Biblia cutipashca

 Bautisaringaj tucui runa aicha yacu ucui icuchina an. a Bibliai ashca bautisogunamanda riman (Hechos 2:41). Chigunamanda Jesús bautisarishca tian, pai Jordán yacui intiru runa aicha yacu ucui icusha bautisarina aca (Mateo 3:13, 16). Huatauna huasha shu etíope runa yacuma pactaushcai bautisarishca aca (Hechos 8:36-40).

 Jesús yachachica maican paita catij tucuna munasha bautisarina ashcara (Mateo 28:19, 20). Apóstol Pedro shinallara yachachica (1 Pedro 3:21).

Cai temai caita ricushun:

•  Bautisarina ¿imara nisha nin?

•  ¿Biblia yachachinzhu llullu huahuaunara bautisachina ashcara?

•  ¿Imara nisha nin Yaya shutii, Churi shutii, espíritu santu shutii bautisarina?

•  Cuti bautisarina ¿uchachu an?

•  Shuj bautismoguna Bibliai riman

•  Jesusta catij bautisarinamanda panda iyaiguna

 Bautisarina ¿imara nisha nin?

 Tucuiguna ñaupai bautisarina an shu runa paihua uchaunamanda aripintirishcara imas tucujpis Diospa munaira rurasha pactachinara ricuchin. Cai an Diosta, Jesustas casuna tucui ñucanchi causaibi. Bautisarinara punda rurana anun runauna huiñai causaira charingaj.

 Tucui runa aicha yacu ucui icuchina ricuchin paihua causaibi shu atun turcarina rurashcara. Chiraigu, Biblia nin bautisarina shu huañushca pambana cuinta ashcara (Romanos 6:4; Colosenses 2:12). Yacui icushcai shu runa huañushca cuinta an ñaupa causaira saquishcamanda. Shinallara yacumanda llucshishcai mushuj causai callarinara ricuchin Diospajma mingarisha Jesusta catij cuinta.

 ¿Biblia yachachinzhu llullu huahuaunara bautisachina ashcara?

 Biblia mana yachachin llullu huahuaunara bautisachina ashcara. b Maspas yachachin manara bautisarishcallaira huaquin cosasguna rurana ashcara. Callaringaj, Biblia ali yachachishcara intindina anchi shinallara chibi yachashca cuinta causana anchi. Astaun uchaunamanda aripintirina anchi, shu oracionda Diospajma mingarinaras (Hechos 2:38, 41; 8:12). Llullu huahuauna, ichilla huahuaunas cai cosasgunara, mana rurana ushanun.

 ¿Imara nisha nin Yaya shutii, Churi shutii, espíritu santu shutii bautisarina?

 Jesús paita catijcunara mandaca: ‘Runaunara yachachichi [...]. Bautisaichi Yaya shutii, Churi shutii, santu ispíritu shutiis. Paigunara yachachichi tucui ñuca cangunara mandashcaunara huacachingaj’ (Mateo 28:19, 20). Paihua shutii bautisarina nisha nin bautisarij runa Yaya, Churis mandana dirichu charishcara ricsin shinallara espíritu santu ima rurashcaras. Apóstol Pedro pagarishcamanda anga chaqui runara alichingaraushcai cai shimira nica: “¡Nazaretmanda Jesucristo shutii canda nini: Atari, puri!” (Hechos 3:6). ¿Imarasha cai shimira utilizaca? Pai rurangaraushca milagro Jesucristo mandanara chasquishcamanda ricsishcamandas aca.

•   Yayamanda rimasha Jehová c Diosmi. Pai ñucanchira rurarca, causaira cuca, Tucuira Ushaj an. Jehová tucui mandanara charin (Génesis 17:1; Apocalipsis 4:11).

•   Churimanda rimasha Jesucristomi, pai paihua causaira ñucanchimanda cuca (Romanos 6:23). Quishpiringaj Diospa munai cai allpai pactarichu Jesús rurashcara ali intindina an (Juan 14:6; 20:31; Hechos 4:8-12).

•   Espíritu santumanda rimasha Diospa ursami. d Dios paihua espiritura utilizaca rurangaj, causaira cungaj, paihua profetagunahua, shuj runaunahuas cuintaringaj, paihua munaira rurangaj ursara cungaj (Génesis 1:2; Job 33:4; Romanos 15:18, 19). Jehová paihua iyaigunahua huaquin runaunara cuca Bibliais quillcanuchu (2 Pedro 1:21).

 Cuti bautisarina ¿uchachu an?

 Ashca runauna paiguna religionda turcanun. Shinajpi ¿maican ña bautisarisha shu uchara ruraunzhu shu religiombi cuti bautisarisha? Huaquinguna Efesios 4:5 rimashca cuinta ninun: ‘Shu Señorlla tian, shu quirina, shu bautisana’. Chiraigu, cuti bautisarina shu uchami ninun. Astaumbas cai versículo mana nisha nin shu runa cutillara bautisarina mana ushan. ¿Imasnara caita yachanchi?

 Versiculogunara intindichingaj. Efesios 4:5 ñaupalla huasha textoguna intindichin apóstol Pablo intindichin tucuiguna gunlla ana valishca ashcara. Jesusta catijcuna chi tunu quirinallara charina ashcara (Efesios 4:1-3, 16). Chi gunlla anara ricuchinchi shu Diosllara adurasha, shu quirinallara charisha shinallara Bibliamanda yachachinaras, chi tunu intindinallara charishas bautisaringaj Bibliamanda tucui pactachinaras.

