Salmos 62:1-12
Takiqkunata yachachiqpaq. Jedutun. Davidpa takisqan.
62 Diostam hawkalla suyallani,paymi yanapawaqniyqa.+
2 Payqa harkaykuwaqniy hatun rumi hinam, payqa yanapaykuwaqniymi, payqa pakaykuwaqniymi.+
Manamá haykapipas qalaypaqqa wichisaqchu.+
3 ¿Haykapikamataq wañuchinaykichikpaq tukuyta ruwankichik?+
Qamkunaqa tuñiykamuchkaqña rumi pirqa hinam kankichik.
4 Paykunaqa yanqacharunankupaqmi tantianakunku.
Llullakuyllatam munankupas.
Siminkuwanmi sumaqllataña rimanku, sunqunkupim ichaqa mana allinllata tantianku.+ (Samarinapaq).
5 Diostam hawkalla suyallani.+
Payllapim hapipakullani.+
6 Payqa harkaykuwaqniy hatun rumi hinam, payqa yanapaykuwaqniymi, payqa pakaykuwaqniymi.
Manamá haykapipas wichisaqchu.+
7 Diosmi yanapawaqniyqa, paymi hatunchawaqniyqa.
Diosllamá harkaykuwaqniy hatun rumi hinaqa.+
8 Runamasillaykuna, payllapiyá haykapipas hapipakuychik.
Paymanyá sunquykichikta kichariychik.+
Payqa ñuqanchikta pakaykuwaqninchikmi.+ (Samarinapaq).
9 Runakunaqa samay hinallam kanku.
Yanqallam runakunaqa.+
Runakunamantaqa samayninraqmi astawanqa llasan.+
10 Mana allinta ruwaspa qullqi tarisqaykichikpiqa amayá hapipakuychikchu.
Amataqyá suwakusqaykichiktapas allin kasqanpaqqa hapiychikchu.
Apuyaruspaykichikpas amataqyá kapuqnikichikpiqa hapipakuychikchu.+
11 Atiyqa Diosllamantam hamun,Diospa chayna nisqantam iskay kutikama uyarirqani.+
12 Jehova Dioslláy, qamllam imaña kaptinpas kuyakuqqa kanki.+
Qamqa sapakamamanmi imam ruwasqankuman hina kutichipunki.+
