Bibliai yapa valij camachishcaunara tupana ushanchi. Caran punzha leana, leashcara iyarina anchi chi camachishcaunara imasna ñucanchi causaibi pactachina ushashcara yachangaj. Chita rurasha cushi causai charishun (Josué 1:8; Salmo 1:1-3). Astaumbas Yaya Diosta, paihua Churiras alira ricsishun, paigunara ricsishcamanda quishpirina ushashun (Juan 17:3).

¿Imasnara Bibliara leana ushanchi? Ashca tunuuna tian. Shinajpi cai Bibliara leana programara ricusha can munashca libromanda, temamanda leangaj callarina ushangui. Por ejemplo, maican Bibliamanda partiunara leasha yachana ushangui imasna ashca huataunamanda Yaya Dios israelita runaunara ali cuiraca. Shinallara shuj partiunara leasha yachangui punda sigloi Jesusta catij congregación imasna tiai callarica, imasna mirasha catica. Caran punzha huaquin capitulogunara leashaga, shu huatai intiru Bibliara leana ushangui.

Caran punzha Bibliara leangaj, shu huatai leana tucuchingaj o leana callaringaj munasha cai yanapaira ministingui. Cai Bibliara leana programara copia llucchisha cunalla leangaj callari.