Juan 3:1-36
3 Fariseocunapurapica Nicodemo shuti runami tiyarca. Paica judiocunata mandajmi carca.
2 Cai runami Jesusta tuta ricunaman rishpaca: “Yachachij,* canca Dios cachashca yachachijmi cangui. Chaitaca yachanchijmi. Can ruracushca milagrocunataca Dios mana ayudajpica ni pi mana rurai tucunmanchu” nirca.
3 Chashna nijpimi Jesusca: “Canmanca manataj llullanichu. Maijanpish mana cutin huacharijca* Diospaj Gobiernopica mana yaicui tucunchu” nishpa cutichirca.
4 Chaipimi Nicodemoca: “¿Ima shinataj shuj yuyaj runaca cutin huacharingayari? Paica mamapaj huijsaman yaicushpa mana cutin huachari tucunchu ¿nachu?” nirca.
5 Chashna nijpimi Jesusca cashna cutichirca: “Canmanca manataj llullanichu. Yacumanta, espiritumanta mana huacharijca Diospaj Gobiernopica mana yaicui tucunchu.
6 Aichamanta huacharijca runapaj huahuami. Ashtahuanpish Diospaj espiritumanta huacharijca Diospaj huahuami.
7 ‘Cutinmi huacharina canguichij’ nishcamantaca ama mancharichu.
8 Huairaca maimantapish pꞌucunllami. Chaita uyai tucushpapish maimanta shamujta, maiman rijtapish mana yachanguichu. Diospaj espiritumanta huacharijpish chashnallatajmi tucun” nircami.
9 Chaipimi Nicodemoca: “¿Ima shinataj chashnaca tucungari?” nishpa tapurca.
10 Chashna tapujpimi Jesusca: “¿Canca israelitacunata yachachij cashca jahuachu caicunataca mana yachangui?
11 Canmanca manataj llullanichu. Ñucanchijca imata yachashcatami parlanchij. Shinallataj imata ricushcatami huillanchij. Chaita huillajpipish cancunaca mana chasquinguichijchu.
12 Cai allpapi tiyashcacunamanta parlajpipish cancunaca mana cringuichijchu. Jahua pachapi tiyashcacunamanta parlajpicarin, ¿ima shinataj cringuichijyari?
13 Jahua pachamanca ni pi mana huichiyashcachu. Ashtahuanpish Runapaj Churillami jahua pachamantaca uriyamushca.
14 Ima shinami chaquishca pambapi Moisesca shuj culebrata caspipi huarcurca. Chashnallatajmi Runapaj Churitapish gentecunaca huarcunga.
15 Chashnami tucui paipi feta charijcunaca huiñai causaita charingacuna.
16 Diosca cai pachapi causajcunata* yallitaj cꞌuyashpami paipaj shujlla Churita curca. Maijanpish paipi feta charijca* ama chingarichun, ashtahuanpish huiñai causaita charichunmi curca.
17 Diosca paipaj Churitaca cai pachapi causajcunata* juzgachunca mana cacharcachu. Ashtahuanpish paimanta cai pachapi causajcuna* quishpirichunmi cacharca.
18 Maijanpish paipi feta charishcata ricuchijca mana juzgashcachu canga. Shinapish paipi feta charishcata mana ricuchijca ñami juzgashca cashca. Diospaj shujlla Churipaj shutipi feta mana charishcata ricuchishcamantami juzgashca cashca.
19 Cai pachamanmi luzca shamurca. Gentecunaca mana allita rurashpami luzta cꞌuyanapaj randica amsata cꞌuyashcacuna. Chaimantami paicunaca juzgashca cangacuna.
20 Millaita rurashpa catijca luztaca pꞌiñanmi. Paipaj millai rurashcacuna ama yachaj chayarichunmi luzmanca mana cꞌuchuyan.
21 Ashtahuanpish allita rurajca, paipaj rurashcacuna Dios munashca shina cashcata ricuchingapajmi luzmanca cꞌuchuyan” nircami.
22 Chai qꞌuipami Jesusca paita catijcunandij Judea llajta uchilla pueblocunaman rirca. Chaipi tauca punllacunata paicunahuan saquirishpami gentecunata bautizarca.*
23 Juanpish Salim cꞌuchullapi saquirij Enonpimi bautizacurca. Chaipica achca yacumi tiyarca. Chaiman shamushpami gentecunaca bautizaricurcacuna.
24 Chai punllapajca Juantaca manaraj carcelpi churashcacunachu carca.
25 Juanta catijcunaca shuj judío runahuanmi Diospaj ñaupajpi ima shina chuya ricurinamanta rimanacurcacuna.
26 Chai qꞌuipami paicunaca Juanpajman rishpaca: “Yachachij, ¿Jordán yacu caishuj ladopi canhuan cashca runata yuyaringuichu? Canca paimantami huillarcangui. Ricui, paipishmari cunanca bautizacun. Gentecunapish tucuicunamari paipajman ricuncuna” nircacuna.
27 Paicuna chashna nijpimi Juanca cashna cutichirca: “Dios cujllapimi shuj runaca imatapish chari tucun.
28 ‘Ñucaca mana Cristochu cani. Paita ñaupashpa richun cachashcallami cani’ nishpa ñuca huillashcataca cancunallatajmi uyarcanguichij.
29 Noviaca noviopajmi. Ashtahuanpish noviopaj amigoca noviopaj cꞌuchullapi shayarishpa, novio ima nishcata uyashpaca achcatami cushicun. Chashnallatajmi ñucapish achcata cushicuni.
30 Paica ashtahuanmi rurashpa catinga. Cutin ñuca ruraicunaca asha ashami chingarishpa catinga” nircami.
31 Jahuamanta shamujca tucuicunata yallimi. Ashtahuanpish cai allpamanta cajca allpallamantatajmi. Chaimantami allpapi tiyashcacunallamanta parlan. Jahua pachamanta shamujca tucuicunata yallimi.
32 Paica imata ricushcata, imata uyashcatami huillan. Shinapish pai huillashcataca ni pi mana chasquinchu.
33 Ashtahuanpish pai huillashcata chasquijca, Dios mana llullaj cashcatami ricuchin.*
34 Diosca mana mitsashpami* paipaj espirituta cun. Chaimantami pai cachashca Churica Diospaj shimicunata huillan.
35 Yayaca Churita cꞌuyashpami tucuita paipaj maquipi churashca.
36 Churipi feta charishcata ricuchijca huiñai causaitami charinga. Shinapish Churita mana cazujca causaitaca mana charingachu. Ashtahuanpish paica Dios pꞌiñashcami canga.
Notacuna
^ O “Rabí”.
^ Caitaca “jahua pachamanta huacharijca” nishpapishmi traducishcacuna.
^ Griego rimaipica: “cai pachata” ninmi.
^ O “paipi crishcata ricuchijca”. Griego rimaipi “crina” nishpaca pi tiyashcata crinallamantaca mana parlacunchu. Ashtahuanpish ruraicunahuan crishcata ricuchinatami parlacun.
^ Griego rimaipica: “cai pachata” ninmi.
^ Griego rimaipica: “cai pacha” ninmi.
^ Griego rimaipica: “sellota churashcatami ricuchin” ninmi.
^ Griego rimaipica: “mana midishpami” ninmi.
