Juan 20:1-31
20 Semana callari punllami* María Magdalenaca manaraj achijyajpi Jesusta churashca jutcuman rirca. Chaiman chayashpaca jutcumanta rumita anchuchishcatami ricurca.
2 Chaita ricushpami Simón Pedropajman, shinallataj Jesús cꞌuyashca caishuj catijpajmanpish callpashpa rirca. Paicunapajman chayashpaca: “¡Amito Jesustami paita churashca jutcumanta apashcacuna. Paita maipi churashcataca mana yachanchijchu!” nirca.
3 Chashna huillajpimi Pedropish, Jesusta caishuj catijpish Jesusta churashca jutcuman rircacuna.
4 Ishquindij callpai callarishpapish Jesusta caishuj catijmi Pedrota yalli callpashpa, chai jutcuman punta chayarca.
5 Chaiman chayashpaca paica cumurishpami jutcu ucuta ricurca. Chai ucupica lino telacunatami ricurca. Shinapish chai jutcumanca mana yaicurcachu.
6 Cutin paita catimuj Simón Pedro chaiman chayashpaca chai jutcumanmi yaicurca. Chaiman yaicushpaca lino telacunatami paipish ricurca.
7 Jesuspaj umata pilluchishca telaca mana caishuj vendacunahuan tandachishcachu carca. Ashtahuanpish pillushcami shujtaj ladopi carca.
8 Puntaman chayaj Jesusta caishuj catijpishmi qꞌuipaca chai jutcuman yaicurca. Chaita ricushpami paicunaman nishcata paipish crirca.
9 Dios quillcachishcapi huillashca shina huañushcacunapaj chaupimanta Jesús causarina cashcataca, paicunaca manaraj intindircacunachu.
10 Chaimi Jesusta catijcunaca paicunapaj huasicunaman tigrarcacuna.
11 Ashtahuanpish Mariaca jutcu cꞌuchullapimi huacashpa canllapi shayacurca. Chashna huacacushpami jutcu ucuta ricungapaj cumurirca.
12 Chaipica ishqui angelcunatami yurajlla churanata churarishcata ricurca. Chai angelcunaca Jesusta maipi churashca cashcapimi shujca uma ladoman, caishujca ura chaqui ladoman tiyacurca.
13 Chaimi angelcunaca Mariataca: “Huarmi, ¿imamantataj huacacungui?” nishpa tapurcacuna. Chashna tapujpimi paica: “Ñuca Amitotami apashcacuna. Paita maipi churashcataca mana yachanichu” nishpa cutichirca.
14 Chaita nishca qꞌuipami Mariaca tigrarishpa Jesús chaipi shayacujta ricurca. Ashtahuanpish Jesús cashcataca paica mana cuentata curcachu.
15 Chaimi Jesusca: “Huarmi, ¿imamantataj huacacungui? ¿Pitataj mashcacungui?” nishpa tapurca. Chashna tapujpimi paica huertata cuidajmi yuyashpa: “Amito can apashca cashpaca maipi churashcata huillahuai. Ñuca apashallami” nirca.
16 Chashna nijpimi Jesusca: “¡María!” nirca. Chaimi María tigrarishpaca hebreo rimaipi: “¡Rabbóni!” nirca. (Rabbóni shimica “yachachij” nisha ninmi).
17 Chaimi Jesusca: “Ñucapi ama chariraichu. Ñuca Yayapajmanca manaraj huichiyashcanichu. Ashtahuanpish ñuca huauquicunapajman rishpa: ‘Ñucaca ñuca Yayapajman, cancunapaj Yayapajman, ñuca Diospajman, cancunapaj Diospajmanmi huichiyagrini’ ninmi nishpa huillagri” nirca.
18 Chaimi María Magdalenaca Jesusta catijcunata ricunaman rishpaca: “¡Amito Jesustami ricushcani!” nishpa huillarca. Shinallataj Jesús imata nishcatami paicunaman parlarca.
19 Semana callari punlla ña chishiyajpimi Jesusta catijcunaca tandanacushcacuna carca. Paicunaca judiocunata manchashcamantami chai huasi pungucunataca llavehuan huichcashpa churashcacuna carca. Shinapish Jesusca paicunapaj chaupipi ricurishpami: “Sumaj causaita charichij” nirca.
20 Chaita nishca qꞌuipami Jesusca paipaj maquicunatapish, paipaj costilla chaupitapish ricuchirca. Chaimi Jesusta* ricushpaca paita catijcunaca achcata cushicurcacuna.
21 Cutinllatajmi Jesusca: “Sumaj causaita charichij. Ima shinami ñuca Yayaca ñucata cacharca, ñucapish cancunataca chashnallatajmi cachani” nirca.
22 Chaita nishca qꞌuipami Jesusca paicunapaj jahuapi pꞌucushpa cashna nirca: “Espíritu santota chasquichij.
23 Maijanpaj juchacunata cancuna perdonajpica, Diospish ñami paitaca perdonashca. Cutin maijanpaj juchacunata cancuna mana perdonajpica Diospish paitaca mana perdonashcachu” nircami.
24 Shinapish 12 apostolcunamanta Gemelo nishca Tomasca Jesús ricurijpica mana paicunahuanchu carca.
25 Chaimantami Jesusta caishuj catijcunaca: “¡Amito Jesustami ricushcanchij!” nircacuna. Shinapish Tomasca: “Paipaj maquicunapi clavo jutcushcata mana ricushpa, chai jutcupi ñuca dedota mana satishpa, shinallataj paipaj costilla chaupipi ñuca maquita mana satishpaca manataj crishachu” nircami.
26 Pusaj punllacuna qꞌuipami Jesusta catijcunaca cutinllataj huasi ucupi tandanacushcacuna carca. Tomaspish chaipimi paicunahuan carca. Chai huasi pungucuna llavehuan huichcashca cajpipish, Jesusca paicunapaj chaupipi ricurishpami: “Sumaj causaita charichij” nirca.
27 Chai qꞌuipami Jesusca Tomastaca: “Ñuca maquicunata ricui, cambaj dedota caipi churai. Shinallataj cambaj maquita apamui ñuca costilla chaupipi sati. Caita chaita yuyanapaj* randica criyari” nirca.
28 Chaimi Tomasca: “Ñuca Amito, ñuca Dioslla” nirca.
29 Shina nijpimi Jesusca: “¿Ñucata ricushcallamantachu cringui? Manapish ricushpa crijcunami cushicuncuna” nirca.
30 Shinallataj Jesusca paita catijcunapaj ñaupajpimi shujtaj achca milagrocunata rurarca. Chai milagrocunaca cai rollopica mana quillcashcachu can.
31 Ashtahuanpish caicunaca Jesús Cristo cashcata, Diospaj Churi cashcatapish cancuna crichunmi quillcashca cashca. Paipaj shutipi crishpaca huiñai causaitami charinguichij.
Notacuna
^ Cai punllaca judiocunapajca domingomi carca.
^ Griego rimaipica: “Amitota” ninmi.
^ Griego rimaipica: “Mana crinapaj” ninmi.
