Asiria llajta Nínive pueblopi causajcunaca yallitaj millaicunami carca. Jehová Diosca profeta Jonastaca, ‘Nínive puebloman rishpa chai gentecuna paicunapaj causaita cambiachun huillagri’ nircami. Pero Jonasca Nínive puebloman rinapaj randica Tarsis puebloman ricuj barcopimi miticushpa rirca.

Ña ricujpica achca huairami jatarirca. Barcota purichijcunaca achcatami mancharircacuna. Paicunapaj dioscunata mañashpami, ‘¿imamantataj cashna tucunchij?’ nircacuna. Jonasca, ‘ñucapaj culpami. Diosta mana cazushpami miticushpa shamucuni. Ñucata yacuman shitajpica mama cucha yacuca casijlla tucungami’ nirca. Barcota purichijcunaca mana chaita rurasha nircacunachu. Pero Jonás cutin cutin chashna nijpimi yacuman shitarcacuna. Chaipimi huairaca casijlla tucurca.

Jonasca cunanca huañushatajmi yuyashcami canga. Yacupi ashtahuan huashicucushpaca Jehovatami mañarca. Chaipimi Diosca shuj jatun pescadota cacharca. Chai pescadoca Jonastaca causajtami millpurca. Pescado ucupi cashpaca, ‘cantaca siempremi cazusha’ nishpami Diosta mañarca. Jonasca quimsa punllacunatami pescado huijsa ucupi carca. Qꞌuipaca pescadoca chaquishca allpapimi Jonasta shungu tigrarca.

 Shinami Diosca Jonasta quishpichirca. Jehová Diosca Jonasta cutinmi Niniveman richun nirca. Paica Dios nishcata cazushpami chai llajtaman rirca. Chaiman chayashpaca millai gentecunataca, ‘cunanmanta 40 punllacunapica cai puebloca chingaringami’ nirca. Chaita uyashpami arrepintirircacuna. Niniveta mandajpish gentecunataca, ‘arrepintirishpa Taita Diosta mañaichij, manapishchari llaquichinga’ nircami. Gentecuna arrepintirijpimi Diosca paicunata mana chingachirca.

Jehová chai llajtata mana tucuchishcamantami Jonasca pꞌiñarirca. Caita yuyai, Diosca Jonashuanca mana utca pꞌiñarircachu, ashtahuanpish llaquircami. Pero paica ninivitacunataca mana llaquircachu. Chaimantami chai pueblomanta rishpa shuj calabaza yura ucupi llaquirishpa tiyarirca. Qꞌuipaca chai yura chaquijpimi Jonasca achcata colerarca. Chaimi Diosca, ‘¿Ninivepi causajcunatapish yallichu cai yuramanta llaquiringui? Ñucaca llaquishcamantami paicunata quishpichircani’ nircami. ¿Diosca imatataj yachachisha nirca? Ninivitacuna shuj yuratapish yalli valishca cashcatami yachachirca.