Hechos 1:1-26
1 Teofilo, punta kaq libropim qillqamurqayki Jesuspa tukuy ima ruwasqanmanta hinaspa yachachisqanmanta,+
2 qillqamurqaykiqa hanaq pachaman Jesusta Dios huqarinan punchawkamam,+ manaraq huqarisqa kachkaspanmi Diospa atiyninpa* yanapakuyninwan akllasqan apostolninkunaman* tukuyta kamachirqa, chaymantañam huqarisqaqa karqa.+
3 Ñakarisqan qipatam Jesusqa apostolninkunaman achka kutipi rikuriykuspan sutillata qawachirqa chiqaptapuni kawsarimusqanta.+ Paykunaqa 40 punchawmi Jesusta rikurqaku, hinaptinmi Jesusqa Diospa gobiernonmanta* willakurqa.+
4 Paykunawan huñunasqa kachkaspanmi kaynata nispan kamachirqa: “Jerusalenmanta ama lluqsispaykichikyá+ hanaq pacha taytaypa prometesusqaykichikta suyaychik,+ chaytaqa ñuqam willarqaykichik.
5 Juanqa yakuwanmi bautizarqa, qamkunam ichaqa kay punchawkunalla chuya espirituwan bautizasqa kankichik”, nispa.+
6 Huñunasqa kachkaspankum apostolkunaqa Jesusta nirqaku: “Señor, ¿kaqmantachu Diospa gobiernonta Israel nacionpi kunan tiempo hatarichinki?”, nispanku.+
7 Jesusñataqmi nirqa: “Hanaq pachapi taytallaymi imay tiempo utaq imay punchaw imapas kanantaqa tantianman, qamkunaqa manam necesitankichikchu chaymanta yachaytaqa.+
8 Ichaqa atiyninwan* Dios yanapasuptikichikmi+ ñuqamanta willakunkichik+ Jerusalenpi,+ enteron Judeapi, Samariapi+ chaynataq kay pachapa cantonkama”, nispa.+
9 Chaykunata niruspanmi paykuna qawachkaptinku huqarikuyta qallaykurqa, hinaptinmi puyu tapaykuptin paykunaqa manaña rikurqakuchu.+
10 Cieloman huqarikusqanta qawachkaptinkum yuraq pachayuq iskay qarikuna+ waqtankupi rikurirurqa,
11 hinaspam nirqaku: “Galileamanta qarikuna, ¿imanasqataq sayachkankichik cielota qawaspa? Hanaq pachapi Diospa chaskisqan Jesusqa imayna hanaq pachaman risqanta qawasqaykichikman hinam kutimunqa”, nispa.
12 Chaymantam paykunaqa Olivos muqumanta Jerusalenman kutirqaku,+ chayqa Jerusalenmanta yaqa huk kilometrollapim* karqa.
13 Chayaruspankum samapakunanku wasipa altusninman qispirqaku, chaypim karqaku: Pedro, Juan, Santiago, Andres, Felipe, Tomas, Bartolomey, Mateo, Alfeopa churin Santiago, ganaswan imapas ruwaq Simon hinaspa Santiagopa churin Judas.+
14 Paykunaqa llapallankum Diosta huk sunqulla mañakurqaku, mañakurqakuqa wakin warmikunawan,+ Jesuspa maman Mariawan chaynataq Jesuspa wawqinkunawan kuskam.+
15 Chay punchawkunapim yaqa 120 iñiqkuna huñunasqa kachkaptinku sayarispan Pedro nirqa:
16 “Qarikuna, wawqillaykuna, Diospa palabranpi nisqanmi cumplikunan karqa, chaypim Diospa atiyninqa* ñawpaqmantaraq Judasmanta Davidwan willachirqa,+ Judasqa karqa Jesusta presochanankupaq pusamuqmi.+
17 Payqa ñuqaykuwan kuskam karqa+ hinaspapas ñuqayku hina yanapakuqmi karqa.
18 Kay runaqa mana allin ruwasqanmanta qullqi chaskisqanwanmi chakrata rantirurqa.+ Uray sinqanpa wichiykuptinñataqmi wiksan tuqyarurqa, hinaptinmi lliw chunchulninkunapas taqtakururqa.+
19 Chaytaqa Jerusalen llaqtayuq llapallan runakunam yacharurqaku, chaymi chay chakraqa paykunapa rimayninkupi sutichasqa karqa ‘Akeldama’ nispa. Chay ninanqa: ‘Yawar chakra’, ninanmi.
20 Salmos libropimiki qillqasqa kachkan: ‘Yachasqan* wasiyá chunnichun, amañayá chaypiqa pipas yachachunchu’,+ niq. Qillqasqataqmi kachkan: ‘Imam ruwaynintaqa hukñayá ruwachun’, niqpas.+
21 Chayraykum Judaspa rantinpi huktaña akllana kanqa, payqa kanan ñuqanchikwanraq kachkaspan señor Jesus tukuyta ruwaptin puriqmasiykum.
22 Chay akllasqaqa kanan Jesuspa Juanwan bautizachikusqanmantapacha+ hanaq pachapi Diospa chaskisqan kanankama+ puriqmasiykum, hinaspa Jesucristopa kawsarimusqanta ñuqaykuwan kuska rikuqmi”, nispa.+
23 Chaymi iskay qarikunata akllarqaku paykunamanta mayqan kasqanta yachanankupaq, hukninmi karqa Barsabaswan sutichasqa Josey, paytaqa riqsiqkutaqmi Justo sutiwanpas, hukninñataqmi karqa Matias.
24 Hinaspam mañakuspanku nirqaku: “Llapa runakunapa sunqunta riqsiq Jehova* Diosllayku,+ niykuwaykuyá kay iskay runakunamanta mayqin akllasqaykita,
25 Judaspa imam ruwayninta payña ruwananpaq hinaspa apostol kayninpa rantinpi payña kananpaq, apostol kaynintam Judasqa saqirurqa mana allin ñanpiña kananpaq”, nispa.+
26 Chaymi sorteaptinku+ suerteqa Matiasman tuparurqa, hinaptinmi payqa 11 apostolkunaman yapasqa karqa.
Willakuykuna
^ Utaq: “Kachasqan runankunaman”.
^ Qaway “Diospa gobiernon” niqpa ima ninan kasqanta.
^ Utaq: “Chuya espirituwan”.
^ Griego rimaypiqa nichkan: “Samana punchawpi purinallapim”, nispam. Chaynallatam samana punchawpi judiokuna purinanku karqa.
^ Utaq: “Chuya espirituqa”.
^ Utaq: “Tiyasqan”.
^ Qaway A5 kaq yachachikuyta.
