PUNTO 5
Yaya Dios cai Allpara ¿imara rurangaraun?
1. Diosga ¿ima rurangahuara Allpara rurashca?
Jehová Dios Allpara rurashca, runauna chibi causanuchu. Adanda, Evaras mana rurarcachu ahua pachai causangaj. Randi angelgunarami ahua pachai causanuchu Yaya Dios rurashca (Job 38:4, 7). Ñaupa punda carira, huarmiras jardín de Edén nishca gustu pambai causanuchu saquica (Génesis 2:15-17). Yaya Dios munacami, Adán, shinallara paihua miraigunas cai Allpai huiñai huiñaigama cushi causanuchu. Leapai Rashcauna (Hechos) 17:26; 1 Juan 2:17.
Jardín de Edén ali gustu pamba ansahualla aca. Chiraigu intiru Allpa paraíso tucungahua, Adán paihua huarmihua huahuaunara charisha ansa ansa yaparina anuca (Génesis 1:28). Cai Allpaga mana ima huras tucuringachu. Runauna cai Allpai huiñai huiñaigama causangaranun. Leapai Salmo 104:5.
Yaya Diosga ¿ima rurangahuara Allpara rurashca? nishca video ricui.
2. Allpaga ¿imarasha mana paraíso an?
Diospa Shimi nishca cuinta, manali runauna cai Allpai undarishca (Job 9:24). ¿Imarasha? Ñaupa punda cari, ñaupa punda huarmi Diosta mana casushcamandami, Yaya Diosga jardín de Edenmanda paigunara llucchica. Chi jardín chingarijpimi intiru Allpa mana paraíso tucuca. Leapai Génesis 3:23, 24.
Shinajpi, runaunama ali gustu causana cuyanara, ¿Jehová Dios cungarishcachu? Mana, paiga mana cungarishcachu. Ushaj Dios ashcamanda pai rimashcara tucui pactachingami (Isaías 45:18). Yaya Dios ñalla runaunama ali gustu paraisora cungaraun. Leapai Mateo 5:5.
3. ¿Imasnara paraíso tucunga cai Allpa?
Jesusmi cai Allpara alichingaraun paraíso tucuchu. Cai Allpa gustu paraíso tucungahua, Armagedón guerrai Jesús, paihua angelgunandi Diosta mana casujcunara tucuchinga. Chi huasha pundamandallara umachij Supai Satanasta Jesusga huaranga huata ishcanga. Diosta tucui shunguhua casujcuna tucuchina punzhai quishpirinunga. Jesusga quishpichishca runaunara huiñai causaira cungaraun. Leapai Ricuchina (Apocalipsis) 20:1-3; 21:3, 4.
4. Turmindusguna, nanaigunas ¿ima hurara tucuringa?
Yaya Diosga turmindusgunara ¿ima hurara tucuchinga? Jesús rimacami, runauna causai ashca turmindusguna shamujpi yachanguichimi, último punzhaunai causaushcara. Ashca turmindus ricuriujta ricushaga, último punzhaunai ña causaushcara yachanchi. Leapai Mateo 24:3, 7-14, 21, 22.
Jesusga huaranga huata cai Allpara ahua pachamanda mandaushcai nanai, turmindus tucuringaraun (Isaías 9:6, 7; 11:9). Diosta llaquij runaunara Jesús yanapanga ucha illaj tucunuchu. Shinajpimi Jehová Diosga Jesusta mandasha saquishca ungüira, rucuyanaras, huañuiras tucuchingaj. Leapai Isaías 33:24; 1 Corintios 15:26.
5. Paraíso Allpai ¿pigunara causanunga?
Reinomanda Yachana Huasii, Yaya Diosta llaquij runaunara ricsinguimi
Yaya Diosta casujcunami paraíso Allpai ali causanunga (1 Juan 2:17). Jesús paita catijcunara mandaca, ali shungu charijcunara mascasha Diosmanda yachachinuchu. Jehová Dios huaranga huaranga runaunara puruntuchiun, paraíso Allpai causangaj (1 Timoteo 2:4). Jehovahuaj testigoguna Reinomanda Yachana Huasii tandariuj ailluuna Jehová Diosta parijulla aduranun. Chi yachana huasima riuj yayauna, mamaunas mas ali causangahua Diospa Shimira yachanun. Leapai Miqueas 4:1-4.
