¿Imatam bibliaqa yachachin?

 Pipas bautizakuqqa yakumanmi enteron cuerpontin chinkaykachisqa kanan. a Bibliam willakun achka bautizakuqkunamanta (Hechos 2:41). Huknin bautizakuqmi karqa Jesus, payqa Jordan mayupim enteron cuerpontin yakuman chinkaykachisqa karqa (Mateo 3:13, 16). Jesus hinam Etiopia nacionniyuq runapas “yakupa kasqanman” chayaruspan bautizasqa karqa, chay yakuqa karqa viajasqan ñanpa waqtallanpim (Hechos 8:36-40).

 Jesusmi yachachirqa pipas qatiqnin kayta munaspanqa bautizakunanpaq (Mateo 28:19, 20). Apostol Pedropas chaytam nirqa (1 Pedro 3:21).

Kaypim yachasunchik kaykunamanta:

•  ¿Imapaqtaq bautizakunchik?

•  ¿Biblia ninchu wawakunata bautizaymanta?

•  ¿Ima ninantaq taytapa, churipa hinaspa chuya espiritupa sutinpi bautizakuyqa?

•  ¿Huchachu kaqmanta bautizakuy?

•  ¿Imayna bautismokunamantawantaq bibliaqa nin?

•  Bautizakuymanta pantayta yachachisqanku

 ¿Imapaqtaq bautizakunchik?

 Bautizakuyqa huchanchikmanta wanakuspa imaña kaptinpas Diospa munayninta ruwanapaq runakunapa qayllanpi yakuman chinkaykachisqa kaymi. Chayqa tukuy imapi Jehova Diostawan Jesusta kasukuymi. Pipas wiñaypaq kawsakuyta munaspanqa puntatam bautizakunan.

 Yakuman chinkaykuyqa tupan ñawpaq vidanta saqisqanwanmi. Chaychá bibliaqa bautizakuyta tupachin pampakuywan (Romanos 6:4; Colosenses 2:12). Pipas bautizakuspan yakuman chinkaykuspanqa wañukuq hinam. ¿Imanasqam chaynata ninchik? Ñawpaq vidanta saqisqanraykum. Yaku ukumanta lluqsiramuspanñataqmi kawsarimuchkaq hina Diosllapaqña kawsakuyta qallaykun.

 ¿Biblia ninchu wawakunata bautizaymanta?

 Bibliapiqa manam ninchu wawakunata bautizaymantaqa. b Bibliapiqa ninmi manaraq bautizakuchkaspa imakunata ruwanamanta.

 Manaraq bautizakuchkaspam bibliapa nisqankunata imam kaqta yachana, hinaspam chay yachasqanchikman hina kawsakuna. Chaymantapas, huchanchikkunamantam wanakuna, hinaspapas Diosllapaqña kawsakunanchikpaqmi mañakuna (Hechos 2:38, 41; 8:12). Wawakunaqa utaq taksa warmachakunaqa manam chaykuna ruwaytaqa atinkuraqchu.

 ¿Ima ninantaq taytapa, churipa hinaspa chuya espiritupa sutinpi bautizakuyqa?

 Jesusmi qatiqninkunata kamachirqa: “Rispayá yachachimuychik qatiqniykunaña kanankupaq, hinaspayá bautizamuychik hanaq pacha taytapa, churipa hinaspa chuya espiritupa sutinpi. Yachachimuychikyá tukuy ima kamachisqaykunata kasukunankupaq”, nispa (Mateo 28:19, 20). Sutinpi bautizakuy ninanqa taytapa hinaspa churipa mayna autoridadniyuq kasqanta entiendeymi, entiendenataqmi chuya espiritu ima kasqantapas. Apostol Pedrom nacesqanmanta wistu runata hampinanpaq nirqa ‘sutinpiyá’ nispan. Kaynatam nirqa: “¡Nazaretmanta kaq Jesucristopa sutinpiyá puriy!”, nispa (Hechos 3:6). ¿Imanasqataq chaynata nirqa? Jesuspa atiyninwan chay ruway atinanta riqsikusqanraykum hinaspa Jesus hatunchasqa kananpaqmi.

