3 YACHACHIKUY
¿Bibliaqa imam kaqtachu willakun?
Bibliapiqa sumaq yachachikuykunatam allin kawsakunanchikpaq tarinchik. Ichaya qampas chaykunamanta yachaykuyta munachkanki. Chaywanpas nichkankipaschá: “¿Imaynataq ñawpa tiempopiraq qillqasqa libroqa kusisqa kawsakunaypaq yanapawanman? Chaymantapas, ¿ciertochu kanman hamuq tiempomanta willakusqankuna?”, nispa. Achka runakunam cuentata qukurunku bibliaqa allinninchikpaq yachachiwasqanchikta. Munaymankum qampas bibliamanta yachaykunaykita.
1. ¿Bibliapi willakuykunaqa yanqa rimaykunallachu?
Kikin bibliapipunim nin llapallan qillqasqa kaqkunaqa ‘imam kaq’ qillqasqa kasqanmanta (Eclesiastes 12:10). Bibliapi willakuykunaqa manam llullachu. Chaymi imam kaqta willawanchik ñawpa tiempopi imakuna pasakusqanmanta, maypi hinaspa haykapi pasakusqanmanta. Willawanchiktaqmi riqsisqa runakunamantapas (leey Lucas 1:3 hinaspa 3:1, 2). Chaykunamanta sumaqta yachaq runakunapas ninkum bibliapa willakusqanqa mana llulla kasqanta.
2. Ñawpaq tiempopiraq qillqasqa kaptinpas, ¿imanasqataq bibliamantaqa mana iskayrayanchikchu?
Bibliaqa willakurqañam kunan tiempopi yachaysapa runakunapa yacharusqankutaqa, bibliata qillqasqanku tiempopi runakuna manaraq yachachkaptinkupas. Chaymi yachaysapa runakunapas cuentata qukunku bibliapa nisqanqa ciertopuni kasqanmanta. Arí, bibliapi imapas nisqankunaqa “mana iskayrayanapaqmi” (Salmos 111:8).
3. ¿Imanasqataq mana iskayrayachwanchu bibliapa nisqankuna cumplikunanmantaqa?
Bibliaqa ‘ñawpaqmantaraqmi willakurqaña tukuy imakuna pasakunanmanta’ (Isaias 46:10). Bibliaqa willakurqañam achka watakuna ñawpaqtaraq imakuna pasakunanmanta. Willakurqataqmi kunan tiempopi runakuna imayna kanankumantapas. Kay yachachikuypim yachasunchik bibliapa nisqankunaqa lliw cumplikusqanmanta.
ASTAWAN YACHAYKUSUN
Kaypim yachaykusunchik yachaysapa runakunapa nisqanqa bibliapa nisqanwan tupasqanmanta. Yachaykusuntaqmi bibliapa ñawpaq tiempokunamantaraq willakusqankuna imaynata cumplikusqanmantapas.
4. Bibliapa nisqanqa tupanmi yachaysapa runakunapa nisqanwan
Ñawpaq tiempopi runakunaqa niqkum kay allpa pachanchikta imapas hapisqanta. VIDEOTA qawaykuychik.
Bibliapim nirqaña kay allpa pachanchikqa mana imapa hapisqan kasqanta. Chayqa qillqasqa karqa yaqa 3.500 wata ñawpaqtaraqmi. Leeychik Job 26:7 hinaspa qatiqninmanta rimariychik:
-
Ima niwaqtaq, ¿kay allpa pachanchikqa imapapas hapisqanchu kachkan?
Bibliapiqa willakurqataqmi yakuta rupay waspichiptin puyu rikurispan paramusqanmantapas. Chaytam runakunaqa yaqa 200 watallaraq yacharunku. Bibliam ichaqa nirqaña ñawpaqmantaraq. Leeychik Job 36:27, 28 hinaspa qatiqninmanta rimariychik:
-
¿Imanasqataq bibliapi imayna paramusqanmanta willawasqanchikqa suma-sumaq?
