Rut 1:1-22
1 Israel nacionpim muchuy* karurqa juezkunallaraq kamachichkaptinku,+ hinaptinmi Juda lawpi kaq Belen llaqtamanta huk runa+ Moab runakunapa allpanman ripukurqa warminwan hinaspa iskay qari churinkunapiwan.+
2 Chay runapa sutinmi karqa Elimelec*, warminpañataqmi Noemiy*, churinkunapañataqmi Malon* hinaspa Kilion*. Paykunaqa Juda lawpi Belen llaqtamantam karqaku, hinaspam Moab runakunapa allpanman ripukuspanku chaypiña yacharqaku*. Belen llaqtapa huknin sutinmi karqa Efrata.
3 Chaymanta qipatam Elimelec wañukurqa, chaymi Noemiyqa sapallanña iskaynin qari wawankunapiwan qiparurqa.
4 Chaymantam Noemiypa qari wawankunaqa Moab llaqtayuq sipaskunawan casarakurqaku, huknin sipaspa sutinmi karqa Orpa, hukninpañataqmi Rut.+ Moab llaqtapim yaqa chunka wata yacharqaku.
5 Chaymantam Malonwan Kilionpas wañukurqaku, hinaptinmi Noemiyqa manaña wawayuq hinaspa manaña qusayuq qiparurqa.
6 Noemiyqa Moab llaqtapi kachkaspanmi uyarirurqa chakrapi kawsaykunata qispichispan Jehova Diosqa llaqtanta kaqlla yanapasqanmanta, chaymi Noemiyqa iskaynin llumchuyninkunapiwan llaqtanman kutikuchkarqa.
7 Noemiyqa yachasqan Moab llaqtamantam iskaynin llumchuyninkunapiwan pasakurqa. Juda runakunapa allpanman richkaptinkum
8 llumchuyninkunata Noemiy nirqa: “Mamaykichikmanyá sapakama kutikuychik. Imaynam ñuqatawan wawaykunata kuyawasqaykichikman hinayá Jehova Diospas imaña kaptinpas kuyasunkichik.+
9 Sapakama qusayuq kaspa allinlla kawsakunaykichikpaqyá Jehova Dios yanapasunkichik”, nispa.+ Hinaspanmi paykunata muchaykurqa, llumchuyninkunañataqmi llumpayta waqarqaku.
10 Paykunam achka kutikama nirqaku: “Manam, manam kutiymankuchu. Qanwan rispaykum llaqtaykipi yachasaqku”, nispa.
11 Noemiymi ichaqa nirqa: “Kutikuychikyá wawallaykuna. ¿Imapaqtaq ñuqawanqa riwaqchik? Manañam wawayuq kaytaqa atiymanñachu paykunawan casarakunaykichikpaqqa.+
12 Kutikuychikyá wawallaykuna, kutikuychik. Ñuqaqa payañam kani huktawan casarakunaypaqqa. Kunan tutalla casarakuruspay wawayuq karuptiypas,
13 ¿wiñanantaraqchu suyawaqchik paykunawan casarakunaykichikpaq? ¿Mana casarakuspachu suyawaqchik? Manam wawallaykuna. Ñuqataqa Jehova Diosmi ñakarirachiwan. Qamkunapas ñuqaraykum ñakarichkankichik, chayqa llumpaytam llakichiwan”, nispa.+
14 Llumchuyninkunañataqmi yapamanta waqallarqaku. Chaymantam Orpaqa suedranta muchaykuspan llaqtanman kutikurqa, Rutmi ichaqa Noemiymanta rakikuyta mana munarqachu.
15 Chaymi Noemiyqa nirqa: “Waqaya llumchuymasikiqa kutikun llaqtanman hinaspa taytacha-mamachankunaman. Chaynayá qampas kutikuy”, nispa.
16 Rutmi ichaqa nirqa: “Mamáy, amayá saqirunaypaqqa hikutawaychu nitaq qanmanta rakikunaypaqpas. Maymanña riptikipas qanwanmi risaq, maypiña tutaykuptikipas chaypim tutaykusaq. Llaqtaykim ñuqapa llaqtay kanqa, Diosnikipas Diosniymi kanqa.+
17 Maypim wañukusqaykipim ñuqapas wañukusaq, chaypitaqmi pampakusaqpas. Wañuyllañam qanmantaqa rakiwanqa, mana chayna kaptinqa Jehova Diosyá castigawachun”, nispa.
18 Imataña niptinpas Rutqa manam rakikuyta munarqachu, chaymi Noemiyqa manaña imatapas nirqachu.
19 Chaynapim iskayninku Belen llaqtaman hinalla rirqaku.+ Belenman chayaruptinkuñataqmi llaqtapi lliw runakuna qawaspanku tapunakurqaku, warmikunapas nirqakum: “¿Payqa Noemiychus?”, nispanku.
20 Noemiyñataqmi uyariruspan warmikunata nirqa: “Amaña Noemiy* nispaqa niwaychikchu. Tukuy atiyniyuq Dios ñakarichiwasqanraykuyá Mara* nispaña sutichawaychik.+
21 Kaymantaqa ripukurqani tukuy imayuqmi, Jehova Diosmi ichaqa mana imayuqtaña kutirachimuwan. ¿Imanasqamá Noemiy niwankichikqa? Ñuqataqa Jehova Diosmi qipancharuwan, tukuy atiyniyuq Diosmi llumpayta ñakarirachiwan”, nispa.+
22 Chaynatamá Noemiyqa Moab llaqtayuq+ llumchuynin Rutpiwan llaqtanman kutikurqa. Belen llaqtaman chayaruptinkuqa cebada rutuymi qallaykurqaña.+
Willakuykuna
^ Utaq: “Yarqay”.
^ “Elimelec” ninanqa: “Diosniymi kamachiqqa”, ninanmi.
^ “Noemiy” ninanqa: “Kusisqa”, ninanmi.
^ Yaqachusmi hebreo rimaypiqa “mana kallpayuq wiñaq” utaq “unquruq” niqmanta hamun.
^ “Kilion” ninanqa: “Wichiq” utaq “tukuyninmanña chayaq”, ninanmi.
^ Utaq: “Tiyarqaku”.
^ “Noemiy” ninanqa: “Kusisqa”, ninanmi.
^ “Mara” ninanqa: “Qatqi”, ninanmi.