•   ‘Tayta’ nispanqa rimachkan Jehova c Diosmantam. Paymi unanchawaqninchik, vidata quwaqninchik hinaspa tukuy atiyniyuq Dios. Chaymi Jehova Dioslla kamachiwaqninchikqa (Genesis 17:1; Apocalipsis 4:11).

•   ‘Churi’ nispanqa rimachkan Jesucristomantam, paymi ñuqanchikrayku vidanta qurqa (Romanos 6:23). Salvakunanchikpaqqa allintam entiendenanchik runakunapaq Diospa munaynin cumplikunanpaq Jesus ima ruwayniyuq kasqanta (Juan 14:6; 20:31; Hechos 4:8-12).

•   ‘Chuya espiritu’ nispañataqmi rimachkan Diospa atiyninmanta utaq kallpanmanta. d Diosqa espiritunwanmi tukuy imata unancharqa, vidata qurqa, paymanta willakuqkunawan hinaspa huk runakunawan rimarqa hinaspa atiyninta qurqa munaynin ruwakunanpaq (Genesis 1:2; Job 33:4; Romanos 15:18, 19). Chaymantapas, espiritunwanmi Diosqa piensasqankunata runakunawan palabranpi qillqachirqa (2 Pedro 1:21).

 ¿Huchachu kaqmanta bautizakuy?

 Runakunaqa tiempopa risqanman hinam huk religionman cambiakunku. Chayrayku, pipas bautizasqaña kaspanqa, ¿huchatachu ruwachkanman huk religionpi kaqmanta bautizakuspanqa? Wakinkuqa hucha kasqantam ninku. Ichapas chaynataqa ninku Efesios 4:5 nisqanta allinta mana entiendesqankurayku. Chay textopim nin: “Chullallam señorpas, chullallam chiqap yachachikuypas, bautismopas”, nispa. Chaywanpas kay textoqa manam ninchu kaqmanta mana bautizakunamantaqa. ¿Imaynatam chayta yachanchik?

 ¿Imamanta rimaspantaq apostol Pabloqa chaynata nirqa? Pabloqa huk sunqulla kay imamantapas aswan allin kasqanmanta rimaspanmi Efesios 4:5 nisqantaqa rimarqa. Diosta serviqkunaqa llapallankum iguallata creenanku (Efesios 4:1-3, 16). Huk sunqullaqa kanku huk Diosllata yupaychaspankum, bibliamanta iguallata entiendespankum hinaspa bautizakuyman chayanankupaq bibliapa nisqanta llapanku kasukuspankum.

 Huk kutipim apostol Pablo bautizasqa kaqkunata kallpancharqa kaqmanta bautizakunankupaq. Chaynataqa nirqa bibliamanta imam kaqta manaraq yachachkaspa bautizakusqankuraykum (Hechos 19:1-5).

 ¿Imata yachaspa bautizakuytaq valen? Pipapas bautizakusqanta Dios chaskinanpaqqa bibliamantam imam kaqta yachanan (1 Timoteo 2:3, 4). Bibliapa mana nisqan yachachikuykunawan pipapas bautizakusqantaqa manam Diosqa chaskinchu (Juan 4:23, 24). Yaqapaschá bautizakurqaqa tukuy sunqunwan Diosta kuyasqanrayku, ichaqa ‘manam imam kaqta Diosmanta’ yachasqanraykuchu (Romanos 10:2). Bautizakusqanta Dios chaskinanpaqqa bibliamantam imam kaqta yachanan, yachasqanman hinam kawsakunan, Diosllapaqña kawsakunanpaqmi mañakunan, hinaspam kaqmanta bautizakunan. Chayraykum kaqmanta bautizakusqanqa mana huchachu, aswanqa Diospa munasqanman hinam.

 ¿Imayna bautismokunamantawantaq bibliaqa nin?

 Bibliapiqa willawanchiktaqmi Jesuspa qatiqninkuna enteron cuerponta yakuman chinkaykachispa bautizasqankumanta huk clase bautismokunamantapas. Wakinmi kaykuna:

 Bautizaq Juanpa bautizasqanmanta. e Judiokunapas utaq paykunapa religionninman yaykukuq pi runapas Juan bautizananpaqqa riq Moisespa chaskisqan leypa contranpi huchallikusqanmanta wanakusqanraykum. Juanpa bautizasqanmi runakunata yanapaq Nazaretmanta kaq Jesusta utaq Mesiasta riqsinankupaq hinaspa paypi creenankupaq (Lucas 1:13-17; 3:2, 3; Hechos 19:4).

