Juan 8:12-59
8 12 Chai qꞌuipami Jesusca cutinllataj paicunamanca cashna nirca: “Ñucaca gentecunapaj* luzmi cani. Maijanpish ñucata catijca amsapica manataj puringachu. Ashtahuanpish causaita cuj luztami charinga” nirca.
13 Shina nijpimi fariseocunaca: “Canca canllamantatajmi huillacungui. Chaimantami can huillashcaca mana valin” nircacuna.
14 Chashna nijpimi Jesusca cashna cutichirca: “Ñucallamantataj huillashpapish mana llullashpami huillani. Ñucaca maimanta shamushcata, maiman rigrishcatapish yachanimi. Cutin cancunaca ñuca maimanta shamushcata, maiman rigrishcatapish mana yachanguichijchu.
15 Cancunaca ñahuita ricushpallami juzganguichij. Ashtahuanpish ñucaca pita mana juzganichu.
16 Shinapish maijanta juzgashpaca cashcata rurashpami juzgaiman. Ñucaca ñuca munaimantaca mana juzganichu, ashtahuanpish ñucata cachaj Yayahuanmi juzganchij.
17 Cancunapaj Leypica: ‘Ishqui runacuna chaillatataj huillajpica, paicunapaj huillashcaca mana llullachu’ nishcami quillcashca tiyacun.
18 Ñucallatajmi ñucamantaca huillani. Ñucata cachaj Yayapish ñucamantami huillan” nircami.
19 Chaipimi paicunaca: “¿Maipitaj cambaj Yayaca?” nishpa tapurcacuna. Shina tapujpimi Jesusca: “Ñucatapish, ñuca Yayatapish mana rijsinguichijchu. Ñucata rijsishpaca ñuca Yayatapish rijsinguichijmanmi” nishpa cutichirca.
20 Jesusca Diospaj huasipi* yachachicushpami cullquita churana cajacuna cꞌuchullapi cashpa cai shimicunataca nirca. Shinapish paipaj hora manaraj chayamushcamantami paitaca pi mana japirca.
21 Jesusca cutinllatajmi paicunataca: “Ñucaca rigrinimi. Chaipimi ñucataca mashcanguichij. Shinapish cancunapaj juchallapitajmi huañunguichij. Ñuca maiman rigrishcamanca cancunaca mana ri tucunguichijchu” nirca.
22 Chashna nijpimi judiocunaca: “‘Ñuca maiman rigrishcamanca mana ri tucunguichijchu’ nishpaca, ¿Paillataj huañuchirinatachu yuyacun imashi?” nircacuna.
23 Chashna nijpimi Jesusca: “Cancunaca cai allpamantami* canguichij, ñucaca jahua pachamantami* cani. Cancunaca cai pachamantami canguichij, ñucaca mana cai pachamantachu cani.
24 Chaimantami cancunamanca ‘Cancunapaj juchacunallapitajmi huañunguichij’ nircani. Ñuca pi cashcata mana crishpaca cancunapaj juchacunallapitajmi huañunguichij” nircami.
25 Chashna nijpimi paicunaca Jesustaca: “¿Canca pitaj canguiyari?” nishpa tapurcacuna. Shina tapujpimi Jesusca: “¿Imapajtaj cancunahuanca yangamanta parlashpa catishari?
26 Cancunamantaca achcatami nina cani. Achca ruraicunatapishmi juzgana cani. Ñucata cachajca mana llullashpami parlan. Ñucaca paimanta imata uyashcatami chaillatataj gentecunamanca* parlani” nirca.
27 Chashna nijpipish paicunaca Yayamanta parlacushcataca mana intindircacunachu.
28 Chaimi Jesusca cashna nirca: “Cancunaca Runapaj Churita caspipi huarcushca qꞌuipami ñuca pi cashcataca yachanguichij. Shinallataj ñuca munaimanta imata mana rurashcata, ashtahuanpish ñuca Yaya yachachishcallata parlashcatami yachanguichij.
29 Ñucata cachajpish ñucahuanmi. Pai munashcatami siempre rurani. Chaimantami ñucallataca mana saquishca” nircami.
30 Jesús chashna nicujpica achca gentecunami paipi crircacuna.
31 Chaimi Jesusca paita crij judiocunataca cashna nirca: “Ñuca yachachishcacunata pajtachishpaca ñucata catijcunatajmi canguichij.
32 Chashnami mana llullataca rijsinguichij. Chai mana llullami cancunataca cacharichinga” nirca.
33 Shina nijpimi paicunaca: “Abrahanpaj huahua huahuacunami canchij. Ñucanchijca mana nunca shujtajcunata sirvij cashcanchijchu. Canca, ¿imamantataj ‘Cacharichishcami canguichij’ ninguiyari?” nishpa cutichircacuna.
34 Chashna nijpimi Jesusca cashna cutichirca: “Cancunamanca manataj llullanichu. Maijanpish juchata rurajca juchata sirvijmi tucun.
35 Shuj sirvij runaca amopaj huasipica mana siempre saquirinchu. Ashtahuanpish amopaj churimi huasipica siempre saquirin.
36 Chaimantami Churi cacharichijpica cancunaca cacharichishcataj canguichij.
37 Cancuna Abrahanpaj huahua huahuacuna cashcataca yachanimi. Shinapish ñuca yachachishcacunata mana chasquishcamantami ñucataca huañuchisha nicunguichij.
