CAITA YUYAI: Shuj huasipichari ñaupa tiempopi tiyashca cosascunata ricucungui. Can ricucushca cosascunaca maijancunaca dañarishcacuna, pꞌaquirishcacuna, viejayashcacuna, o maijancunacarin itu ituchari ricurincuna. Pero chai tucui cosascunamantachari shujca alhaja mushuj laya ricurin. Chai cosascunata cuidajtaca, “¿caica mushujchu can?” nishpachari tapungui. Paica, “mana mushujchu, shujtaj cosascunamanta yalli ñaupami can, allichinatapish nunca mana allichishcanchijchu” ningachari. Chai nishcata uyashpami cutin tapungui, “pero caitaca ¿manachu imapi utilizarcacuna? mushujrijmi can” nishpa. Chashna nijpimi, “mana, rupipi, tamyapimi pasashca. Huaquincunarin ñutushpa tucuchinatami munashcacuna” ningachari. Chaita uyashpami, “caica ¿ima materialhuanshi rurashca canga? mana tucurishcaca” nishpa yuyangui.

Bibliapish chai valishca cosas layami can. Bibliataca casi tucui librocunamanta ñaupami quillcarcacuna. Ñaupa tiempopi quillcashca achca librocunaca cunan punllacunapajca imapaj ña mana sirvinchu. Ima cosascuna tucurij layami tucurishpa rishca. Pero Bibliaca cai tucui librocunamanta ñaupaman quillcashca cashpapish cunancamami valishca can. Por ejemplo, achca huatacuna huashamanca huaquin librocunapica cienciamantami chꞌican chꞌican yuyaicunata quillcarcacuna. Shinapish cunan punllacunapica chai librocunapaj huaquin yuyaicunaca mana cierto cashcatami ricushcacuna. Shinallataj chai librocunapica huaquin ungüicunamanta ima shina jambirinatami parlajcuna carca. Pero cunan punllacunapica chai jambicunaca ñucanchij saludta dañajtami ricushcacuna. Cutin shujtaj librocunacarin yallitaj maucayashcamantami huaquin hojacunalla saquirishcacuna.

Pero Bibliaca chai librocuna shinaca mana canchu. 3.500 yalli huatacuna huashaman quillcashca cashpapish cunancamami valishpa catin. Huaquincunaca Bibliata tucuchisha nishpami achca jarcaicunata churashcacuna. Por ejemplo, Bibliapaj yuyaicunaca mana  allichu nishpami Bibliata rupachishcacuna. Shinapish Bibliataca mana chingachi tucushcacunachu. Ñaupa tiempo gentecunaca cienciamanta, jambicunamantaca panda yuyaicunatami charircacuna. Shinapish Bibliaca cienciamanta, jambicunamanta parlashpaca mana pandarircachu (“¿Bibliaca pandarinchu?” nishca cuadrota ricui).

“¿Bibliapaj consejocunaca ciertotajchu ayudan?” nishpachari tapuringui. Caita yachangapajca caipi yuyai. Jatun macanacuicunamanta, shuhuacunamanta, yaricaicunamantami cꞌuyaillata causacunchij. Pero, ¿Bibliapaj mandashcacunata cazushpaca cushillachu causanchijman? Huaquin ejemplocunata ricushun.

CꞌUYAIHUAN CASILLA CAUSANAMANTA

“Cushicuichij pꞌiñanacushcata allichijcuna. Cancunatami Taita Diosca: ‘Ñuca huahuacunami canguichij’ ningami” (Mateo 5:9, QC, 1989). “Cancuna tucuicunahuan alli cai tucushpaca, tucuicunahuan sumajta causaichij” (Romanos 12:18).

LLAQUISHPA PERDONANAMANTA

“Llaquijcunaca, cushichishcami. Paicunataca Taita Diosmi * llaquinga” (Mateo 5:7). “Chaipaj randica, caishujhuan chaishujhuan alli caichij. Cristopi cancunata Dios perdonashca shinallataj, caishuj chaishuj llaquijcuna, perdonanacujcuna caichij” (Efesios 4:32).

SHUJ SHINALLA CAUSANAMANTA

“Taita Diosca tucui cai pachapi mirarishpa causachunpish shuj runallatami churarca” (Hechos 17:26). ‘Pi cashpapish Taita Diospaj ñaupajpica tucuicuna chai shinallatajmi canchij. Maijan llajtapi causaj cashpapish Taita Diosta manchashpa allita rurajtami Taita Diosca alli nin’ (Hechos 10:34, 35).

