Hechos 2:1-47
2 Pentecostes fiestapim+ Jesuspa qatiqninkunaqa llapallanku huk wasillapi huñunasqa kachkarqaku,
2 chaypi tiyachkaspankum qunqayllamanta uyarirurqaku cielomanta hamuq sinchi wayrapa qapariyninta hina, chaymi qapariyninpas wasi huntata uyarikurqa.+
3 Hinaptinmi linwachkaq* nina hina rikurirurqa, hinaspam chiqiruspan sapakamapa hawanman tiyaykurqa.
4 Chaymi llapallankuman chuya espiritu* huntaykuptin+ chuya espiritupa rimachisqanman hina tukuy rikchaq rimaykunapi rimayta qallaykurqaku.+
5 Chay tiempopim Jerusalenpi kachkarqaku lliw nacionkunamanta tukuy sunqunkuwan Diosta serviq judiokuna.+
6 Chay qapariyta uyariruspankum llapa runakuna huñunakaramurqaku, hinaspam mana ima niytapas atirqakuchu iñiqkunata rimayninkupi rimasqankuta uyarispanku.
7 Llumpay admirasqa kaspankum nirqaku: “¿Kay rimaqkunaqa manachu llapallanku Galilea law runakuna?+
8 Hinaptinqa, ¿imaynamá uyarichkanchik nacesqanchikmantapacha sapakamapa rimayninchikpi rimaqtaqa?
9 Kaypim kachkanchik Mesopotamiamanta, Partiamanta, Mediamanta,+ Elanmanta,+ Judeamanta, Capadociamanta, Pontomanta, Asia provinciamanta,+
10 Frigiamanta, Panfiliamanta, Egiptomanta hinaspa Cirenepa hichpan Libia lawmanta. Kaypiqa kachkantaqmi Romamanta hamuspanku Jerusalenpi qipakuqkunapas, judiokunapas chaynataq paykunapa religionninman yaykuq runakunapas.+
11 Kachkankutaqmi Cretamanta hinaspa Arabiamantapas llapallanchikmi uyarichkanchik sapakamapa rimayninchikpi Diospa admirakuypaq ruwasqankunamanta”, nispa.
12 Arí, llapallankum mana imanakuytapas atirqakuchu, hinaspam admirakuspanku ninakurqaku: “¿Imataq pasakuchkan?”, nispanku.
13 Chaywanpas wakin runakunaqa burlakuspankum nirqaku: “Paykunaqa vinotam saksarunku”, nispanku.
14 Pedroñataqmi 11 apostolkunawan kuska sayariykurqa,+ hinaspam runakunata kallpawan nirqa: “Judeamanta qarikuna hinaspa Jerusalenpi llapallan yachaqkuna, kaytayá yachaychik, hinaspayá rimasqayta sumaqta uyariwaychik.
15 Kay runakunaqa manam piensasqaykichikman hinachu sinka kachkanku, yaqa isqun hora tempranollaraqmiki* kachkanqa.
16 Aswanqa Diosmanta willakuq* Joelmi nirqaña:
17 ‘Diosmi nin: “Tukupay punchawkunapim tukuy rikchaq runakunaman atiyniyta chaqchurimusaq, hinaptinmi qari churikichikpas, warmi churikichikpas ñuqamanta willakunqaku, musu-sipasnikichikkunapas musquypi hinam* qawanqaku, yuyaqnikichikkunapas sueñokunqakum.+
18 Chaynallataqmi sirvienteykunaman qarimanpas warmimanpas atiyniyta chay punchawkunapi chaqchurimusaq, hinaptinmi hamuq tiempomanta willakunqaku.+
19 Cielopipas mana haykapipas rikusqanku kaqkunatam qawachisaq, kay pachapipas milagrokunatam qawachisaq, chaymi kanqa: Yawar, nina hinaspa puyu hina qusni.
20 Jehova* Diospa piñakuynin punchaw manaraq chayamuchkaptinmi intipas wañunqa hinaspa killapas yawaryanqa, chay punchawpim Diosqa hatunchasqa kanqa.
21 Pipas sutinmanta Jehova* Diosta qayakuqmi ichaqa salvasqa kanqa”’, nispa.+
22 Israel llaqtayuq qarikuna, kay nisqaytayá uyariychik: Nazaret llaqtayuq Jesustaqa Diosmi qamkunaman kachamurqa, chaytaqa ruwarqa yachasqaykichikman hina qayllaykichikpi mana pipapas ruway atisqanta hinaspa admirakuypaq kaqkunatawan milagrokunata paywan ruwaspanmi.+
23 Jesusmi presochasqa karqa Diospa munasqanman hina chaynataq ñawpaqmantaraq yachasqanman hina.+ Paytam qamkunaqa leyta mana kasukuq runakunawan qirupi* warkurachispa wañurachirqankichik.+
24 Ichaqa Diosmi kawsarichispan+ wañuymanta libraykurqa, payqa manam wañusqallaqa kananchu karqa.+
25 Davidmi Jesusmanta rimaspan nirqa: ‘Tukuy tiempom Jehova* Diosqa hichpallaypi kachkan, mana haykapipas hukmanyanaypaqmi payqa alliq* lawniypi kachkan.
26 Chayraykum sunquypas kusisqallaña karqa, ancha kusikuywantaqmi rimarqanipas. Chaymantapas confianzallawanña suyaspaymi kawsakusaq.
