Yachachikuykunapa qallariynin
“Iñiywan hinaspa pacienciawanyá Diospa promesan chaskiqkunapa rurasqanta ruraychik” (HEBREOS 6:12).
1, 2. ¿Imaynatam qawarqa congregacionkunata watukuq anciano ñawpa tiempopi Dios serviqkunata? ¿Imanasqam paykunawan amistad kayqa allinninchikpaq kanman?
CONGREGACIONKUNATA watukuq yuyaqña iñiqmasinchikpa yachachisqanta uyarispanmi huk hermana nirqa: “Ñawpa tiempopi Diosman sonqo runakunamanta rimaspanmi payqa unay wataña amistadninkunamanta hina rimarqa”, nispa. Chay iñiqmasinchik ancianoqa unay watakunañam Bibliata estudiarqa chaynataq yachachirqa, chaymi payqa Bibliapi willakusqan Diosta serviq runakunamanta rimaspanqa reqsinakusqanku amistadninkunamanta hina willakurqa.
2 ¡Mayna allinchá kanman Diosta serviq ñawpa tiempopi runakunapa amistadnin kayqa! ¿Amistadnikita hinachu qawanki? Yuyaymanay, ¿imaynataq sientekuwaq paykunawan parlaspayki chaynataq amistadta armaspayki? Noeyta, Abrahamta, Rutta, Eliasta hinaspa Esterta reqsiykuspaqa, ¿imaynataq sientekuwaq? ¿Munawaqchu amistadniki kanankuta? ¿Imaynatam llapanchikta vidanchikpi yanapawachwan? ¡Maynatachá paykunaqa yanapawachwan chaynataq consejonkunawanpas kallpanchawachwan! (Leey Proverbios 13:20.)
3. a) ¿Imaynatam yanapawachwan ñawpa tiempopi Diosta serviqkunapa iñiyninkumanta yachasqanchik? b) ¿Ima tapukuykunatam contestasun?
3 Ñawpa tiempopi Diosta serviqkuna kawsarimuptinkum paykunawan amistadta armaspa kusikusunchik (Hech. 24:15). Ichaqa kay tiempopipas paykunamanta yachasqanchikqa yanapawasunmi. ¿Imaynata? Bibliapim apostol Pablo nirqa: “Aswanqa iñiywan hinaspa pacienciawanyá Diospa promesan chaskiqkunapa rurasqanta ruraychik”, nispa (Heb. 6:12). Paykunamanta allinta entiendenapaqyá, kay tapukuykunataraq contestasunchik: ¿Imataq iñiyniyoq kayqa hinaspa imanasqataq iñiyniyoq kananchik? ¿Imaynatam ñawpa tiempopi Diosta serviq runakunapa iñiyninkuta qatipakuchwan?
¿Imataq iñiyqa hinaspa imanasqataq iñiyniyoq kananchik?
4. ¿Imatam piensanku iñiyniyoq kaymanta? ¿Imanasqataq chayna piensasqankuqa mana allinchu?
4 Iñiyniyoq kayqa ancha allinmi, kay libropim yachasunchik ñawpa tiempopi Diosta serviq runakunaqa ancha iñiyniyoq kasqankumanta. Kunan tiempopi runakunaqa manam allinpaqchu hapinku iñiyniyoq kaytaqa. Piensankum iñiyniyoq kanapaqqa manas Bibliamantaqa allintaraqchu yachana. ¿Allinchu kanman chayna piensayninku? Manam. Cheqap iñiyniyoq kayqa manam piensasqanchikman otaq sientesqanchikman hina Diospi creeyllachu. Bibliam nin: “Demoniokunapas [Diospiqa] creenmi hinaspam manchakuymanta katkatatan”, nispa (Sant. 2:19).
5, 6. a) ¿Ima iskay asuntokunapim mana rikuspapas iñinchik? b) Wasinchik kananpaqqa, ¿imam kapuwananchik? ¿Iñiyninchikwan suyasqanchikkunamanta imam segurawanchik?
5 Cheqap otaq allin iñiyniyoq kanapaqmi Bibliaqa astawan yachachiwanchik (leey Hebreos 11:1). Mana rikusqanchikpi iñisqanchikmantam apostol Pablo iskay asuntomanta yachachirqa. Punta kaq: cheqap kaqkunata ñawinchikwan ‘mana rikuspapas cheqap kasqanpaqmi hapinchik’ Jehova Diosta, Churin Jesucristota chaynataq hanaq pachapi Gobiernasqantapas. Iskay kaq: manaraq rikuspanchikpas ‘iñiywanmi suyachkanchik’ Jehova Diospa Gobiernowan hamuq tiempopi Allpa pachata sumaq huertayachinanta. Ichaqa, ¿imanasqam seguropuni kachkanchik kay iskay asuntokunapi iñisqanchikmanta?
