Mateo 22:1-46
22 Jesusca cutinllatajmi chꞌimbapuraicunata churashpa paicunaman cashna nishpa parlarca:
2 “Jahua pacha Gobiernoca* shuj rey paipaj churita cazarachicushpa bodapi shuj jatun micuita ruraj shinami.
3 Reyca paita sirvijcunatami bodaman invitashcacunata cayanaman cacharca. Shinapish invitashcacunaca mana shamusha nircacunachu.
4 Mana shamushun nijpimi, reyca shujtaj sirvijcunata cutin cashna nishpa cacharca: ‘Invitashcacunamanca: “Micunapish ñami yanushca tiyacun. Ñuca huagracunata, ñuca huirayashca animalcunatapish ñami huañuchishcani. Tucuitami allichishcani. Bodaman shamupaichij” ninguichij’ nircami.
5 Ashtahuanpish invitashcacunaca mana uyashpami shujca paipaj chagraman rirca, caishujca paipaj negociocunaman rirca.
6 Shujtajcunacarin reyta sirvijcunata japishpami macashpa huañuchircacuna.
7 Chashna rurashcata yachashpami reyca jatunta pꞌiñarishpa chai huañuchijcunata huañuchichun, paicuna causana llajtatapish rupachichun paipaj soldadocunata cacharca.
8 Chai qꞌuipami reyca paita sirvijcunataca: ‘Bodapajca ñamari tucuita allichishcani. Shinapish invitashcacunallatajmi mana caipi cana cashcata ricuchishcacuna.
9 Cunanca jatun ñancunaman llujshishpa mashna ricurijcunata bodaman invitagrichij’ nirca.
10 Chashna mandajpimi reyta sirvijcunaca ñancunaman rishpaca mashna ricurijcunata, allicunatapish mana allicunatapish bodaman invitarcacuna. Chashnami boda huasipica invitashcacunaca* junda carca.
11 Invitashcacunata rey ricunaman yaicushpaca, bodaman rina churanahuan mana caj shuj runatami ricurca.
12 Chai runata ricushpami: ‘Amigo, bodaman rina churanahuan mana cashpaca, ¿ima nishpataj caimanca yaicurcanguiyari?’ nirca. Shina nijpimi chai runaca imata mana ni tucushpa upalla saquirirca.
13 Chaimantami chai reyca paita sirvijcunataca: ‘Chaquicunata, maquicunata huatashpa canlla amsaman shitaichij. Chaipimi paica huacashpa quirucunapish caniringa’ nirca.
14 Invitashcacunaca achcacunami. Ashtahuanpish agllashcacunaca ashacunallami” nircami.
15 Chai qꞌuipami fariseocunaca chaimanta rircacuna. Chai fariseocunaca Jesús parlacushpa imapi pandarijta ricushpa juchachingapajmi paicunapura parlanacurcacuna.
16 Chashna parlanacushpami fariseocunaca paicunata catijcunatapish, Herodesta* catijcunatapish Jesusta cashna nichun cacharcacuna: “Yachachij, canca llullacunataca mana ninguichu. Diosmantapish mana llullashpami yachachingui. Shinallataj gentecunapaj ñaupajpi alli ricurinatapish mana mashcanguichu. Pitapish jahua ñahuillataca mana ricunguichu. Chaitaca ñucanchijca allimi yachanchij.
17 Shinaca ¿imatataj yuyangui? ¿Cesarman* impuestota* paganaca allichu canga o mana?” nircacuna.
18 Shina nijpimi Jesusca paicuna millai yuyaicunahuan cajta yachashpa: “Mishqui shimi jayaj shungucuna, ¿imamantataj ñucataca pandachisha ninguichijyari?
19 Impuestota pagana cullquita ricuchichij” nirca. Jesús chashna nijpimi shuj denario* cullquita apamurcacuna.
20 Chaimi Jesusca: “¿Cai cullquipica pipaj ñahuitaj, pipaj shutitaj quillcashca tiyacun?” nirca.
21 Paicunaca: “Cesarpajmi” nircacunami. Chashna nijpimi Jesusca: “Cesarman cuna cashcataca Cesarman cuichij. Diosman cuna cashcataca Diosman cuichij” nirca.
22 Chashna nijta uyashpami paicunaca mancharinacushpa chaimanta rircallacuna.
23 Chai punllallatajmi saduceocunaca Jesuspajman shamurcacuna. Paicunaca huañushcacuna causarinataca mana crincunachu. Chaimantami cashna tapurcacuna:
24 “Yachachij, Moisesca: ‘Shuj cazado runa huahuacunata manaraj charishpa huañujpica, paipaj huauqui chai viuda huarmihuan cazarashpa, huauquipaj randi huahuacunata charichun’ nishpami mandarca.
