Isaías 60:1 pica: ‘¡Jerusalén cambaj luzmari shamushca, jatariyari, cutin achijyachiyari. Mandaj Diospaj sumaj canamari canpi huacharishca!’ ninmi. Jerusalén o Sionca Judapaj capitalmi carca. Jerusalenca tucui Israel llajtatami ricuchin (Isaías 60:14; 62:​1, 2). Pero ¿Jerusalenca ima horataj, ima shinataj jatarishpa cutin achijyachirca? ¿Isaías 60:​1-pi nishcacunaca cunan punllacunapipishchu pajtaricun? Cunanmi chaita yachashun.

¿Jerusalenca ima horataj, ima shinataj jatarishpa cutin achijyachirca? Judiocunaca 70 huatacunatami Babilonia llajtapi prezu carcacuna. Chai tiempopica Jerusalenpish, Diospaj huasipish tucui urmashcami carca. Pero medocuna, persacuna babiloniocunahuan macanacushpa paicunata mishajpimi Babiloniapi causaj israelitacunaca Jerusalenman cutin tigrana oportunidadta charircacuna. Chaiman chayashpaca paicunaca Jehová Diostami cutin alli adorai callarircacuna (Esdras 1:​1-4). Jesús manaraj huacharijpi huata 537-mantami achca judiocunaca Jerusalenman tigrarcacuna (Isaías 60:4). Paicunaca Jehová Diosmanmi cutin sacrificiocunata cui callarircacuna. Shinallataj cutinmi Jehová Dios mandashca fiestacunata rurai callarircacuna. Diospaj huasitapishmi cutin shayachi callarircacuna (Esdras 3:​1-4, 7-11; 6:​16-22). Chashnami Jehová Diosta alli adoranaca luz shina tucui israelitacunata achijyachi callarirca. Israelitacunapish luz shinami Diosta mana sirvijcunapaj chaupipi achijyachi callarircacuna.

Shinapish Isaías parlashca shimicunaca ñaupa punllacunapica mana tucui pajtarircachu. Casi tucui israelitacunami Jehová Diostaca mana cazurcacuna (Nehemías 13:27; Malaquías 1:​6-8; 2:​13, 14; Mateo 15:​7-9). Qꞌuipacarin israelitacunaca Jesustaca mana chasquircacunachu (Mateo 27:​1, 2). Chai qꞌuipaca huata 70-pica Diospaj enemigocunami Jerusalentapish, Diospaj huasitapish cutin tucuchircacuna.

Jehová Diosca Jerusalenpish, Diospaj huasipish tucuchishca canataca ñami nishcarca (Daniel 9:​24-27). Shinaca Isaías 60-pi tucui nishcacunaca ñaupa Jerusalenpica mana pajtarinachu carca.

¿Isaías parlashca shimicunaca cunan punllacunapipishchu pajtaricun? Ari. Pero ‘jahua pacha Jerusalenpimi’ pajtaricun. ¿Jahua pacha Jerusalenca imatataj ricuchin? Jahua pachapi Jehová Diosta tucui sirvijcunatami ricuchin. Paicunapish Jehová Diospaj organizacionpaj partemi can. Jahua pacha Jerusalenmanta parlashpaca apóstol Pabloca “ñucanchij mamami” can nircami (Gálatas 4:26). Jahua pacha Jerusalenpaj huahuacunaca Jesuspish, 144.000 ungidocunapishmi can. Paicunapurapica apóstol Pablopishmi can. Ungidocunaca “jucha illaj llajta”, “Diospaj Israel llajtami” can (1 Pedro 2:9; Gálatas 6:16).

¿Jahua pacha Jerusalenca ima shinataj jatarishpa cutin achijyachirca? Cai allpapi caj ungidocunata utilizashpami chaitaca rurarca. Isaías 60-pi nishcacuna ungidocunapi ima shina pajtarishcata ricushun.

Tucui apostolcuna huañushca qꞌuipaca millai gentecunami Diosmanta panda yuyaicunata yachachi callarircacuna. Chai punllamantami ungidocunaca amsapi causacushca shina carca. Chaimi paicunaca espiritualmente cutin jatarina carcacuna (Mateo 13:​37-43). Ungidocunaca Babilonia jatun pueblopimi prezu shina carcacuna. Babilonia jatun puebloca tucui panda religioncunatami ricuchin. Paicunaca ‘cai pachapaj ruraicuna tucurina punllacunacamami’ chashna carcacuna. Chai punllacunaca 1914 huatapimi callarirca (Mateo 13:​39, 40). 1919 huatapi Babilonia jatun pueblomanta cacharichishca cashpaca ratomi espiritualmente  achijyachi callarircacuna. ¿Chaitaca ima shinataj rurarcacuna? Paicunaca tucui shunguhuan Diosmanta huillangapajmi esforzarircacuna. a 1919 huatamantaca tucui llajtacunamanta shamuj gentecunami alli huillaicunata yachashpa Jehová Diosman cꞌuchuyashcacuna. Diospaj Israel llajtapaj parte cajcunapishmi chaitaca rurarcacuna. Isaías 60:​3-pi nishca shinaca paicunaca mandajcunapishmi can (Apocalipsis 5:​9, 10).

Shamuj punllacunapica ungidocunaca Diospaj luztaca ashtahuanmi achijyachingacuna. Cai allpapi huañushca qꞌuipaca paicunaca jahua pachaman rishpa mushuj Jerusalenpaj partemi tucungacuna. Mushuj Jerusalenca Jesuspaj novia shinami can. Tucui 144.000 ungidocunami mushuj Jerusalenpaj parte tucungacuna. Paicunaca mandajcuna, sacerdotecunapishmi cangacuna. (Apocalipsis 14:1; 21:​1, 2, 24; 22:​3-5).

Mushuj Jerusalenmi Isaías 60:​1-pi nishcacuna pajtarichun ayudanga (Isaías 60:​1, 3, 5, 11, 19, 20-pi nishcacunataca Apocalipsis 21:​2, 9-11, 22-26-pi nishcacunahuan chꞌimbapurai). Ima shinami ñaupa Jerusalenmanta tucui Israel llajtata mandajcuna carca, ‘mushuj Jerusalenpish’, Jesuspish tucui Diosta sirvijcunatami mandangacuna. Pero ¿chai llajtaca ‘Dios maipi cashcamanta, jahua pachamantaca ima shinataj uriyamunga’? Cai allpapi causajcunata ayudashpami cai allpaman uriyamucushca shina canga. Chai llajtamanta parlashpaca Bibliapica “chai llajtapaj luz achijyachijpimi llajtacunaca puringacuna” ninmi. Chashnami gentecunaca juchamanta, huañuimanta quishpichishca cangacuna (Apocalipsis 21:​3, 4, 24). Chashna tucujpica profeta Isaías, shujtaj profetacunapish huillashca shinami tucui ‘imalla tiyashcacunaca mushujyachishca’ cangacuna (Hechos 3:21). ‘Tucuita mushujyachina tiempocunaca’ Jesús rey tucujpimi callarirca. Shinallataj Jesús 1.000 huatacunata mandashca qꞌuipami chai tiempocunaca tucuringa.