6 Manam. Apostol Pablom entiendechiwanchik cheqap iñiyqa allin sapichasqa hina kasqanmanta. Iñiymanta rimaspanmi nirqa: ‘Chaskinanchikpaq kaqtam seguranchik’, nispa. Chayna nisqanwanqa tupachichkarqam “wasipa papelninwan otaq titulonwan”. Kay rikchanachiypi piensariy, pipas huk wasita qampaqña kananpaq qoykusunkiman. Chay wasipa papelninta qoykususpayki nisunkiman: “Kaymi wasikipa papelnin”, nispa. Chay documentowanmi segurasunki chay wasiqa qampaqña kasqanta. Chaynallataqmi iñinapaq yanapawasqanchik kaqkunamanta yachasqanchikpas wasipa documenton hinam astawan segurawanchik hamuq tiempopi iñiywan suyananchikpaq.
7. ¿Imaynataq cheqap iñiyniyoq kayqa?
7 Cheqap iñiyniyoq kayqa tukuy sonqonchikwan mana iskayrayaspa Jehova Diosllapi confiaymi. Iñiywanmi Jehova Diosta qawanchik kuyakuq Taytanchikta hina, confianchiktaqmi tukuy promesankuna cumplinanpaq kasqanpipas. Kawsananchikpaqqa sapa punchawmi necesitanchik mikuyta, yakuta chaynallataqmi iñiyninchikpi hinalla takyanapaqpas Diospa Palabranta sapa kutilla estudiananchik hinaspapas chayman hinam kawsananchik. Mana chayqa iñiyninchikpim chiriyaruchwan (Sant. 2:26).
8. ¿Imanasqataq iñiyniyoq kayqa ancha allin?
8 ¿Imanasqataq iñiyniyoq kayqa ancha allin? Apostol Pablom willawanchik imanasqa ancha allin kasqanmanta (leey Hebreos 11:6). Mana iñiyniyoq kaspaqa manam Diosmanqa asuykuchwanchu nitaq agradachwanchu. Chayraykum, hanaq pachapi Taytanchik Jehova Diosman asuykunapaqqa chaynataq payllata hatunchanapaqqa iñiyniyoqmi kananchik.
9. ¿Imaynatam Jehova Diosqa yanapawanchik iñiyniyoq kanapaq?
9 Jehova Diosqa yachanmi iñiyniyoq kay necesitasqanchikta, chaymi ñawpaq tiempopi serviqninkunapa ejemplonwan kallpanchawanchik iñiyninchikpi takyanapaq chaynataq chayman hina kawsanapaq. Kachkantaqmi congregacionpi iñiyninkupi allin takyasqa ancianokunapas, Bibliam kallpanchawanchik ‘paykuna hina iñiyniyoq kananchikpaq’ (Heb. 13:7). Pabloqa rimarqataqmi ‘puyu hinaña testigokunamantapas’, paykunaqa ñawpa tiempopim kawsarqaku Diospi iñisqankuman hina (Heb. 12:1). Wakiqninmantam Hebreos libropa 11 capitulonpi Pablo willawanchik. Chayna iñiyniyoqkunamantam Bibliaqa achkanpi willawanchik qarimantapas warmimantapas hinaspa warmakunamantapas chaynataq ima tiempopi kawsasqankumantapas. Mana iñiyniyoq runakunapa kasqanpi kawsaptinchikpas ñawpa tiempopi Diosta seviqkunamanta yachasqanchikqa iñiyninchikpim allintapuni yanapawasun.
¿Imaynatam iñiyninkuta qatipakuchwan?
10. ¿Imaynatam ñawpa tiempopi Diosta serviq iñiqkunata qatipakunapaq yanapawachwan sapallanchikpi estudiasqanchik?
10 Manam pitapas qatipakuytaqa atichwanchu mana allinta reqsispaqa. Chaypaqmi kay libroqa allintapuni yachaykuspa otaq averiguaspa ruwasqa kachkan, ñawpa tiempopi Diosta serviq qarikunapa chaynataq warmikunapa iñiyninkuta qatikunapaq. Paykunamanta astawan yachayta munaspaqa wakin qellqanchikkunapipas maskawaqmi. Sapallayki estudiaspaqa astawan yachanaykipaq kallpanchakuy kapusuqniki qellqakunapi maskaspa. Chaymantapas leey qawachkawaqpas otaq uyarichkawaqpas hina sapa yachachikuyta hinaspa yuyaymanay. Leesqaykiman hina reparay chay sitiopi imakuna kasqanpi imakuna miskillaña asnarisqanpi chaynataq imakuna pasasqanpipas. Reparaytaq runakuna imayna sientekusqankupi chaynataq ima piensasqankupipas. Paykuna hina piensaspaykiqa otaq sientespaykiqa paykunamantam astawan yachanki, chaymantapas qatipakunaykipaq amistadnikita hinam qawanki.
