Mana. Mana tucui religionguna parijulla anun. Biblia ricuchin maican religionguna Yaya Diosta mana ali aduranuca. Cai religionguna cai ishqui panda adurana yachaiguna catinun.

Punda adurana yachai: Yanga diosgunara aduranun

 Biblia ricuchin yanga diosgunara adurana mana imajpas valin (Jeremías 10:3-5; 16:19, 20). Jehová a israelita runaunara nica: “Ama charichu shuj diosgunara ñuca randimanda” (Éxodo 20:3, 23; 23:24). Israelita runauna yanga diosgunara aduranujpi “Jehová piñarica” (Números 25:3; Levítico 20:2; Jueces 2:13, 14).

 Cuna shinallara Yaya Dios mana munanzhu ñucanchi ‘yanga dios nishcaunara’ adurachu (1 Corintios 8:5, 6; Gálatas 4:8). Paita ali adurangaj munajcunara, Yaya Dios mandan yanga religiongunara saquinuchu. Paigunara nin: “Llucshichi paiguna chaupi shungumanda, paigunamanda anzhurichi” (2 Corintios 6:14-17). Caita iyarishun, tucui religionguna Diosta ali adurajpi, Yaya Dios mana cai mandashcara cunmachu aca.

Ishqui adurana yachai: Mana Dios munashca cuinta aduranun

 Israelita runauna chuyaj aduranara yanga diosguna aduranahua masaringaj callarinujpi Jehová mana chasquicachu (Éxodo 32:8; Deuteronomio 12:2-4). Jesús allpai asha panda religiongunamanda pushajcuna imasna Diosta sirviushcara ricusha shinzhira rimaca. Paiguna rurashcaunahua ricuchinuca Biblia yachachinara mana pactachijcuna ashcara, chiraigu Jesús paigunara nica “ley shimimanda atun ranaunara saquinguichimi: alirana, llaquina, quirina” (Mateo 23:23).

 Cuna punzhaunai, ali religión Diospajma mayanllayangaj yanapan, cai religión Bibliamanda sirtu yachachinara catin (Juan 4:24; 17:17; 2 Timoteo 3:16, 17). Bibliamanda mana tiashca yachachishcaunara yachachij religionguna runaunara Yaya Diosmanda caruyachinun. Ashca runauna quirinun shujllai quinsa dios tiashcara, huañushca huasha causasha catishcara, ucu pachai rupachishcaras, cai quirishcauna mana Bibliamandachu anun. Cai panda quirishcauna catij religiongunara Yaya Dios mana chasquin Biblia yachachinara runa mandashcaunahua turcachishcamanda (Marcos 7:7, 8).

 Astaumbas Dios Bibliamanda yachachishcara mana casusha aduranara chijninmi (Tito 1:16). Shu religión Diospajma mayanllayamungaj yanapachu ñucanchi causaibi yanapana an, mana adurangaj runa mandashcaunara catisha. Biblia nin: “Maican runas cangunamanda, “Diospi quirij ani,” nisha iyashallara, shina ajllaira paihua callura mana arcajpi, paillara umachiun, pai Diospi quirishca mana valinzhu. Dios Yaya ñaupajpi ali sirtu quirina, mana imas huajlishcahua casnami: huaccha huahuaunajpi huaccha huarmiunajpis pasiai rinami paiguna llaquiriushcais, shinallara duiñura mundumanda ima huajlinamandas huacachingaj” (Santiago 1:26, 27). Chuyaj, sirtu aduranamanda rimasha, La Palabra de Dios para Todos nishca Bibliai cai textoi nin “chuyaj religión”.