ALLPATA CUIDANAMANTA

“Mandaj Taita Diosca, Edén llajtapi pai rurashca huertapimi pai rurashca runataca chaipi trabajashpa, cuidashpa causachun churarca” (Génesis 2:15). ‘Cai pachata chingachijcunataca Taita Diosca chingachingami’ (Apocalipsis 11:18).

CHARIJYANAMANTA, HUAINAYANAMANTA

“Pajta ñataj mitsa tucushpa ashtahuan charisha ninguichijman. Achcata charishcacunaca mana causaita cunchu” (Lucas 12:15). “Cancunaca ña Diospajllami canguichij. Chaimanta cancunapurapica huainayaj nishcapish, imatapish millaita rurashpa causacun nishcapish, imatapish ashtahuan charina yuyaillami nishcapish amataj uyarichunllapish” (Efesios 5:3, QC, 1989).

MANA SHUHUASHPA SINCHITA TRABAJANAMANTA

“Maijan shuhua cashca cashpapish, ama ashtahuan shuhuachun. Chaipaj randica, trabajachun. Ima illajlla cajcunaman chaupinata charinapaj, quiquin maquihuan imatapish allita rurachun” (Efesios 4:28).

SHUJTAJCUNATA AYUDANAMANTA

“Llaquilla cajcunataca cushichichij, manaraj alli yachajcunataca yachachipaichij. Tucuicunahuan alli caichij” (1 Tesalonicenses 5:14). ‘Yaya mama illajcunata, llaquihuan caj viudacunatapish ayudanami canchij’ (Santiago 1:27).

Bibliaca caita o chaitami rurana cangui nishpaca mana tucuita huillanchu. Chaipaj randica mandashcacunata ima shina pajtachinatami yachachin. Gentecuna Biblia mandashca shina causashpaca cunan punlla llaquicunataca mana charinmanchu. Llaqui punllacunapi causacushcamantami Diospaj mandashcacunata cazunaca ashtahuan valishca can. ¿Bibliapaj yuyaicunaca ima shinataj canta ayudai tucun?

Jesusca ñucanchijta yalli yachajmi can. Paica: ‘Yachaisapacunataca paicunapaj ruraicunapimi ricui tucunchij’ nircami (Mateo 11:19, NM). Ñucanchij causaipi consejocunata pajtachishpami cai consejo alli cashcata o mana alli cashcata yachai tucunchij. Canca: “¿Bibliapaj consejocunata cazushpaca cushillachu causasha? ¿Ñuca problemacunata allichingapaj Bibliaca ayudai tucungachu?” nishpachari yuyacungui. Bibliapaj consejocuna ayudaj cashcata ricungapajca Diana * huarmi ima tucushcata ricushun.

Dianaca cushilla alhaja causaitami charirca. Pero shuj punllaca achca llaquicunami paitaca japirca. Por ejemplo, paipaj ushushimi huañurca, paipaj cusapish shitashpami rirca, cullqui valipishmi tucurca. Paica, chai problemacunata charishpami imapaj mana valishca shina sintirirca.

Dianaca chashna problemacunata charishpami Salmo 90:10-pi nishca shimicunata yuyarirca. Chaipica: “Ñucanchij causana punllacunaca canchis chunga huatallami. Ashtahuan sinchicunapish pusaj chunga huatallatami causan. Unita causaj sinchi runa nishca cashpapish, llaquita, cꞌuyaillatami causan. Tucuicunami ñucanchij shinallataj utca tucurinllacuna” ninmi.

 Dianaca paipaj llaquicunata ahuantangapajca Bibliapimi consejocunata mashcarca. Catij quimsa temacunapica huaquin cꞌari huarmicunamantami parlagrinchij. Paicunaca Bibliaca ñaupa libro cashpapish valishca yuyaicunata charishcatami ricurcacuna. Chaimantami alli, cushilla causangapaj nishpa Bibliapaj mandashcacunata pajtachinata agllarcacuna. ¿Imamantataj paicunaca Bibliaca mana shujtaj librocuna shina cashcata yuyancuna? ¿Taita Dios Bibliata quillcachishcamantachu mana shujtaj librocuna shina can? (1 Tesalonicenses 2:13).

Quiquinpishchari causaica sinchi cashcata yuyangui. ¿Llaquicunamanta ama yallitaj sustaringapajca imatataj rurai tucungui?

Bibliatami leyina cangui. Caita rurashpaca:

1. Llaquipi ama urmangapaj imata ruranatami yachangui.

2. Llaquicuna ricurijpi imata ruranatami yachangui.

3. Llaquicunata charishpapish tranquilomi causangui.

Catij temacunapimi cai yuyaicunamantaca ashtahuan yachangui.