27 Cuerpoytaqa manamá wañusqakunapa kasqanpiqa* saqirunkichu, amataqmi cuerpoy ismunantaqa saqinkichu, ñuqaqa tukuy sunquwanmi kasukuyki.+
28 Allinta kawsakunaypaqmi qamqa yachachiwarqanki, kuyawaspaykim sunqullayta kusikuywan qayllaykipi huntaykunki’, nispa.+
29 Wawqillaykuna, qarikuna, rimanaypaqyá saqiykuwaychik, clarotayá willasqaykichik ñawpaq abuelonchik Davidmanta, payqa wañukuspanmi pampasqa karqa,+ pampakusqan sepulturapas kunan punchawkamam llaqtanchikpi kachkan.
30 Payqa Diosmanta willakuqmi karqa, hinaspapas yacharqam prometesqanman hina hukkaqnin mirayninta trononpi Dios churananta,+
31 chaymi Davidqa ñawpaqmantaraq yacharqa Cristopa* kawsarimunanmanta, hinaspam chaymanta willakurqaña, paymi nirqa wañuqkunapa kasqanpi* Jesus mana saqisqa kananmanta hinaspa aychanpas mana ismunanmanta.+
32 Jesustaqa Diosmi kawsarirachirqa, chaymantaqa llapanchikmi testigo kanchik.+
33 Jesusqa hanaq pachaman rispanmi Diospa alliqninpi tiyaykurqa+ hinaspam taytanmanta prometesqa atiyninta* chaskiykurqa,+ chaymi kay qawasqaykichiktawan uyarisqaykichikta chaqchuykamun.
34 Davidqa manam hanaq pachamanqa rirqachu, kikinpunim nin: ‘Jehova* Diosmi señorniyta nirqa: “Alliqniypi tiyaykuy
35 chiqniqnikikunata chakikipa sarupakunanta hina churanaykama”’, nispa.+
36 Chayraykuyá llapallan Israel runakuna yachaychik señor+ hinaspa Cristo kananpaq Jesusta Dios churarusqanta, paytam qamkunaqa qirupi wañurachirqankichik”, nispa.+
37 Chayta uyariruspankum chay runakunaqa sunqunkupi llumpayta hukmanyarurqaku, hinaspam Pedrotawan wakin apostolkunata nirqaku: “Wawqillaykuna, qarikuna, ¿imatataq ruwasaqku?”, nispanku.
38 Hinaptinmi Pedro nirqa: “Huchaykichik pampachasqa kananpaqyá+ wanakuychik+ hinaspa señor Jesucristopa sutinpi sapakama bautizakuychik,+ hinaspam chaskinkichik mana imallapaq qususqaykichik Diospa atiyninta*.
39 Chay promesaqa+ Jehova* Diosninchikpa llapallan qayasqan kaqkunapaqmi: Qamkunapaq, churi-wawaykichikkunapaq hinaspa karupi lliw kaqkunapaqwan”, nispa.+
40 Astawanraq rimapayaspanmi Pedroqa paykunaman imam kaqta willarqa, hinaspam kallpanchaspan nirqa: “Mana wañunaykichikpaqyá mana allin runakunamanta* karunchakuychik”, nispa.+
41 Pedropa nisqanta tukuy sunqunkuwan kasukuqkunam bautizachikurqaku,+ hinaptinmi iñiqkunaman chay punchaw hukllawakurqaku yaqa 3.000 runakuna.+
42 Paykunaqa anchatam munarqaku apostolkunamanta yachayta, kuskanku huñunakuyta, kuskanku mikuyta+ hinaspa Diosta mañakuyta.+
43 Arí, llapallankum manchakuyta qallaykurqaku, apostolkunañataqmi achka milagrokunatawan admirakuypaq kaqkunata ruwarqaku.+
44 Llapallan iñikuqkunam huñulla karqaku, ima kapuqninkutapas llapankum qunakuykuqku.
45 Rantikurqakutaqmi* imapas kapuqninkuta+ chaynataq allpankutapas hinaspankum huñusqankuta llapallanman aypurqaku sapakamapa imanpas pisisqanman hina.+
46 Chaymantapas sapa punchawmi Diospa wasinman* huk sunqulla riqku, wasinkupipas kuskallam mikuqku, chaynallataqmi mikuyninkutapas tukuy sunquwan hinaspa ancha kusikuywan haywanakuqku.
47 Chaytaqa ruwaqku Diosta hatunchaspankum hinaspa runakunapa allin qawasqan kaspankum. Sapa punchawtaqmi Jehova* Diospas paypi iñiqkunaman hukllawarqa salvasqa kaqkunata.+
Willakuykuna
^ Utaq: “Ratachkaq”.
^ Qaway “chuya espiritu” niqpa ima ninan kasqanta.
^ Jesuspa tiemponpiqa kayqa karqa kimsa horam, chaytaqa yupaqku inti lluqsimusqanmantapacham.
^ Utaq: “Profeta”. Qaway kay palabrapa ima ninan kasqanta.
^ Utaq: “Revelacionpim”.
^ Qaway A5 kaq yachachikuyta.
^ Qaway A5 kaq yachachikuyta.
^ Utaq: “Kaspipi”.
^ Qaway A5 kaq yachachikuyta.
^ Utaq: “Paña”.
^ Griego rimaypiqa nichkan: “Hadespiqa”, nispam. Qaway kay palabrapa ima ninan kasqanta.
^ Utaq: “Diospa akllasqanpa”.
^ Griego rimaypiqa nichkan: “Hadespi”, nispam.
^ Utaq: “Chuya espirituta”.
^ Qaway A5 kaq yachachikuyta.
^ Utaq: “Chuya espirituta”.
^ Qaway A5 kaq yachachikuyta.
^ Utaq: “Kay tiempopi runakunamanta”.
^ Utaq: “Venderqakutaqmi”.
^ Utaq: “Temploman”.
^ Qaway A5 kaq yachachikuyta.
