Rosi huarmica: “Ñuca charishca llaquicunataca mana allichi tucushpami punllanta sustarishpa causarcani” nircami. Pero chai llaquicunata charishpaca ¿Rosica imatataj rurarca? Mateo 6:34 versotami leyirca. Chaipica: “Chashna cajpica, caya punllaca imashi tucushun nishpa, ama huañuricuichijchu. Punllantami ima llaqui cashpapish tiyan. Chaimanta cayapajca cayallatajmi yuyarina canguichij” ninmi. Rosica: “Problemacunataca punllatami charini, caya punlla cai llaqui japingachu nishpa mana sustarinachu cani. Cunanca Jesús nishca shinami causani, chaimantami cayandij punllapaj problemacunamantaca mana dimastij sustarini” nircami.

Yasmín huarmica: “Yallimana sustarishpalla causashcamantami tucui semanacuna huacaj carcani, huaquin tutacunacarin dorminatapish mana dormi tucurcani” nircami. Ama chashna sintirishpa catingapajca tía Yasminca 1 Pedro 5:7-tami leyirca. Chaipica: “Diosmi cancunataca cuidacun. Chaimanta ima llaquicuna yuyailla canataca paiman mingaichij” ninmi. Yasminca: “Tucui shunguhuan Yaya Diosta mañanataca manataj saquircanichu. Chashna mañajpica ñucamanta Yaya Dios llashaj quipita uriyachishcata layami sintircani. Dimastij sustarina yuyaicuna shamujpica imata ruranatami cunanca ña yachani” nircami.

Isabella soltera huarmica: “Importante cosascunata ruranapaj randica, ñuca yaya layallatajmi televisionta gushtashpa, dormishpa pasaj carcani. Chashna mana alli costumbrecunata charishcamantami ima trabajotapish mana allita ruraj carcani” ninmi. Pero Isabellaca 2 Timoteo 2:15 versota leyishpami mana alli ruracushcata cuentata curca. Chaipica: ‘Diospaj ñaupajpi paipajta ruraj cashcata ricuchingapajca, allita rurana yuyailla cangui. Chashna cashpami imata mana pingaringui’ ninmi. Isabellaca: “Diospaj ñaupajpi alli ricurisha nishpaca mana imatapish último horapaj saquina cashcatami cuentata curcani” ninmi.

Cutin, Kelly huarmica: “Shuj trabajota utca entregana cashpapish chai trabajota rurangapajca último horapajmi saquij carcani. Chai trabajota mana utca tucuchinata valishpa, llaquilla sintirishpami huacaj carcani, dormipish mana japijchu carca” ninmi. Proverbios 13:16-ta leyishpami Kellyca imatapish mana ultimopaj saquinata cashcata intindirca. Chaipica: “Alli yuyaiyuj runaca alli yachaihuanmi imatapish ruran. Ashtahuanpish rumi shungu runaca, yachai illaj cashcatami ricuchin” ninmi. Kellyca: “Cunanca shuj cuadernopimi imalla rurana cashcata anotashpa churani. Chai anotashcata catishpami último horapaj imatapish ña mana saquini” ninmi.

Cristina huarmica: “Ñuca cusa shitashpa rijpimi ñucalla chuscu uchilla huahuacunandij saquirircani. Proverbios 17:17-pi ima nishcata yuyarishpami animota japircani. Chaipica: ‘Alli apanacuj runaca paihuan apanacujtaca, tucui causaipimi cꞌuyan. Ima llaqui japijpipish, quiquin huauqui shinami llaquin’ ninmi” nircami. Cristina chashna llaquicunahuan cajpimi Diosta sirvij amigocuna paitaca ayudarca. Tía Cristinaca: “Turi ñañacunami micunata, sisacunata apamushpa ñucataca achcata animarca. Quimsa cutinmi ñucanchij cosascunata shujtaj huasiman cambiashpa ayudarcacuna. Shuj trabajitotapish mashcashpami curcacuna. Shinami ñuca alli amigocuna cashcata ricuchircacuna” ninmi.

Ñaupa temapi parlashca Diana huarmica paipaj huahua huañujpi, cusa shitashpa rijpimi sololla sintirirca. Dianaca, “shujtajcuna cushilla causacujta ricushpami, ñucaca mana cushilla causacunica, solollami cani” nishpa achcata sustarij carca. Ama chashna sintiringapajca Dianaca Salmo 68:6-tami leyirca. Chaipica: “Taita Diosca sapalla cajcunatapish familiapi [“huasipi”, NM] causachunmi churan” ninmi. Dianaca: “Cai versoca mana runacuna rurashca huasimanta parlacunchu. Ashtahuancarin sapallacunata Yaya Dios cuidaj cashcatami ricuchin. Cai versopi nishca shinaca Diosta sirvijcunahuanmi shuj familia shina tandalla causai tucunchij. Pero paicunahuan tandalla causangapajca Salmo 37:4-pi nishcatarajmi pajtachina carcani. Chai versopica: ‘Mandaj Diosllahuan cushicui. Cambaj shungupi yuyashcataca paimi cunga’ ninmi” nircami.

Dianaca: “Chai versota leyishpami Yaya Diosmanta manataj caruyana cashcata intindircani. Shinallataj Diosta sirvijcunahuan alli apanacungapajmi imallata rurana cashcata cuentata curcani. Shujtajcunapaj pandarishcacunata ricunapaj randica paicuna allita rurashcacunatami ricuna carcani” nircami.

Testigo de Jehovacunaca tucui gentecuna layallatajmi juchayuj can. Chaimantami paicunapish llaquicunata charin. Pero cashna llaquicunata charishpapish Bibliapaj mandashcacunata cazushpami shujtajcunata ayudancuna. Cashna laya amigocunata charinami alli can. Shinapish ¿ñucanchij familia huañujpi, o shuj millai ungüita japijpica Diospaj Shimica ima shinataj ñucanchijta ayudai tucun?