 Jesuspa bautizakusqanmanta. Bautizaq Juanmi Jesusta bautizarqa, ichaqa manam wakin runapa bautizakusqanwanqa tuparqachu. ¿Imanasqa? Jesusqa mana pantaq kasqanraykum mana huchayuq karqa (1 Pedro 2:21, 22). Payqa bautizakurqa manam huchanmanta wanakunanpaqchu utaq ‘allin concienciayuq kananpaqchu’ (1 Pedro 3:21). Bautizakuspanmi Diosman presentakurqa Mesias utaq Cristo kaspan Diospa munayninta ruwananpaq. Chayraykum vidantapas ñuqanchikrayku qunan karqa (Hebreos 10:7-10).

 Chuya espirituwan bautizakuymanta. Bautizaq Juanpas chaynataq Jesuspas chuya espirituwan bautizasqa kaymantam rimarqaku (Mateo 3:11; Lucas 3:16; Hechos 1:1-5). Chay bautismoqa manam iguallachu chuya espiritupa sutinpi bautizakuywanqa (Mateo 28:19). ¿Imanasqa?

 Jesuspa qatiqninkunamanta asllam chuya espirituwan bautizasqaqa kanku. Paykunam chuya espirituwan akllasqa kanku hanaq pachaman rispanku Jesuswan kuska reykuna hinaspa sacerdotekuna kaspa kay pachata kamachimunankupaq f (1 Pedro 1:3, 4; Apocalipsis 5:9, 10). ¿Pikunatataq kamachimunqaku? Kay allpa pacha sumaq huerta kaptin wiñaypaq kawsakuyta suyaq millonnintin Jesuspa qatiqninkunatam (Mateo 5:5; Lucas 23:43).

 Jesucristopi bautizakuymanta hinaspa wañukusqanpi bautizakuymanta. Pipas chuya espirituwan bautizasqa kaspanqa bautizasqataqmi ‘Cristo Jesuspipas’ (Romanos 6:3, Diospa Palabran Mateo-Apocalipsis). Chayna bautizasqaqa kanku Jesuspa akllasqan qatiqninkunallam utaq hanaq pachamanta Jesuswan kuska kamachimunankupaq akllasqa kaqkunallam. Cristo Jesuspi bautizakusqankuraykum Jesuswan huk cuerpo hinallaña kanku. Jesusmi paykunapa uman, paykunañataqmi cuerpon (1 Corintios 12:12, 13, 27; Colosenses 1:18).

 Hanaq pachapaq kaqkunaqa bautizasqataqmi kanku ‘Jesuspa wañukusqanpipas’ (Romanos 6:3, 4, willakuy). Jesus hinam paykunapas manaña kikinkupaqchu kawsanku, aswanqa Diosta kasukunankupaqmi kallpanchakunku. Hinaspapas kay pachapi wiñaypaq kawsakuy munaytaqa saqirunkuñam. Chayna bautizakusqankutam completanku wañukuspanku hinaspa hanaq pachapi espirituña kawsakunankupaq kawsarichisqa kaspanku (Romanos 6:5; 1 Corintios 15:42-44).

 Ninawan bautizakuymanta. Bautizaq Juanmi nirqa: “[Jesusmi] chuya espirituwan hinaspa ninawan bautizasunkichik. Hurkitanqa makinpiñam kachkan, hinaspanmi irasqanta suma-sumaqta wayrachinqa. Trigotam huqarinqa taqiman, pajatañataqmi kañanqa mana amachay atina ninawan”, nispa (Mateo 3:11, 12). Juanpa chayna nisqanwanmi yachanchik ninawan bautizakuyqa chuya espirituwan bautizakuyqa mana chaynalla kasqanta. ¿Ima ninantaq Juanpa rikchanachisqanqa?

 Trigoqa tupan Jesusta uyarispa kasukuqkunawanmi. Paykunam chuya espirituwan bautizasqa kanmanku. Pajañataqmi tupan Jesusta mana uyariqkunawan. Paykunam ninawan bautizasqa kanqaku, chaywanqa nichkan wiñaypaq chinkachisqa kanankumantam (Mateo 3:7-12; Lucas 3:16, 17).