ACHCA huatacunatami Bibliapi quillcashcacunata mana valichijcunaca Daniel libropi parlashca mandaj Belsasarca mana tiyarcachu nijcuna carca (Daniel 5:1). Paicunaca: “Mandaj Belsasar tiyashcata yachangapajca arqueologocunapish mana imata tarishcacunachu” nijcunami carca. Pero 1854 huatapica ¿imataj tucurca?

Chai huatapica cónsul británico John Taylor runaca ñaupa punllacunapi tiyashca Ur llajtatami allashpa investigarca. Cunanca chai llajtaca Irakpimi saquirin. Chaipi allacushpaca shuj jatun torretami japirca. Chai torre ucupimi 10 centímetros vali rumicunata japirca. Chai rumicunapica ñaupa quillcashcacunami tiyarca. Shuj rumipica “Babiloniata mandaj Nabonido, paipaj punta churi Belsasarpish achca huatacunata causachun” nishpa quillcashcatami japirca. Bibliapi quillcashcacunata mana valichijcunapish caita yachaj chayashpaca Belsasar tiyashcatami intindircacuna.

Bibliapicarin Belsasarca mandajmi carca ninmi. Pero Bibliapi quillcashcacunata mana valichijcunaca mana shinachu can nijcunami carca. Por ejemplo, 1875 huatacunapica huaquin gentecunaca ‘Belsasarca paipaj yaya Nabonido mandacujpimi paipish mandaj carca’ nircacunami. Pero cienciamanta estudiaj William Talbot runaca: “Gentecuna nishcaca mana maipi tiyanchu” nircami.

Cutin shujtaj rumicunapica: “Babiloniata mandaj Nabonidoca huaquin huatacunami shujtaj llajtapi carca” nishpa quillcashcatami japircacuna. Babiloniapi Nabonido mana cajpica ¿pitaj mandacurca? Encyclopaedia Britannica libropica: “Mandaj Nabonido Babiloniaman tigrangacamaca paipaj churi Belsasar mandachunmi saquirca. Shinallataj achca soldadocunatapishmi paiman saquirca” ninmi. Chaimantami estudiaj Alan Millard runaca: “Daniel libropi Belsasarta mandaj nishpaca mana pandarinchu” nirca.

Daniel libroca Bibliamanta shuj libromi can. Bibliamanta huaquin librocunapipish profeta Danielmantami parlan. Chaimantami Daniel librotaca Jehová Dios quillcachishcata crinchij (2 Timoteo 3:16).