Ezequiel 31:1-18
-
Egipto tukunanmanta hinaspa hatu-hatun cedro sachamanta (1-18)
31 11 kaq watapim kimsa kaq killapa punta kaq punchawninpi Jehova Diosqa kaqmanta rimapayawaspan niwarqa:
2 “Runapa churin, Egipto kamachiqtayá* tropantinta niy:+
‘¿Yaqachu qam hina pipas ancha riqsisqa kanman?
3 Qamqa Asiriamanta runa hinam kanki, qamqa Libano lawmanta cedro sacha hinam kanki.
Chay sachaqa hatu-hatunmi karqa, hinaspapas llantukunapaq hinam kallmasapa karqa,uma puntanpas puyukamaraqmi chayarqa.
4 Yakuyuq kaspam hatu-hatunta wiñarurqa, allpapa ukunpi kaq yakuwanpas hatu-hatuntam wiñarurqa.
Chay sachapa muyuriqnintam yaku kallpaq,yarqankunata pusasqanku yakum lliw sachakunata parquq*.
5 Chayraykum wakin sachakunamantapas aswan hatuntaraq wiñarurqa.
Achka yakupa kasqanpi wiñasqanraykum kallmasapallaña karqa,hinaspam sumaqllataña mastarikurqa.
6 Hinaptinmi llapallan alton pawaqkuna kallmankunapi qistankuta* ruwaqku,purun animalkunapas chay sachapa sikinpim wachaq,huklaw nacionkunamanta kaq achkallay-achka runakunapas chay sachapa llantusqanmi yachaqku*.
7 Hatu-hatun kasqanrayku chaynataq kallmankunapas wiñarusqanraykum kuyayllapaq karqa,chaynaqa karqa sapinkuna achka yakupa kasqanman chayarusqanraykum.
8 Ñuqapa huertaypi mayqin cedro sachapas manam chaynaqa karqachu.+
Manam mayqin cipres sachapas chayna kallmayuqqa karqachu.
Manam mayqin armon sutiyuq sachapas chayna kallmayuqqa karqachu.
Manam huertaypi mayqin sachapas chay sacha hina kuyayllapaqqa karqachu.
9 Kuyayllapaq kallmasapallañam rikurirurqa,chaymi Eden huertaypi kaq wakin sachakuna chay sachata chiqnirqa’, nispa.
10 Chayraykum llapallan kamachiq Jehova Dios nin: ‘Chay sachaqa hatu-hatunta wiñaruspanmi hatuntukuq rikurirurqa, uma puntanpas puyukama chayaruptinmi hatuntukuq rikurirurqa. Chayraykum
11 huklaw nacionkunata munaychakuqpa makinpi saqisaq.+ Hinaptinmi chay kamachiqqa contranpi hatarinqa, mana allinkuna ruwasqanraykum ñuqapas qipanchasaq.
12 Paqway mana llakipayakuq huklaw nacionmanta runakunam chay sachata kuchunqa, hinaspam urqukunapi saqinqa. Kallmankunapas wayqukunamanmi wichinqa, pakipasqa kallmankunapas yakuyuq yarqakunapim wischurayanqa.+ Chay sachapa llantusqan llaqtakunapi kaq runakunañataqmi saqiruspa ayqikunqaku.
13 Llapallan alton pawaqkunam ichaqa chay wichiykuq sachapi yachanqaku, purun animalkunapas kallmankunapim yachanqaku.+
14 Chaynam kanqa ima sachapas hatu-hatunta mana wiñarunanpaq, uma puntanpas puyukama mana chayarunanpaq chaynataq yakuwan allin parqusqa kaspanpas hatu-hatunta mana wiñarunanpaq. Llapallan sachakunam kuchusqa kanqa, allpapa sunqunmanmi chayanqaku pampasqa runakuna hina’, nispa.
15 Llapallan kamachiq Jehova Diosmi nin: ‘Chay sacha kuchusqa kasqan* punchawmi llakikuy kanqa. Chaypaqmi uku-uku yakuta chakirachisaq, kallpaq yakutapas harkarachisaqmi, hinaptinmi huk hawaqllapiña kanqa. Libano lawtapas tutayaymi pampaykunqa, chaypi kaq sachakunapas lliwmi chakirunqa.
16 Huklaw nacionkunam katkatatanqa wichiykuptin chaynataq wakinkunawan kuska kuchusqa kaptin*. Chay karuptinmi allpapa sunqunpi kusisqa hinaraq kanqa Eden huertapi llapallan sachakunapas,+ Libano lawpi allinnin kaq sachakunapas chaynataq parqusqa kaq llapallan sachakunapas.
17 Wichiykuq chay hatun sachawan kuskam chay sachakunapas wañusqakunapa kasqanman* uraykunqa, chaypim kanqaku espadawan wañuchisqa+ runakuna hina chaynataq yanapaqnin runakuna hina. Chay yanapaqnin runakunaqa wichiykuq chay hatun sachapa llantusqanmi huklaw nacionkunapi yachaqku.+
18 ¿Eden huertapi mayqan sachataq chay hatun sacha hina ancha riqsisqa karqa?+ Chayna kaspanpas chay hatun sachaqa Eden huertapi wakin sachakuna hinam allpapa sunqunpi kanqa. Espadawan wañuchisqa runakunawan kuskam kanqa, paykunaqa qari kayninkupi mana señalachikuqkunam kanku. Egiptota kamachiq runam tropantinkuna chaynapi tarikunqa’, nispa. Chaynatam llapallan kamachiq Jehova Dios nin”, nispa.
Willakuykuna
^ Utaq: “Faraontayá”.
^ Utaq: “Qarpaq”.
^ Utaq: “Tapankuta”.
^ Utaq: “Tiyaqku”.
^ Hebreo rimaypiqa nichkan: “Seolman uraykusqan”, nispam. Qaway “seol” niq palabrapa ima ninan kasqanta.
^ Utaq: “Hukkunawan kuska wañuqkunapa kasqanman uraykuptin”.
^ Hebreo rimaypiqa nichkan: “Seolman”, nispam.
