Lección 2
Rebecaca Jehová Diostami cushichisha nirca
Rebecaca Jehová Diosta cꞌuyaj huarmimi carca. Paipaj cusa Isaacpish Jehová Diostami cꞌuyaj carca. ¿Paicunaca ima shinataj rijsinacurca? ¿Rebecaca ima shinataj Jehová Diospaj shunguta cushichirca? Caitaca cai leccionpimi yachagrinchij.
Isaacpaj yayaca Abrahammi carca, mamaca Sarami carca. Paicunaca Canaán llajtapimi causarcacuna. Abrahamca Diosta cꞌuyaj huarmihuan paipaj churi Isaac cazarachunmi munarca. Shinapish Canaanpi causajcunaca mana Jehová Diosta adorajcunachu carca. Chaimantami paita servij shuj runata Harán llajtaman cacharca (Eliezermi cashca canga). ¿Imapajtaj Harán llajtaman cacharca? Harán llajtapica Abrahampaj familiami causarca. Chaipimi Eliezerca shuj alli huarmita Isaacpaj mashcana carca.
Camellocunaman yacuta ubyachingapajca Rebecaca achcatami trabajarca
Eliezerca Abrahampaj shujtaj servijcunahuanmi 10 camellocunapi micunata, regalocunata apashpa rirca. ¿Eliezerca ima shinataj Isaacpaj shuj huarmita mashcarca? Harán llajtapi causaj huarmicunaca pugyuman rishpami yacuta huishijcuna carca. Chaitaca Eliezerca yacharcami. Chaimantami Harán llajtaman chayashpaca pugyuman rirca. Chaipica Jehová Diostami cashna mañarca: “Shuj solterata yacuta mañajpica, paica ubyailla, cambaj camellocunamanpish yacuta ubyachishami nij huarmimi, can agllashca cashcata yachasha” nircami.
Eliezer Diosta mañashpa tucuchijpimi Rebecaca pugyuman chayarca. Bibliapica Rebecaca sumaj solterami carca ninmi. Eliezer yacuta mañajpica Rebecaca: “Ñuca amitolla ubyailla, cambaj camellocunamanpish pugyumanta yacuta huishishpa ubyachishallami” nirca. Camellocunaca achca yacutami ubyan. ¡Chaimantami cutin cutin pugyuman rishpa yacuta huishina carca! Página 6-pi tiyaj dibujota ricui. ¿Rebecaca imatataj ruracun?... Rebeca achcata trabajashcamantami Eliezerca cushicurca: ¡Jehová paipaj mañashcata cutichishcatami entendirca!
Eliezerca sumaj regalocunatami Rebecaman curca. Rebecaca Eliezerta, paihuan caj runacunatapish paipaj yaya mamapaj huasimanmi pusharca. Eliezerca Abraham imapaj cachashcata, Jehová Diospish ima shina paipaj mañaita cutichishcatami parlarca. Caita uyashpaca Rebecapaj familiaca achcatami cushicurca. Chaimantami Eliezertaca: “Isaacpaj huarmi cachun Rebecata pushashpa rilla” nirca.
Rebecaca Eliezerhuan Canaán llajtaman rishpami Isaachuan cazararca
¿Rebecaca Isaachuan cazarasha nircachu?... Paipaj familia tapujpica Rebecaca ari nircami. ¿Imamantataj ari nirca? Eliezerta Jehová Dios cachashcata yachashpami Rebecaca ari nirca. Chaimantami Rebecaca Eliezerhuan Canaán llajtaman rishpa Isaachuan cazararca.
Paita cazushcamantami Jehová Diosca Rebecata alli cuidarca. Shinallataj Jesuspaj ñaupa mamapishmi tucurca. Rebeca shina canpish Diosta tucuipi cazujpica paica cuidangami, cushicungapishmi.
