Genesis 18:1-33
18 Huk punchawmi Jehova Diosqa Abrahanman rikuriykurqa Mamre sutiyuq runapa hatun sachankunapa chawpinpi.+ Abrahanqa carpanpa punkunpim tiyachkarqa llumpayta rupamusqan horapi.
2 Karuniqta qawarispanmi Abrahanqa kimsa runakunata rikururqa.+ Hinaspam carpanpa punkunmanta kallparqa* chay runakunata taripaykuq, chayaruspanmi pampakama kumuykurqa.
3 Chaymantam nirqa: “Jehova Dioslláy*, kuyawaspaykiqa kay serviqnikipa wasinpiyá samaykuy.
4 Yakutayá aparachimusaq chakikichikta mayllaykachinaypaq.+ Hinaptinyá sachapa sikinpi samariykuychik.
5 Ñuqaman hamusqaykichikraykuyá tantata apamusaq mikuykuspa kallpata hapinaykichikpaq, chayñayá pasakuychik”, nispa. Paykunañataqmi nirqaku: “Allinmi kanman”, nispanku.
6 Chaymi Abrahanqa carpanman kutispan warmin Sarata nirqa: “Iskay manka masnin* harinata chapuspayá tantata ruway”, nispa.
7 Chaymantam Abrahanqa kallpaylla rirqa vacankunapa kasqanman, hinaspam wiran kaq malta torota akllaykuspan serviqninman quykurqa nakaspa chaylla yanumunanpaq.
8 Chaymantañataqmi Abrahanqa lecheta, lluklluta hinaspa malta toropa aychanmanta mikuyta paykunaman qaraykurqa. Paykuna mikuptinkuñataqmi Abrahanqa waqtankupi sayarqa sachapa sikinpi.+
9 Chaymi chay runakunaqa Abrahanta nirqaku: “¿Maypitaq warmiki Saraqa kachkan?”, nispa.+ Abrahanñataqmi nirqa: “Carpapim kachkan”, nispa.
10 Hukninmi nirqa: “Wataman kunan hinatam kutimusaq, hinaptinmi warmiki Saraqa wawayuqña kanqa”, nispa.+ Sarañataqmi carpanpa punkunmanta uyarirurqa, carpanqa chay runapa qipan lawllapim karqa.
11 Abrahanwan Saraqa yuyaqñam karqaku.+ Saraqa manañam killanwanqa unqurqañachu.+
12 Chaymi Saraqa asikuspan sunqullanpi nirqa: “Ñuqaqa yuyaqñataq kanipas, qusaypas machuyarunñataq, ¿chaychu wawayuqraq kayman?”, nispa.+
13 Hinaptinmi Jehova Diosqa Abrahanta nirqa: “¿Imanasqataq warmiki Saraqa asikurun? ¿Imanasqataq nirqa manaña wawayuq kananmanta?
14 ¿Kanmanchu Jehova Diospaq imapas mana ruway atinan?+ Wataman kunan hinatam kutimusaq, hinaptinmi warmiki Saraqa wawayuqña kanqa”, nispa.
15 Sarañataqmi mancharikuspan nirqa: “Manam asikurqanichu”, nispa. Diosñataqmi nirqa: “Asikurqankim”, nispa.
16 Chaymantam runakunaqa pasakunankupaq hatarirqaku. Chaymi paykunata Abrahan aviachkaptin runakunaqa Sodoma lawta qawarirqaku.+
17 Jehova Diosñataqmi sunqullanpi nirqa: “Imapas ruwanaytaqa manam Abrahanmantaqa pakasaqchu.+
18 Abrahanpa mirayninqa atiyniyuq hatun nacionmi kanqa, payraykum llapallan nacionkuna bendecisqa kanqaku.+
19 Ñuqaqa allintam Abrahantaqa riqsini, paymi churinkunata hinaspa llapallan mirayninkunata yachachinqa ñuqa Jehova Diospa munasqayman hina allinta kawsakunankupaq.+ Chaynapim ñuqa Jehova Diosqa Abrahanman nisqayta ruwasaqpuni”, nispa.
20 Chaymantam Jehova Diosqa nirqa: “Sodoma hinaspa Gomorra llaqtayuq runakunapa llumpay huchallikuqllaña kasqankumanta qayakuytam uyariruni.+
21 Chaynaqa, mana allin ruwasqankumanta qayakamuwasqankuta qawaqyá rirusaq. Chayna utaq mana chayna kasqantayá yacharamusaq”, nispa.+
22 Chaymantam iskaynin runakuna Sodoma llaqtaman pasarqaku, Jehova Diosñataqmi+ Abrahanwan qiparqa.
23 Abrahanñataqmi Diosman asuykuspan nirqa: “¿Allin ruwaq runakunatachu mana allin ruwaq runakunatawan kuskata wañuchinki?+
24 Chay llaqtapi 50 allin ruwaq runakuna kaptinpas, ¿llapallantachu wañuchinki? ¿Manachu 50 allin ruwaq runakuna kasqanrayku chay llaqtata pampachaykuwaq?
25 ¡Qamqa manam allin ruwaqkunataqa mana allin ruwaqkunatawan kuskataqa wañuchiwaqchu!+ ¡Manam haykapipas chaytaqa ruwawaqchu!+ Kay pachapa juezninqa, ¿manachu allin kaqta ruwanqa?”, nispa.+
26 Chaymi Jehova Diosqa nirqa: “Sodoma llaqtapi 50 allin ruwaq runakuna kaptinqa, paykunaraykum pampachasqa kanqaku”, nispa.
27 Hinaptinmi Abrahanqa nirqa: “Jehova Dioslláy, yachanim ñutu allpamanta kasqayta hinaspa uchpa hinalla kasqaytapas, chaywanpas mañakullaykim.
28 45 allin ruwaq runakuna kaptinpas, ¿llapankutachu wañurachinki?”, nispa. Diosñataqmi nirqa: “Manam wañuchisaqchu 45 allin ruwaq runakuna kaptinqa”, nispa.+
29 Kaqmantam Abrahanqa tapurqa: “¿40 kaptinqa?”, nispa. Diosñataqmi nirqa: “40 kaptinpas manam wañuchisaqchu”, nispa.
30 Abrahanñataqmi yapatawan nirqa: “Jehova Dioslláy, amamá piñakurunkichu,+ yapatawanmi tapuyta munachkayki. ¿Kimsa chunkalla kaptinqa?”, nispa. Diosñataqmi nirqa: “Kimsa chunkalla kaptinpas manam wañuchisaqchu”, nispa.
31 Kaqmantam Abrahanqa nirqa: “Jehova Dioslláy, pampachaykullaway tapupayasqaymanta. ¿Iskay chunkalla kaptinqa?”, nispa. Diosñataqmi nirqa: “Iskay chunkalla kaptinpas manam wañuchisaqchu”, nispa.
32 Chaymantapas rimayta tukunanpaqñam Abrahanqa nirqa: “Jehova Dioslláy, amayá piñakuruychu, kay kutillataña tapusqayki. ¿Chunkalla kaptinqa?”, nispa. Payñataqmi nirqa: “Chunkalla kaptinpas manam wañuchisaqchu”, nispa.
33 Chaymi Abrahanwan rimayta tukuruspan Jehova Diosqa pasakurqa,+ Abrahanñataqmi carpanman kutikurqa.
Willakuykuna
^ Utaq: “Raskirqa”.
^ Jehova Diospa rantinpi hamusqanraykum Abrahanqa huknin angelta chaynata suticharqa.
^ Utaq: “Kimsa sea”. Qaway B14 kaq yachachikuyta.
