Hechos 8:1-40
8 Estebanta wañuchisqankutaqa Sauloqa allinpaqmi hapirqa.+
Chay punchawpim Jerusalenpi iñiqkunata ñakarichiyta qallaykurqaku, lliw iñiqkunam chiqirurqaku Judeamanwan Samariaman, apostolkunallañam Jerusalenpiqa qiparurqaku.+
2 Ichaqa tukuy sunqunkuwan Diosta serviq qarikunam Estebanta pamparurqaku, paymantaqa llumpaytam waqarqaku.
3 Sauloñataqmi qallaykurqa iñiqkunata llumpay ñakarichiyta. Paymi wasikunaman yaykuspan qaritapas warmitapas pampanta aysaspa hurqumuq, hinaspam presochanankupaq entregaq.+
4 Ayqikuqkunam ichaqa mayman rispankupas Diospa palabranmanta willakustin riqku.+
5 Felipepas Samaria llaqtaman*+ rispanmi chaypi runakunaman Cristomanta* willakurqa.
6 Llapa runakunañataqmi Felipepa rimasqanta huk sunqulla sumaqta uyariqku, paykunaqa milagrokuna ruwasqantam qawaqku, uyariqkutaqmi rimasqankunatapas.
7 Demoniokunapa munaychakusqan runakunaqa achkallañam karqaku, chay demoniokunañataqmi qaparispanku runakunamanta lluqsiqku.+ Chaymantapas achkallaña suchukuna hinaspa wiqrukunam* sanoyachisqa karqaku.
8 Hinaptinmi chay llaqtapiqa kusisqallaña karqaku.
9 Samaria llaqtapim karqa Simon sutiyuq runa, paymi demoniokunapa yanapakuyninwan tukuyta ruwarqa hinaspam Samariapi llapa runakunata admirachirqa. Paymi nirqa: “Ñuqaqa atiyniyuqmi kani”, nispan.
10 Llapallan runakunam hatunpas uchuypas sumaqta uyarispanku nirqaku: “Diosmanta atiyta chaskisqanraykum kay runaqa ancha atiyniyuq”, nispanku.
11 Demoniokunapa yanapakuyninwan tukuy imata ruwaspan unayña paykunata admirachisqanraykum sumaqta uyarirqaku.
12 Ichaqa Felipepa willakusqanta creeruspankum qarikunapas warmikunapas bautizakurqaku, Felipeqa Diospa gobiernonmanta* sumaq willakuytam willakurqa,+ willakurqataqmi Jesucristopa sutinmantapas.+
13 Simonpas iñikurqam, bautizakurusqan qipatañataqmi Felipewanña purirqa,+ payqa milagrokunatawan admirakuypaq kaqkunata ruwaspanmi kusisqallaña karqa.
14 Samariapi runakuna Diospa palabran+ chaskikusqankumanta yacharuspankum Jerusalenpi apostolkuna Pedrotawan Juanta paykunaman kacharqaku.
15 Chaymi rispanku Diosta mañakurqaku atiyninta* chaskinankupaq.+
16 Diospa palabranta chaskiqkunaqa manaraqmi mayqinninkupas Diospa atiynintaqa* chaskirqakuchu, paykunaqa señor Jesuspa sutillanpim bautizakurqaku.+
17 Hinaptinmi paykunapa hawanman makinkuta churaptinku+ Diospa atiyninta* chaskirqaku.
18 Iñiqkunaman apostolkuna makinkuta churaykuptinmi Diospa atiyninta chaskirqaku, chayta Simon qawaykuspanmi apostolkunaman qullqita munachispan
19 nirqa: “Ñuqamanpas kay atiytayá quykuwaychik chaynapi makiyta pipa hawanmanpas churaykuptiy Diospa atiyninta* chaskinanpaq”, nispa.
20 Pedrom ichaqa nirqa: “Qamqa qullqikiwan kuskayá wañuy, qamqa mana imallapaq Diospa qusqantam qullqikiwan tariyta piensarqanki.+
21 Kay llamkaypiqa manam ima ruwanaykipas qampaqa kanchu Diospa qawasqanman hina sunquyki mana allin kasqanrayku.
22 Chayraykuyá mana allin ruwasqaykimanta wanakuy hinaspa Jehova* Diosta ruegakuy, ichapas sunquykipi mana allin tantiasqaykimanta pampachasunkiman.
23 Ñuqaqa yachanim qatqi veneno hina kasqaykita hinaspa mana allin ruwaypa sirvienten kasqaykita”, nispa.
