jehová* Diosca quishpirina cashca gentecunata quishpichishpa Jesusta catijcuna tucuchun saquirca.
Notacuna
^ “Pentecostés” shimita huasha diccionariopi ricui.
^ O “huacharishcamantapacha rimashca shimipi”.
^ O “Mushuj vinota”.
^ O “ñuca asha espiritutami”.
^ Griego rimaipica: “tucui aicha jahuapi” ninmi.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Caspi” shimita huasha diccionariopi ricui.
^ Griego rimaipica: “huañui nanaicunamanta” ninmi.
^ O “ñuca ñahuipi”.
^ “Jehová” shutita huasha diccionariopi ricui.
^ O “Ñuca almataca”. “Alma” shimita huasha diccionariopi ricui.
^ O “Hadespica”. Cai shimica huañushcacuna samaricujta ricuchingapajllami can. “Hades” shimita huasha diccionariopi ricui.
^ O “Hadespica”. Cai shimica huañushcacuna samaricujta ricuchingapajllami can. “Hades” shimita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ O “almacunami”. “Alma” shimita huasha diccionariopi ricui.
^ O “Caishuj chaishuj convidanacungapaj”.
^ O “almacunaca”. “Alma” shimita huasha diccionariopi ricui.
^ “Diospaj huasi” shimita huasha diccionariopi ricui.
^ “Jehová” shutita huasha diccionariopi ricui.
