Manara huañushcallaira Jesús nica: “Cai Dios mandana pacha evangelio ali shimi intiru mundui camachishca anga, tucui llactaunara ricuchingaj. Chi huasha tucurina huras pactamunga” (Mateo 24:14). Cai shimiunaga ¿imasnara pactarinma? Imasnami Jesús cai Allpai tiaushcai yachachishca cuinta, shinallara yachachijpi pactarinmi (Lucas 8:1).

Tucui runaunara paiguna huasiunai yachachinchi. Jesús paita catijcunara yachachicami huasii huasii risha rimangahua (Mateo 10:11-13; Rashcauna [Hechos] 5:42; 20:20). Ñaupa punda Jesusta catijcuna maibillara yachachingaj charinuca (Mateo 10:5, 6; 2 Corintios 10:13). Shinallara cunan timpui caran tandarijcunara maillaira yachachingahua charinchi. Jesusga tucui tunu ‘runaunara yachachingaj mandacami’, chiraigu tucui runaunara yachachinchi (Rashcauna [Hechos] 10:42).

Runauna maibi tiajpis yachachingahua pactanchi. Jesusllara lamar patai, yacu llucshiushca uctu mayambis, maibis yachachinara ricuchicami (Marcos 4:1; Juan 4:5-15). Ñucanchi shinallara Bibliamanda maibis yachachinchi: ñambiunais, catuushcaunais, parqueunais rimanchi, maican huras telefonohua cayashas yachachinchi. Astaumbas usharijpi rimanchi ñucanchi mayambi causajcunaras, trabajomanda compañerogunaras, escuelamanda compañerogunaras, ailluunaras, maicangunaras Bibliamanda rimanchi. Shina rajpi intiru mundui huaranga huaranga runauna ‘quishpichina ali shimira’ uyanushca (Efesios 1:13).

Canga ¿pitara Diospa Mandanamanda rimangaj munangui? Cambajllai Diospa Mandanamanda yachashcaunara ama huacachinguichu. Randi maicandas ricusha uctalla yachachingui.

• ¿Ima ‘ali shimiunara’ yachachina anchi?

• Jehovahuaj testigogunaga ¿ima rashara Jesús yachachishca cuinta ruranchi?