9 TAPUI
¿Evolución yachachishcai quirina ani?
CAN ¿IMARA RURANGUIMA?
Cai tucushcai iyari: Alex ña mana yachanzhu ima iyanara. Tucui timpu quirishca Dios tucuira rurashcara. Shinajpi cuna paihua profesor Biologiamanda riman cientificoguna sirturami rimanun evolucionmanda nisha. Alex upa cuinta mana sintirina munan, pai iyarin: “Cientificoguna rimanujpi cai evolución sirtu an ¿imarasha ñuca mana quirishachu?”.
Can Alex asha, ¿quiringuimachu evoluciombi librogunalla sirtu ashcara yachachishcamanda?
IYARI
Huaquin runauna mana ishqui cuti iyarisha evoluciombi o Dios rurashcai quirinun, shinajpi mana intindichina ushanun imarasha chibi quirishcara.
-
Maicanguna Dios tucui rurashcara quirinun iglesiai yachachishcamandalla.
-
Shujcuna evoluciombi quirinun paiguna escuelai yachashcamandalla.
SUCTA TAPUIGUNA CAN RURANA ANGUI
Biblia ninmi: “Tucui huasi shu runa rashcami, astaun tucuira raj Diosmi” (Hebreos 3:4). ¿Quirinallachu an Biblia rimashcara?
Shu Ruraj mana tianzhu nisha yanga rimarin imasna cai huasi paillami rurarishca nishca cuinta.
IYANA: Tucui cai Allpai tiaj tucuca shu atun tujyashca tiashcamanda Big Bang nishca.
1. ¿Ima o pita Big Bang rurarca?
2. ¿Ima mas quirinalla an: iyarina tucui cungaimanda llucshica, manasha shuj tucui rurashca?
IYANA: Runauna animalgunamanda shamunchi.
3. Shu ejemplo churasha runauna animalgunamanda monomanda shamusha ¿imarasha ñucanchi yapa iyaiyuj anchi paigunamanda?
4. ¿Imarasha “ichillauna” causaiguna yapa sumajta rurashca anun?
IYANA: Evolución yachachina sirtu an.
5. ¿Caibi quirijcuna paigunallara informacionda mascanushca caimanda?
6. ¿Masna runauna evoluciombi quirinun tucui iyaiyuj runauna chibi quirinun nisha uyashcamandalla?
“Iyari sachara purisha riushcai tupangui shu sumaj huasira taulamanda, chibi mana iyaringuichu: ‘¡Sumaj casna ricuni! Caibi yurauna urmana anuca caibi huasira ruranushca’. Mana, chi mana sirtuchu. Shina ajpi ¿imarasha quirina anchi cai tucui tiashcauna cungaimanda ricurica?” (Julia).
“Maicans canda rimajpi shu librogunara rurashca puistui shu tujyana tiashca, chibi tinta nishca talirishca tucui partii chimanda shu diccionario rurarishca ¿canga quiringuichu?” (Adriana).
¿IMARASHA YAYA DIOSPI QUIRINI?
Biblia rimanmi camba sabiru umara utilizachu (Romanos 12:1). Cai ricuchin camba Diospi quirina mana ana anzhu caimandalla:
-
SINTIRINAMANDALLA: “Ñuca sintirini tiana anga shu mas yali ushayuj”.
-
SHUJCUNA QUIRISHCAMANDA: “Ñuca rayai tiajcuna Diospi quirinun”.
-
MAICAN CANDA QUIRICHU NIJ: “Ñuca yayauna iñachihuanuca Diospi quiringaj, mana ajllana ushani”.
Chi randimanda, yachanami angui imarasha quiringui.
“Profesor escuelai yachachiujpi imasna runa aicha tarbaun, ñuca mas quirini Dios tiashcara. Caran parti ñucanchi aichai ichillaunas paiguna quiquin tarbanara charinun, huaquimbi mana riparanchichu chi pasashcamanda ñucanchi aicha ucui. ¡Cai sumaj ricurin!” (Teresa).
“Ñuca shu atun huasira, shu barcura, shu autura ricusha tapurini: ‘¿Pita rurashcanga nisha?’. Shu ejemplo churasha, ministirin maican iyaiyuj runa shu autu rurangaj imasna charin ashca ichilla piezagunara tucui partiuna icuna an alira cuyuringaj. Shina ajpi cai autu shu ruraj charinmi, shinallara runauna” (Richard).
“Cienciamanda mas yachausha, ansara quirina ricurica evoluciombi. [...] Iyarini pishinmi nisha mas fe evoluciombi quiringaj shu Ruraj tiashcara quirina randimanda” (Anthony).
CAIBI IYARI
Cientificoguna ashca timpu mascasha catinujpis chara ashca tunu iyarinara charinun cai evolucionmanda. Paigunallara mana pactanun shujlla iyaira charingaj cai temamanda, paiguna mas yachajcuna ajpis ¿alichu anga cai teoriaguna quiringajlla?