25 Ñucanchijpurapica canchis huauquicunami tiyarca. Punta huauqui cazarashpaca huahuacunata manaraj charishpami huañurca. Chaimi paipaj huarmihuanca qꞌuipa huauqui cazararca.
26 Qꞌuipa huauquipish huahuata manaraj charishpami huañurca. Cutin chaipaj qꞌuipa huauquipish chashnallatajmi huañurca. Tucui canchis huauquicunami chashnallataj tucurca.
27 Chai huashaca huarmipishmi huañurca.
28 Chashna cajpica huañushcacuna causarina punllapica, ¿canchis huauquicunamantaca maijanshi chai huarmipaj cusaca canga? Tucui huauquicunamari chai huarmihuanca cazararcacuna” nircacunami.
29 Shina nijpimi Jesusca cashna cutichirca: “Cancunaca Dios quillcachishcacunatapish, mashna poderta Dios charishcatapish mana yachanguichijchu. Chaimantami pandaricunguichij.
30 Huañushcacuna causarina punllapica cꞌaricunapish, huarmicunapish mana cazarangacunachu. Ashtahuanpish paicunaca jahua pachapi caj angelcuna shinami cangacuna.
31 ¿Huañushcacuna causarinamanta Dios cancunaman ima nishcataca manachu liyishcanguichij? Paica cashnami nirca:
32 ‘Ñucami Abrahanpaj, Isaacpaj, Jacobpaj* Dios cani’. Shinaca paica huañushcacunapaj Diosca mana canchu. Ashtahuanpish causajcunapaj Diosmi can” nircami.
33 Jesús chashna yachachijta uyashpaca gentecunaca achcatami mancharircacuna.
34 Jesús ima shina saduceocunata upallachishcata uyashca qꞌuipami fariseocunaca tandanacurcacuna.*
35 Paicunapuramantaca shujmi Moisesman cushca leyta alli yachaj carca. Paica Jesusta pandachisha nishpami cashna tapurca:
36 “Yachachij, Moisesman cushca leymantaca, ¿maijan mandashcataj ashtahuan yalli valishca can?” nircami.
37 Chashna tapujpimi Jesusca: “‘Jehová* Diostaca cambaj tucui shunguhuan, cambaj tucui causaihuan,* cambaj tucui yuyaihuan cꞌuyangui’.
38 Cai punta mandashcami tucui mandashcacunamanta ashtahuan yalli valishca can.
39 Catij mandashcapish punta mandashca shinallatajmi. Chaipica: ‘Can quiquin cꞌuyarij shinallataj shujtajcunatapish cꞌuyangui’ ninmi.
40 Moisesman cushca leypish, Profetacuna nishcacunapish cai ishqui mandashcacunamantami shamun” nircami.
41 Fariseocuna chaipi tandanacushca cajpirajmi Jesusca cashna tapurca:
42 “¿Cristomantaca imatataj yuyanguichij? ¿Paica pipaj churitaj can?”. Chashna tapujpimi paicunaca: “Davidpaj Churimi can” nircacuna.
43 Chaimi Jesusca paicunataca cashna nishpa tapurca: “Shina cajpica, ¿ima nishpataj Davidca Dios yuyaita cujpi Cristotaca ñuca Amito nircari? Davidca cashnami nirca:
44 ‘Jehová* Diosca ñuca Amitotaca: “Canta pꞌiñajcunata cambaj chaqui ucupi churangacama ñuca alli ladopi tiyari” nircami’.
45 Davidllataj Amito nijpica, ¿ima shinataj Cristoca Davidpaj churi cangari?” nircami.
46 Jesús chashna nijpica pipish mana imata cutichi tucurcacunachu. Chai punllamantami ima tapuita ni pi mana ashtahuan rurarcacuna.
Notacuna
^ Caipica Diospaj Gobiernomantami parlacun.
^ O “mesapi tiyacujcunaca”.
^ “Herodes” shimita huasha diccionariopi ricui.
^ “César” shutita huasha diccionariopi ricui.
^ Cai impuestotaca cada unomi pagajcuna carca.
^ “Denario” shimita huasha diccionariopi ricui.
^ “Jacob” shutita huasha diccionariopi ricui.
^ Caitaca “fariseocunaca saduceocunahuan tandanacurcacuna” nishpapishmi traducishcacuna.
^ “Jehová” shutita huasha diccionariopi ricui.
^ O “almahuan”. “Alma” shimita huasha diccionariopi ricui.
^ “Jehová” shutita huasha diccionariopi ricui.