 Shuj cuti, apóstol Pablo ña bautisarishcaunara animaca cuti bautisaringaj. Cai runauna ña bautisarishca anuca Bibliamanda yachachishcaunara manali intindisha (Hechos 19:1-5).

 Ima tunu bautisarinara chasquin. Dios maican bautisarishcara chasquingaj runa Biblia yachachishcara ali intindina an (1 Timoteo 2:3, 4). Shu runa bautisarijpi panda religionguna yachachishcara catisha, Yaya Dios chi bautisarishcara mana chasquin (Juan 4:23, 24). Chi runa intiru shunguhua rurashas shinajpi pai ajllashcara ‘manali yachanahua’ rurarca (Romanos 10:2). Yaya Dios ñucanchi bautisarishcara chasquingaj Bibliamanda sirtu shimira ali yachana anchi. Yachashcara ñucanchi causaibi pactachina Diospa ñaupajpi mingarina cutillara bautisarinas. Shina rurajpi paihua cuti bautisarina mana shu ucha an. Astaumbas, ali an.

 Shuj bautismoguna Bibliai riman

 Biblia shuj tunu bautismomanda riman, Jesusta catijcuna runaunara yacu ucuma icuchij anuca. Cuna shuj bautisarinamanda ricushun:

 Bautisaj Juan rurashca bautismo. e Shu judío, judaísmo tucuna munasha Juanma rina aca bautisaringaj Moisesta cushca leyhua cuntra rishcamanda paiguna uchaunamanda aripintirina aca (Dios cai Leyra cuca israelitagunara Moisesta utilizasha). Juan rurashca bautismo runara puruntuchica Nazaretmanda Jesús Mesías ashcara chasquingaj (Lucas 1:13-17; 3:2, 3; Hechos 19:4).

 Jesús bautisarishca. Bautisaj Juan Jesusta bautisaca, shinajpi cai bautismo shujcunamanda shuj tunu aca. ¿Imarasha? Jesús ucha illaj runa aca, ucharas mana rurarcachu (1 Pedro 2:21, 22). Pai mana bautisaricachu aripintirina ashcamanda, ali rana iyaira mañanamandas (1 Pedro 3:21). Astaumbas, bautisarisha Diospa ñaupai ricurica paihua munaira rurangaj Mesías o Cristo cuinta. Cai aca ñucanchimanda huañuna (Hebreos 10:7-10).

 Espíritu santuhua bautisarina. Bautisaj Juan, Jesucristos espíritu santuhua bautisarinamanda rimanuca (Mateo 3:11; Lucas 3:16; Hechos 1:1-5). Cai bautismo espíritu santu shutii bautisarishca cuintallara mana an (Mateo 28:19). ¿Imarasha?

 Jesusta ansalla catijcunalla espíritu santuhua bautisarishca anun. Cai catijcuna ahua pachama risha cai allpara reyguna sacerdote cuinta Jesushua mandanuchu espíritu santuhua ajllashca anun f (1 Pedro 1:3, 4; Apocalipsis 5:9, 10). ¿Pigunara mandanunga? Huaranga huaranga Jesusta catijcuna cai allpa shu paraíso tucushcai huiñai causangaj chapana charijcunaj (Mateo 5:5; Lucas 23:43).

 Cristo Jesuspi bautisarina paihua huañuibis bautisarina. Espíritu santuhua bautisarishcauna ‘Cristo Jesuspi bautisarishcauna’ anun (Romanos 6:3). Chiraigu Jesushua ahua pachai mandangaj ajllashcauna cai bautismora chasquinun. Cristo Jesuspi bautisarishca asha paihua congregacionmanda parti anun, pai uma an shinallara paiguna paihua aicha anun (1 Corintios 12:12, 13, 27; Colosenses 1:18).

 Jesusta catij ajllashcauna ‘paihua huañuibi bautisarishcaunas’ anun (Romanos 6:3, 4). Jesús cuinta paiguna causaibi ashca sacrificioguna ruranun shinallara Diosta casunaras cai allpai huiñai causanaras saquinun. Cai bautismo huañushcai ahua pachai espíritu sami aichai causangaj causachishcai pactarin (Romanos 6:5; 1 Corintios 15:42-44).

 Ninahua bautisarina. Bautisaj Juan nica: ‘[Jesús] santu ispirituis ninais bautisangami [...]. Paihua maquii huairachinara chariun; llushtina pambara pichangami, trigu muyura apingami huacachina huasii, carara rupachingami mana tucurina ninai.’ (Mateo 3:11, 12). Cai shimiuna ricuchin ninahua bautisarina, espíritu santuhua bautisarinas shuj tunu ashcara. Juan utilizashca ejemplo ¿imara nisha nin?

 Trigo muyu ricuchin Jesusta uyajcunara casujcunaras. Paiguna espíritu santuhua bautisarina ushanun. Cara ricuchin Jesusta mana uyajcunara. Paiguna ninahua bautisarinara chasquinun, chi bautisarina huiñaigama tucuchinara ricuchin (Mateo 3:7-12; Lucas 3:16, 17).