24 Hinaptinmi Simonqa nirqa: “Ñuqapaqyá Jehova* Diosta mañapullawaychik nisqaykichikman hina imapas mana pasawananpaq”, nispa.
25 Chaymi Pedrowan Juanqa Jehova* Diospa palabranmanta rimaruspanku hinaspa imam willakunankuta enteronpi lliwta willakuruspanku Jerusalenman kutikurqaku, kutirqakuqa Samaria runakunapa llaqtachankunapi sumaq willakuyta willakustinmi.+
26 Jehova* Diospa angelninmi+ ichaqa Felipeta rimapayaspan nirqa: “Hatarispaykiyá sur lawman riy Jerusalenmanta Gaza llaqtaman riq ñanman”, nispa. Chay ñanqa karqa mana imapa kanan chunniq ñanmi.
27 Chaymi Felipeqa rispan tuparurqa Etiopia nacionpi kamachiq runawan, paymi karqa Etiopia nacionpi Candacewan sutichasqanku kamachiq warmipa qullqinta waqaychaq, chay kamachiq runaqa Jerusalenman Diosta yupaychaq risqanmantam+
28 kutimuchkarqa, payqa caballopa aysasqan carretapim tiyaykuspan Diosmanta willakuq* Isaiaspa qillqasqanta kallpawan leechkarqa.
29 Hinaptinmi Felipeta chuya espiritu* nirqa: “Rispayki wak carretaman asuykuy”, nispa.
30 Chaymi Felipe kallpaspan* asuykurqa, hinaspam Isaiaspa qillqasqan librota kallpawan leesqanta uyarispan nirqa: “¿Entiendenkichu chay leesqaykita?”, nispa.
31 Chay kamachiq runañataqmi nirqa: “¿Imaynataq entiendeyman pipas mana yachaykachiwachkaptinqa?”, nispa. Chaymi Felipeta ruegakurqa carretaman qispispan paywan tiyananpaq.
32 Diospa palabranta leesqanpim nirqa: “Nakanapaq ovejata hinam pusarqaku, imaynam ovejapas millwanta rutuptinku upallalla kan, chaynam paypas upallalla karqa.+
33 Payqa humillasqam karqa, manataqmi allintachu juzgarqakupas.+ Kay pachamanta chinkachisqa kachkaptinqa, ¿pitaq willakunqa pipa miraynin kasqantaqa?”, nispa.+
34 Hinaptinmi chay kamachiq runaqa Felipeta nirqa: “Ama hina kaspayá niykuway, ¿pimantataq rimachkan Diosmanta willakuqqa? ¿Kikinmantachu icha huk runamantachu?”, nispa.
35 Chaymi Felipeqa chay runapa leesqanmanta rimayta qallaykuspan Jesusmanta sumaq willakuyta willarqa.
36 Chaymantam ñanta richkaspanku yakupa kasqanman chayarurqaku hinaptinmi chay kamachiq runaqa nirqa: “¡Kayqaya yakuqa! ¿Imaraqtaq faltawan bautizakunaypaq?”, nispa.
37 *
38 Hinaspanmi nirqa carretata sayachinanpaq, hinaptinmi Felipeqa chay kamachiq runawan yakuman yaykuspan bautizarurqa.
39 Yakumanta lluqsiruptinkum Jehova* Diosqa atiyninwan Felipeta huklawman pusarurqa. Chay kamachiq runañataqmi Felipewanqa manaña tuparqachu, hinaspam maymi risqanta kusisqallaña pasakurqa.
40 Felipeñataqmi Asdod llaqtaman rirqa, hinaspanmi llapallan llaqtakunapi sumaq willakuykunata willakustin purirqa Cesarea llaqtaman chayanankama.+
Willakuykuna
^ Ichapas kanman: “Samariapa huknin llaqtachanman”, niqpas.
^ Utaq: “Diospa akllasqan runamanta”.
^ Utaq: “Wistukunam”.
^ Qaway “Diospa gobiernon” niqpa ima ninan kasqanta.
^ Utaq: “Chuya espiritutaqa”.
^ Utaq: “Chuya espirituta”.
^ Utaq: “Chuya espirituta”.
^ Qaway A5 kaq yachachikuyta.
^ Qaway A5 kaq yachachikuyta.
^ Qaway A5 kaq yachachikuyta.
^ Qaway A5 kaq yachachikuyta.
^ Utaq: “Profeta”.
^ Qaway “chuya espiritu” niqpa ima ninan kasqanta.
^ Utaq: “Raskispan”.
^ Qaway A3 kaq yachachikuyta.
^ Qaway A5 kaq yachachikuyta.