38 Ñucaca ñuca Yayahuan cashpa imata ricushcatami huillani. Cutin cancunaca cancunapaj yaya nishcata uyashpami imatapish ruranguichij” nircami.
39 Shina nijpimi paicunaca: “Ñucanchij yayaca Abrahanmi” nircacuna. Chaimi Jesusca paicunataca cashna nirca: “Abrahanpaj huahuacuna cashpaca Abrahán rurashca shinallatajmi ruranguichijman.
40 Ñucaca Diosmanta uyashcatami cancunamanca mana llullashpa huillashcani. Shinapish cancunaca ñucata huañuchinatami mashcacunguichij. Abrahanca chaitaca mana nunca ruranmanchu carca.
41 Cancunapaj yaya rurashcatami cancunapish ruranguichij” nircami. Chashna nijpimi paicunaca: “Ñucanchijca huainayashcamanta* huahuacunaca mana canchijchu. Ñucanchijca shujlla Yayatami charinchij paica Diosmi” nircacuna.
42 Chashna nijpimi Jesusca cashna cutichirca: “Dios cancunapaj Yaya cajpica ñucataca cꞌuyanguichijmanmi. Paimi ñucata cacharca, chaimantami caipi cani. Ñuca munaimantaca mana shamurcanichu. Ashtahuanpish paimi ñucata cacharca.
43 Cancunaca ñuca yachachishcataca mana uyasha ninguichijchu. Chaimantami ñuca nishcataca mana intindinguichij.
44 Cancunapaj yayaca Diablomi.* Chaimantami cancunapaj yaya munashcallata rurashun ninguichij. Paica callarimanta huañuchijmi. Paipaj shungupica llullana yuyaillami tiyan. Chaimantami paica mana llullamanta caruyarca. Ima llullata nishpaca paipaj shungupi tiyashcatami parlan. Paica llulla cashcamantami llullapaj yaya can.
45 Cutin ñucaca mana llullashpami parlani. Chashnapish ñucataca mana cringuichijchu.
46 ¿Cancunamantaca maijantaj ñuca ima juchata rurashcataca ricuchi tucunguichijyari? Mana llullashpa parlajpipish, ¿ima nishpataj ñucataca mana cringuichij?
47 Diospajlla cajcunaca Dios nishcacunatami uyancuna. Cancunaca mana Diospaj canguichijchu. Chaimantami Dios nishcacunataca mana uyasha ninguichij” nircami.
48 Chaita uyashpami judiocunaca: “‘Canca Samaria llajtamantami cangui, demoniotapishmi* charingui’ nishpaca ¿manachu allita nicunchij?” nircacuna.
49 Shina nijpimi Jesusca cashna cutichirca: “Ñucaca ima demoniota* mana charinichu. Ashtahuanpish ñuca Yayatami jatunyachini. Cutin cancunaca ñucataca yangapimi churanguichij.
50 Ñucaca jatunyachishca canataca mana mashcacunichu. Ashtahuanpish Diosmi ñuca jatunyachishca cachun munan. Paimi juez can.
51 Cancunamanca manataj llullanichu. Maijanpish ñuca yachachishcata cazujca manataj huañungachu” nircami.
52 Chashna nijpimi judiocunaca: “Cunantajca demoniota* can charishcatami ricunchij. Abrahanpish, profetacunapish huañurcacunami. Shinapish canca ‘Maijanpish ñuca yachachishcata cazujca manataj huañungachu’ ninguimi.
53 ¿Canca ñucanchij yaya Abrahantapish yallichari cangui? Abrahanpish, profetacunapish huañurcacunami. ¿Canca pi cashcatataj yuyanguiyari?” nircacuna.
54 Chashna nijpimi Jesusca: “Ñucallataj jatunyarishpaca, ñuca jatunyarishcaca imapajpish mana valinmanchu. Ashtahuanpish ñuca Yayami ñucataca jatunyachin. Paitami cancunaca ñucanchij Diosmi ninguichij.
55 Chashna nishpapish paitaca mana rijsinguichijchu. Ñucaca paitaca rijsinimi. Paita mana rijsinichu nishpaca cancuna shinallataj llullami caiman. Ashtahuanpish ñucaca paitaca rijsinimi. Chaimantami pai nishcacunata cazuni.
56 Cancunapaj yaya Abrahanca yallitaj cushicushpami ñuca shamuna punllataca shuyacurca. Paipaj yuyaipi chai punllata ricushpami cushicurca” nirca.
57 Chaimi judiocunaca: “Manaraj 50 huatacunallatapish charinguica, ¿ima shinataj Abrahantaca ricushcanguiyari?” nircacuna.
58 Shina nijpimi Jesusca: “Cancunamanca manataj llullanichu. Abrahán manaraj huacharijpimi ñucaca ña tiyarcani” nirca.
59 Chashna nijpica rumicunata japishpami shitashun nircacuna. Shinapish Jesusca pacatucushpami Diospaj huasimanta llujshishpa rirca.
Notacuna
^ Griego rimaipica: “cai pachapaj” ninmi.
^ “Diospaj huasi” shimita huasha diccionariopi ricui.
^ Griego rimaipica: “ucumantami” ninmi.
^ Griego rimaipica: “jahuamantami” ninmi.
^ Griego rimaipica: “cai pachamanca” ninmi.
^ Griego rimaipica: “pornéia” ninmi. “Huainayana” shimita huasha diccionariopi ricui.
^ “Diablo” shimita huasha diccionariopi ricui.
^ O “supaitapishmi”.
^ O “supaita”.
^ O “supaita”.
