2 Corintios 8:1-24
8 Wawqi-panillaykuna, Macedonia lawpi huñunakuq iñiqmasinchikkunata Diosninchik ancha kuyasqanmanta* yachanaykichiktam munaniku.+
2 Paykunaqa sasachakuykunawan ñakarispankupas chaynataq wakcha kaspankupas kapuqninkuta quspankum anchata kusikurqaku. Chayta ruwasqankuwanmi qukuykuq kasqankuta sutillata riqsichikurqaku.
3 Qurqakuqa manam atisqallankutachu,+ aswanqa mana quy atisqankutawanmi, chaytaqa kikiypunim yachani*.+
4 Paykunaqa kikinkumantam anchallataña ruegawarqaku kapuqninkuta quspa yanapakunankupaq, chaynapi paykunapas Diospa runankunata chaykunawan yanapanankupaq*. Paykunapaqqa ancha kusikuypaqmi karqa kapuqninkuwan yanapakuyqa.+
5 Paykunaqa piensasqaykumantapas astawanraqmi ruwarqaku. Arí, munasqankutapas saqispanmi Diospa munasqanman hina puntata señorninchikpaq kaqkunata hinaspa ñuqaykupaq kaqkunata ruwarqaku.
6 Chaymi Titota+ kallpancharqaniku yanapakunaykichikpaq imallapas qusqaykichikta huñuyta tukunanpaq.
7 Qamkunaqa tukuy imapim allinlla kachkankichik. Qamkunaqa Diospim anchata hapipakunkichik, yachaywan rimaqkunam kankichik, yachayniyuq runakunam kankichik, ima ruwasqaykichikpipas anchatam kallpanchakunkichik, ñuqayku hinam hukkunatapas kuyankichik. Chaynaqa, hinallayá kapuqnikichikwanpas tukuy sunquykichikwan hinalla haykapipas yanapakuychik.+
8 Kayta nispayqa manam kamachichkaykichikchu, aswanqa wakinkunapa tukuy sunqunkuwan ruwasqankuta yachanaykichikpaqmi nimuchkaykichik, hinaspapas qamkunapa kuyakuynikichik chiqap kasqanta yachanaypaqmi.
9 Qamkunaqa yachankichikmi señorninchik Jesucristo ancha kuyakuq* kasqanta, payqa apu kachkaspanpas qamkunaraykum wakchayarurqa,+ chaynapi paypa wakcha kayninwan qamkuna apu kanaykichikpaq.
10 Qamkunaqa yaqa huk watañam chay ruwaytaqa qallarirqankichik, ichaqa manam ruwayllatachu qallarirqankichikqa, aswanqa chay ruway munasqaykichiktam qawachirqankichik. Chay ruwasqaykichikmantam allinnikichikpaq kasqanrayku kayta niyman:+
11 Qallarisqaykichiktayá tukuychik, chaynapi atisqaykichikman hina qusqaykichikwan allin sunquyuq kasqaykichikta qawachinaykichikpaq.
12 Imapas tukuy sunquwan yanapakuy qusqanchiktaqa Diosqa kusikuywanmi chaskin, payqa munan pipas atisqanman hina qunantam,+ manam mana atisqanman hina qunantachu.
13 Ñuqaqa manam munanichu hukkunata yanapasqaykichikrayku qamkunañataq sasachakuypi kanaykichiktaqa,
14 aswanqa munani qamkunapa imapas puchusuqnikichik paykunapa imanpas pisipuqninpi yanapanantam, paykunapa puchuqninkupas qamkunapa pisipusuqnikichikpi yanapasunaykichikta, chaynapi llapallaykichikpa imaykichikpas kananpaq.
15 Qillqasqam kachkan: “Achka kapuqniyuq runapam mana puchurqachu, aslla kapuqniyuq runapapas manam pisirqachu”, niq.+
16 Diosmanyá gracias kachun Titopas ñuqayku hina qamkunamanta llumpayta llakikusqanmanta.+
17 Payqa nisqaykuta chaylla ruwayta munaspanmi kikillanmanta qamkunaman hamuchkan.
18 Titotawan kuskatam huk iñiqmasinchikta kachamuchkaniku, payqa sumaq willakuyta willakusqanraykum llapallan iñiqkunapa allinpaq hapisqan.
19 Manataqmi chayllachu, paytaqa iñiqkunapas akllaykurqam ñuqaykuwan rinanpaq, chaynapi kay qusqankuta rakiysiwanankupaq, chaytaqa ruwachkaniku señor hatunchasqa kananpaqmi hinaspa chaylla yanapakuq kasqaykuta qawachinaykupaqmi.
20 Chaynapim pipas yanqakunataqa mana rimanqachu kay achkallataña qusqankuta aypunaykupaq kamachisqa kasqaykumantaqa.+
21 ‘Ñuqaykuqa anchatam kallpanchakuniku mana llullakuspa* tukuy imata ruwanaykupaq, chaynam kaniku Jehova* Diospa qayllanpipas chaynataq runakunapa qayllanpipas’.+
22 Paykunawantaqmi huk iñiqmasinchiktapas kachamuchkaniku, payqa sapa kutim allintapuni tukuyta ruwan, kunanqa aswan allintaraqmi ruwayta munachkan qamkunamanta mana iskayrayasqanrayku.
23 Titomanta ima tapukuypas kaptinqa nikichikmanmi, puriqmasiy hinaspa qamkunapa allinnikichikpaq llamkaqmasiy kasqanta. Wawqinchikkunamanta tapukuy kaptinpas, nikichikmanmi iñiqkunapa apostolnin hinaspa Cristota* hatunchaqkuna kasqankuta.
24 Chaynaqa, paykunata tukuy sunquykichikwan kuyasqaykichikyá sutilla kachun,+ sutillatataqyá riqsichiychik qamkunamanta imanasqa kusisqa kasqaykutapas.
Willakuykuna
^ Kaypiqa rimachkan mana kuyana kachkaspa kuyasqa kaymantam.
^ Utaq: “Willakuni”.
^ Utaq: “Diospaq llamkanankupaq”.
^ Kaypiqa rimachkan mana kuyana kachkaspa kuyasqa kaymantam.
^ Utaq: “Mana suwakuspa”.
^ Qaway A5 kaq yachachikuyta.
^ Utaq: “Diospa akllasqanta”.
