¿Diosta rijsinguichu?
Achca gentecunaca Diospimi crinchij nishpapish, paimantaca mana igual yuyancunachu. Maijancunaca Yaya Diosca millai cashpami gentecunataca castigan nincunami. Cutin shujtajcunaca Diosca yallitaj cꞌuyaj cashcamantami imatapish rurachun saquinlla nincunami. Shujtajcunacarin Diosca gentecunataca mana cꞌuyanchu, paica carullamantami ricucun nincunami. Chꞌican chꞌican yuyaicuna tiyashcamantami achcacunaca Diostaca manataj rijsi tucunchijchu nishcacuna.
¿Diostaca rijsi pudinguichu? Ari, rijsi pudinguimi. Diosta alli rijsishpaca cushillami causangui (Hechos 17:26-28). Diospajman cꞌuchuyashpaca shungumantami paita cꞌuyangui. Paipish minishticuj horasmi canta ayudanga (Santiago 4:8). Diosta alli rijsishpaca huiñai causaitapishmi japingui (Juan 17:3, QC, 1989).
¿Diosta rijsingapajca imatataj rurana cangui? Shuj alli amigopi yuyai. ¿Ima shinataj paihuan alli apanacui callarircangui? Puntapica paipaj shutitami yachaj chayashcangui. Qꞌuipaca ima laya cashcata, imata munashcata, imata mana munashcatami yachashcangui. Shinallataj imata rurashcata o imata ruragrishcatami alli yachangui. Chashnami alli amigocuna tucushcanguichij, ¿nachu?
Shuj alli amigota rijsij shinallatajmi Diostapish rijsi tucungui. Chaipajca cai tapuicunapi yuyai:
Cai revistapica chai tapuicunamanta Diospaj Shimi imata nishcatami yachangui. Catij temacunapica Dios ima laya cashcata, paipaj amigo tucushcamanta ima bendicioncunata charinatapishmi yachangui.