11, 12. a) ¿Imaynatam astawan qatipakuchwan Abrahamtawan Sarata? b) ¿Imaynatam yanapawachwan Anamanta Eliasmanta hinaspa Samuelmanta yachasqanchikqa?
11 Bibliapi willawasqanchik Diosman sonqo runakunata allinta reqsispaqa qatipakuytachá munanki. Paykunapa ejemplon imakunapi yanapawasqanchiktayá qawasun. Ichapas Diospa organizacionnin kallpanchasunkiman predicaqkunapa mana ancha kasqanpi yanapakunaykipaq otaq predicanaykipaq nisusqayki sasa kasqanpaq rikchakusuptikiqa. Chaykunata allinta ruwanaykipaq Jehova Diosta mañakuy chaynataq Abrahampa hinaspa Sarapa ejemplonpi yuyaymanay. Paykunaqa Ur sutiyoq llaqtapim tukuyta saqerqaku, ichaqa tukuy bendiciontam chaskirqaku. Paykunata qatipakuspaqa paykuna hina iñiyniyoqmi kanki.
12 Ichapas mayqen amistadnikipas llumpayta sientirachisunki, chayrayku huñunakuykunamanpas manaña riyta munankichu. Chayna tarikuptikiqa ichapas yanapasunkiman Anapa vidanmanta yachasqayki, payta Penina llumpayta ñakarichiptinpas manam saqerqachu Jehova Dios serviynintaqa. Anamanta yachasqaykiqa yanapasunkim allinta tanteakunaykipaq chaynataq pay hina kallpanchakunaykipaqpas. Dios servisqaykipi imawanpas Elias hina hukmanyasqa tarikuptikiqa Jehova Dios payta imayna kallpanchasqanmi hinaspa consuelasqanmi yanapasunki. ¿Imatataq ruwawaq Diosta mana serviq mozo-sipaskunapa kasqanpi estudiaspaqa? Samuelpa ejemplonmi yanapasunki, payqa hinallam Diosman sonqo karqa Eliypa churinkuna Diospa karpanpi mana allinkunata ruwaptinkupas.
13. Ñawpa tiempopi Dios serviqkunapa iñiyninkuta qatipakuspaqa, ¿manachu iñiyninchikpi allinta takyanchik? ¿Imanasqam chaynata ninki?
13 Ñawpa tiempopi Dios serviqkunapa iñiyninkuta qatipakuspaqa, ¿iñiyninchikpi mana allin takyasqa kasqanchiktachu qawachichkanchik? Manam. Aswanqa Bibliapunim kallpanchawanchik ñawpa tiempopi Diosta serviq warmikunapa chaynataq qarikunapa ejemplonkuta hinalla qatipakunapaq (1 Cor. 4:16; 11:1; 2 Tes. 3:7, 9). Paykunapas wakinqa ñawpa tiempopi Diosta serviqkunatam qatipakurqaku. 17 kaq yachachikuypim qawasunchik Mariapas Anapa mañakusqanman hina Diosta mañakusqanmanta. ¿Mana iñiyniyoq kasqantachu chaywanqa qawachirqa? Manam. Anapa iñiyninqa Mariatam yanaparqa Jehova Diospi astawan confiaspan paypa munayninta ruwananpaq.
14, 15. ¿Imayna ruwasqam kay libroqa kachkan? ¿Imaynatam astawan yanapachikuchwan?
14 Kay libroqa iñiyninchikpi allinta takyanapaqmi yanapawasun. Kay qellqapi yachachikuykunaqa Willakuq revistapim lloqsimurqaña “Iñiyninkuta qatipakunapaq” niq yachachikuypi. Ichaqa sapa yachachikuypim astawan willakuykuna kachkan. Yachachikuykunata entiendenapaq chaynataq imayna yanapawasqanchikta reparanapaqmi tapukuykuna kachkan. Kay qellqapi lloqsimunanpaqmi sumaq dibujokuna ruwasqa kachkan, wakin qellqanchikkunapi lloqsimuq dibujokunapas kay libropim astawan sumaqyachisqa kachkan. Kachkantaqmi ordenninpi willakuykunapas mapakunapa kasqanpi. Iñiyninkuta qatipakunapaq librotaqa estudiachwanmi sapallanchikpas familianchikwanpas otaq huñunakuypipas. Sapa willakuyta leespaqa kallpanchasqam tarikusunchik.
15 Kay libroqa allintapunim yanapawasun ñawpa tiempopi Diosman sonqo iñiq runakunata qatipakunapaq. Leesqanchikman hinam iñiyninchikpi allinta takyasun chaynataq astawanmi Jehova Diosman asuykusun.
