Juan 16:1-33
16 Ñucata ama shitashpa richunmi tucui caicunataca cancunaman nishcani.
2 Gentecunaca sinagogacunamantami* cancunataca llujshichishpa cachangacuna. Cancunata huañuchina horapish chayamucunmi. Maijanpish chashna rurashpaca Diostami adoracunchij yuyangacunami.
3 Ñuca Yayatapish, ñucatapish mana rijsishcamantami tucui chaicunataca rurangacuna.
4 Shinapish chashna tucuna hora ña chayajpi ñuca ima nishcata yuyarichunmi caicunataca huillashcani.
Cancunahuan cashcamantami callaripica caicunataca mana huillarcani.
5 Cunanca ñucata cachajpajmanmi rigrini. Shinapish cancunaca ‘¿Maimantaj rigringui?’ nishpa ni pi ñucataca mana tapunguichijchu.
6 Ashtahuanpish ñuca chaicunata nishcamantami cancunapaj shungupica llaquilla canguichij.
7 Chashna cajpipish cancunamanca mana llullashpami nini: cancunapaj allipajmi ñucaca rigrini. Ñuca mana rijpica cancunata ayudajca* mana shamungachu. Shinapish ñuca rishpami chai ayudajtaca cancunapajman cachasha.
8 Pai shamushpami jucha ima cashcata, ñucapish cashcata ruraj cashcata, Diospish pita juzgashcata gentecunaman alli ricuchinga.
9 Puntapica paicuna ñucapi feta mana churashcamantami jucha ima cashcata gentecunaman ricuchinga.
10 Qꞌuipaca ñuca Yayapajman rina cashcamantami ñucapish cashcata ruraj cashcata paica gentecunaman ricuchinga. Chaipimi cancunapish ñucataca ña mana ashtahuan ricunguichij.
11 Chai qꞌuipaca Diospish pita juzgashcatami ricuchinga. Diosca cai pachata mandajtaca ñami juzgashca.
12 Cancunamanca achcatami parlanaraj cani. Shinapish cunanca manaraj intindi tucunguichijchu.
13 Cancunata ayudaj shamushpami cancunamanca mana llullata tucui yachachinga. Chai ayudajca mana llulla espiritumi. Paica paipaj yuyaimantaca mana parlangachu, ashtahuanpish imata uyashcallatami parlanga. Shinallataj shamuj punllacunapi ima tucunatapishmi huillanga.
14 Paimi ñucata jatunyachinga. Paica ñucamanta uyashcatami cancunamanca huillanga.
15 Ñuca Yaya tucui imalla charishcapish ñucapajmi. Chaimantami chai espirituca ñucamanta imata uyashcata cancunamanca huillanga nircani.
16 Ñallami ñucataca mana ashtahuan ricunguichij. Shinallataj ñallami ñucataca ricunguichij” nircami.
17 Chaita uyashpami Jesusta catijcunamanta huaquincunaca: “‘Ñallami ñucataca mana ashtahuan ricunguichij. Shinallataj ñallami ñucataca ricunguichij’ nishpaca ¿imatashi nisha nicun? Shinallataj ‘ñuca Yayapajmanmi rigrini’ nishpaca ¿imatashi nisha nicun?” nishpami paicunapura parlanacucurcacuna.
18 Ashtahuanpish Jesusta catijcunaca: “‘Ñallami’ nishpaca ¿paica imatashi nisha nicun? Ñucanchijca pai imata nicushcataca mana yachanchijchu” nircacunami.
19 Jesusca paicuna paita tapusha nicujta yachashpami cashna nirca: “‘Ñallami ñucataca mana ashtahuan ricunguichij. Shinallataj ñallami ñucata ricunguichij’ nishcatachu ¿cancunapura tapunacucunguichij?
20 Cancunamanca manataj llullanichu. Cancunaca llaquirishpami huacanguichij. Shinapish cai pacha gentecunaca cushicungacunami. Cancunaca shungupi nanarishcami sintiringuichij. Chashna sintirishpapish qꞌuipaca cushicunguichijmi.
21 Shuj huarmica ña huachana hora chayashcamantami huahuata huachacushpaca achcata nanachin. Shinapish huahua ña huacharijpica, nanaita cungarishpami paipaj huahuata ricushpa cushilla sintirin.
22 Cancunapish cunanca llaquillami canguichij. Chashna cashpapish ñucata cutin ricushpaca cancunapaj shungupimi cushicunguichij. Chai cushicuitaca ni pi mana quichungachu.
23 Chai punllaca imata mana ashtahuan tapunguichijchu. Cancunamanca manataj llullanichu. Imatapish ñuca shutipi ñuca Yayata mañajpica paica cungallami.
24 Cunancamaca imata ñuca shutipi mana mañashcanguichijchu. Ñuca shutipi mañaichij chasquinguichijmi. Chashna rurashpami yallitaj cushilla canguichij.
25 Cancunamanca chꞌimbapuraicunata churashpami caicunataca parlashcani. Qꞌuipamanca ña mana ima chꞌimbapuraicunata churashpa parlashachu. Ashtahuanpish ñuca Yayamantaca tucuitami cancunamanca huillasha.
26 Chai punllaca ñuca Yayatami ñuca shutipi mañanguichij. Shinapish cancunamanta ñucallataj mañana cashcataca mana nicunichu.
27 Ñucata cꞌuyashcamanta, Diospaj shutipi ñuca shamushcata crishcamantami ñuca Yayaca cancunatapish cꞌuyan.
28 Ñuca Yayapaj shutipimi cai pachamanca shamurcani. Cunanca cai pachata saquishpami ñuca Yayapajman rigrini” nircami.
29 Jesús chashna nijpimi paita catijcunaca: “Amito, chꞌimbapuraicunata mana churashpa parlajpica, cunantajca can ima nishcataca intindinchijmari.
30 Tucuita can yachashcatapish, imata pi tapuchun can mana minishtishcatapish cunanca yachanchijmi. Chaimantami canca Diosmanta shamushcata crinchij” nircacuna.
31 Paicuna chashna nijpimi Jesusca cashna cutichirca: “¿Cunanca cringuichijchu?
32 ¡Ricuichij! Cancuna caita chaita rina horaca chayamucunmi. Chai horaca ñamari chayamushca. Ñucallata saquishpami cancunapaj huasicunaman ringuichij. Shinapish ñuca Yaya ñucahuan cashcamantami mana ñucalla cani.
33 Ñucamanta sumaj causaita charichunmi caicunataca cancunaman nishcani. Cai pachapica achca llaquicunatami charigringuichij. Shinapish ¡ama manchaichijchu! Ñucaca cai pachataca ñami mishashcani” nircami.
Notacuna
^ O “tandanacuna huasicunamantami”.
^ Verso 7-pi, verso 13-pi “ayudaj” nishpa, shinallataj verso 14-pi “pai” nishpaca espíritu santomantami parlacun. Chai espiritutami Jesusca shuj fuerza cajpipish shuj runahuan chꞌimbapurarca.
