Dibujitupi huahuitát ckáay. Paycka sapallitan y sustuscka ʼricurin, ¿manachu chayna can? ¿Huaquin cutis chayna taricoranquichu?​— Huaquin cutis, nockayshpas chayna taricoráysh. Biblia Jehóvap yanasusninmanta ʼriman, ima sapallan y sustusckas taricorancu. Suj paycunamanta, Elías cara. Paymanta aprendesúysh.

Elías ancha unaypi Israelpi causara, manáraj Jesús huachascka captin. Acab, israel reynin, mana verdaderu Diusta Jehová adóraj cara. Acab y huarmin, Jezabel, llulla diusta Baalta adóraj carancu. Chayna yacka túcuy Israelpa genten Baalta adorayta ckallarerancu. Reina Jezabelcka, ancha piña cara y túcuy gentét ima Jehovát adóraj carancu, huanchicuyta munara, ¡Eliastapas! ¿Ckam yachanquichu, imát Elías ʼruara?​—

¡Elías aickes, caruman ʼrera!, sachaman, y suj cuevapi pacacora. Ckam, ¿imát pensanqui?, ¿imaraycútaj pay chayta  ʼruara?— Ari, pay sustucora. Pero Eliascka, mana sustuscka tianan tiara. ¿Ímaj? Pay yachara, ima Jehová payta yanapayta atera. Jehová na atiyninta Eliasta ckaachera. Suj cutis, Jehová cielumanta ninát cachas, Eliaspa oraciunninta contestapora. Chayraycu, ¡Jehová Eliasta yanapayta atera!

Áicap Elías cuevapi taricora, Jehová payta tapora: ‹Ckam, ¿imát caypi ʼruanqui?› Eliascka contestapora: ‹Nockalla ckamta adorasushcani. Sapallan y sustuscka tiani, nockatapas huanchianancuta.› Eliascka creera, ima túcuy Jehóvap adorajnincuna huanchisckas carancu. Pero Jehová Eliasta nipora: ‹Mana, chaycka mana ciertu can. Canchis huarancka (7000) persunascka taricuncu picuna nockata adoraashcancu. ¡Ama sustucuychu, nocka ʼruanayquípaj astaan llamcayta apini!› Ckam, ¿imát creenqui?, Elías, chayta uyaris, ¿cusiscka tiara?​—

Ckam, Eliasta sucedepusckanmanta, ¿imát aprendeyta atinqui?​— Ckam ni aicapas sapallitan ni sustuscka senticunayqui tían, yanasusta apisckayquiraycu picuna Jehovát munancu y ckamtapas munasuncu. Jehovapas ancha atiyta apin, ¡y pay túcuy punchaus causayniyquimanta, ckamta yanapasuyta atin! ¿Cusiscka tianqui, yachas ima ni aicappas sapallitan tarícoj ʼrinqui?​—