-
Kaykunamanta yachasqayki, ¿yanapasunkichu bibliamanta mana iskayrayanaykipaq?
5. Bibliapa willakusqanqa ñawpaqpipas cumplikurqam
Babilonia llaqtam chinkachisqa kanan karqa. Leeychik Isaias 44:27–45:2 hinaspa qatiqninmanta rimariychik:
-
¿Imayna Babilonia llaqta chinkachisqa kanantataq 200 wata ñawpaqtaraq bibliaqa nirqaña?
Señorninchik Jesucristo kay allpapi manaraq nacechkaptinmi, 539 watapi Persia llaqtata kamachiq Ciro Babilonia llaqtata purmarachirqa. Babilonia llaqtaman yaykunankupaqqa harkaqnin mayutam huklawman rakirurqaku. Hinaspapas llaqtapa punkuntam kicharayaqta tarirurqaku, chaymi mana peleaspallanku yaykururqaku. Chayqa karurqa yaqa 2.500 wata ñawpaqtaraqmi. Kunankamapas Babilonia llaqtaqa hinallam purmasqa kachkan. Bibliaqa chayna kananmantam nirqaña. Chaymantayá yachaykusun.
Leeychik Isaias 13:19, 20 hinaspa qatiqninmanta rimariychik:
-
¿Bibliapa nisqanqa chaynapunichu karqa?
Kaynam Babilonia llaqta kachkan
6. Bibliaqa nirqañam kunan tiempopi imakuna kananmanta
Bibliaqa ninmi ‘tukupay punchawkunapiña’ kawsasqanchikta (2 Timoteo 3:1). Ñawinchaykusunyá kunan tiempopaq bibliapa imakuna nisqanmanta.
Leeychik Mateo 24:6, 7 hinaspa qatiqninmanta rimariychik:
-
¿Kunan tiemponchikpi imakuna kananmantam bibliaqa ña willakurqaña?
Leeychik 2 Timoteo 3:1-5 hinaspa qatiqninmanta rimariychik:
-
Bibliapi nisqanman hinaqa, ¿imaynam kay tiempopi runakunaqa kananku karqa?
-
¿Bibliapi leesqaykiman hinachu kay tiempopi runakunaqa kachkanku?
WAKIN RUNAKUNAM NINKU: “Bibliapa nisqankunaqa yanqallam”, nispanku.
-
¿Imakunamanta yachaykusqaykitaq yanapasunki bibliamanta mana iskayrayanaykipaq?
YUYARIYKUSUN
Kay yachachikuypim yacharunchik bibliapa nisqanqa ñawpaq tiempopipas hinaspa kunan tiempopipas cumplikusqanmanta. Yacharunchiktaqmi yachaysapa runakunapa nisqanwanpas tupasqanmanta. Chaymi mana iskayrayachwanchu bibliamantaqa.
¿Ima niwaqtaq?
-
¿Bibliapi willakuykunaqa yanqa willakuykunallachu?
-
¿Bibliapa nisqanwan tupanchu yachaysapa runakunapa nisqanqa?
-
¿Hamuq tiempopipas bibliapa nisqanman hinachu imapas kanqa? ¿Imanasqataq chaynata ninki?
ASTAWAN YACHANAYKIPAQ
Bibliaqa imam kaqtam willakurqa runakuna hukta nichkaptinkupas.
“Yachaysapa runakunapa nisqankuqa, ¿tupanchu bibliapa nisqanwan?” (Tarinkim jw.org nisqanpi)
¿Imanasqataq nichwan ‘tukupay punchawkunapiña’ kasqanchikta?
“Bibliapi 6 willakuykunapa cumplikusqanmanta” (Llaqta Cuidaq, 1 mayo 2011)
¿Imatam bibliaqa nirqaña Grecia nacionmanta? Qawaykuy qatiqnin videota.
‘Diosmanta willakuqkunapa yachachisqankum’ kallpanchawanchik (5:22)
Bibliaqa imam kaqtam willakun. Chayta yacharuspanmi huk runa manaña iskayrayarqachu bibliamanta.
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
