Cai tucushcai iyari: miércoles chishi punzha an. Carlos 17 huatayuj, ña tucuchishca pai tarbana ruranaunara, ¡cuna samana huras an! Televisionda sindichisha pai tiarina gustashcai tian.

Shinajpi, paihua yaya pungüi piñarishca ricurin.

Can Carlos asha, ¿imara ruranguima chi tunura mana rurangaj?

Shu autu manejasha riushcai, ñambi tapashcara tupasha, shuj ñambira mascangui. Shinallara camba yayaunahua rimangaj shuj tunuunara mascana ushangui.

 SHU EJEMPLO RICUSHUN:

“Ñuca yayahua cuintaringaj shinzhimi —Mayra riman​—. Huaquimbi ashca rimashca huasha pai tapun: ‘Quishpichihuai, ¿imara rimahuacangui?’”.

MAYRA QUINSA RURANA CHARIN

1. Paihua yayara caparina.

   Mayra caparisha nin: “¡Uyahuai! ¡Valijmi an!”.

2. Rimanara saquin.

   Mayra paihua yayahua problemamanda rimanara saquin.

3. Shuj huraspi rimangaj mascana.

   Mayra paihua yayahua mas chishii riman, shu cartara quillcan problemara intindichisha.

¿Ima ruraiguna Mayrara camachinguima?

CAIBI IYARI: Mayra yaya shuj cosasgunai iyariun shinallara mana imas riparashca. Mayra A nishca rurana ajllasha caparisha, paihua yaya mana intindinga imarasha shina ruran. Mayra yaya uyanara mana munangachari, shinallara paihua yayara respetura llaquinara mana ricuchinga (Efesios 6:​2). Cai rurana mana alichu paigunaj.

B nishca rurana mas ahualla an, shinajpi mana valin. ¿Imarasha? Paihua problemaguna alichina munashaga, Mayra paihua yayahua rimana an. Pai yachana ministin ima pasaushcara yanapangaj. Chunllayana mana imas apamun.

C nishca rurana ajllasha Mayra mana saquin shu arcai paihua yayahua cuintanara tucuchichu. Astaun shuj huraspi chi temamanda rimangaj mascan. Shu cartara paihua yayara quillcangaj ajllashaga mas ali sintiringachari.

Shu cartara quillcana yanapana ushan ali intindichingaj ima rimana munashcara. Mayra yaya leashcai ali intindinga ima pasashcara. C nishca rurana Mayra paihua yayaras ali an. Pariju ñahuipura rimashas o shu cartara quillcashas, cai parti Bibliamanda camachishcahua pariju catin “imaras ganas shungura cusha” (Romanos 14:19).

Mayra ¿imara mas rurana ushan?

Shuj ruranai iyari. Shinallara iyai imara tucuna ushan.

Iyari: Maicambi can rimashcaunara camba yayauna mana intindinunga.

SHU EJEMPLORA RICUSHUN:

Camba yayauna tapunun imarasha piñarishca angui. Can cutipangui: “Chimanda mana rimana munani”.

Paiguna intindina ushanunga: “Ñuca yayaunai ña mana yapa quirini. Ñuca amigogunallahua ñuca problemagunamanda rimasha”.

Iyari shu shinzhi problema pasausha, camba yaya o mama yanapana munan, shinajpi can ningui: “Ama llaquirichu, ñucalla alichina ushani”.

• Camba yayauna ¿imara intindinunga?

• ¿Maicanda ali cutipai anga?