Jehová Diosqa munanmi, casarakuqkuna casarakusqanku punchawpi prometenakusqankuta cumplinankuta. Adantawan Evata casarachispanmi nirqa: “Chayraykum qariqa [...] hukllawakunqa warminmanña chaymi iskayninku huk runa  hinallaña kanqaku”, nispa. Jehová Diospa nisqanmanta rimaspanmi, Jesus nirqa: “Chayraykum runaqa mana rakinmanchu Diospa kuskanchasqantaqa”, nispa (Genesis 2:24; Mateo 19:3-6). Qawasqanchikman hina, Jehová Dioswan Jesusqa munankum casarasqakuna wañunanku punchawkama kuska kanankuta, kayqa tukun mayqanninkupas wañuptillankum (1 Corintios 7:39). Diospa qallarichisqan arreglo kasqanraykum casado vidataqa paypa qawasqanman hina qawananchik. Jehová Diosqa cheqninmi yanqamanta divorciakuytaqa (Malaquias 2:15, 16).

Bibliapa nisqanman hina, ¿ima pasaptintaq divorcioqa kanman? Jehová Diosqa palabranpim willan huchapakuy cheqnisqanta (Genesis 39:9; 2 Samuel 11:26, 27; Salmo 51:4). Anchata cheqnisqanraykum huchapakuy kaptin divorcio kanantaqa mana harkakunchu (9 kaq yachachikuypa 7 parrafonpim willachkan ima ruraykuna huchapakuy kasqanmanta). Jehová Diospa nisqanman hinaqa mana huchapakuqmi tanteanan divorciakunanpaq otaq manapas (Mateo 19:9). Chaynaqa, divorciakunanpaq tantearuspanqa manam huchallikuchkanchu. Congregacionpi kaqkunaqa manam kallpanchananchu divorciakunanpaqqa. Huchapakuqpa wanakusqanta qawaspanqa mana huchallikuqqa tanteanmanpaschá mana divorciakunanpaq. Chaynaqa, mana huchapakuqmi tanteanan ima rurananpaqpas, chay rurasqanmantaqa kikinmi responsable kanqa (Galatas 6:5).

Wakinpiqa llumpay sasachakuykuna kaptinmi, cristiano otaq cristianaqa rakikunman otaq divorciakunmanpas, qosan otaq warmin mana huchapakuchkaptinpas. Chayna pasakuptinqa, rakikuqta otaq divorciakuqtam Biblia nin: “Amataqyá hukwanqa casarakuchunchu, manachayqa qosanwanyá amistachun”, nispa (1 Corintios 7:11). Chaynaqa, rakikuq otaq divorciakuq cristianoqa manam librechu hukwan casarakunanpaqqa (Mateo 5:32). Qawasunchikyá ima sasachakuykuna kasqanraykum wakinkuna rakinakusqankumanta.

Familian mantieneyta mana munaptin. Wakin qosakunam familianta mana mantienenchu, ichaqa manam, mana atisqankuraykuchu  aswanqa mana munasqankuraykum, chaynata ruraspankum familianta ñakarichinku. Chayna qosakunamantam Biblia nin: “Pipas [...] wasinpi yachaqkunata mana mantienespanqa qepanchakurunñam iñisqantapas, payqa Diosman mana iñiq runakunamantapas peorraqmi rikurirun”, nispa (1 Timoteo 5:8). Qosa mana cambiaptinqa, warmim tanteanan sichu rakikuynin kikinpaq chaynataq wawankunapaqpas allin otaq mana allin kasqanmanta. Familian mantieneyta mana munasqanmanta cristiano acusasqa kaptinqa, ancianokunam allintapuni chay asuntomanta yachananku, familian mana mantieneqqa congregacionmantam qarqosqa kanman.

Vidan peligropi kaptin. Wakin qosakunaqa maqaspanmi warminpa vidanta peligroman churan. Cristiano qosa chayna kaptinqa, ancianokunam allintapuni chaymanta yachananku, maqakuqllaña kaqkunaqa congregacionmantam qarqosqa kanmanku (Galatas 5:19-21).

Jehová Dioswan amistadnin peligropi kaptin. Wakin casarasqa kaqkunaqa manam munankuchu warmin otaq qosan, Jehová Dios servinanta, obligankutaqmi Diospa kamachisqanta mana kasukunankupaqpas. Chayna kaptinqa, cristiano qariqa otaq warmiqa tapukunmanmi: “Rakikusqayqa, ¿yanapawanqachu ‘runakunamanta puntata Diosta kasukunaypaq’?”, nispa (Hechos 5:29).

Chayna sasachakuypi kaq warmita otaq qaritapas manam ninanchikchu rakikunanpaq otaq kuskalla kananpaqqa. Ancianokuna otaq iñiyninpi allin takyasqa wawqenchikkuna yanapaspa chaynataq Bibliawan consejaspapas, yachanankum casado vidankupi imayna tarikusqankuta Jehová Dioslla yachasqanta. Cristiano otaq cristiana rakikunanrayku mana kaqta rimaspanqa manam respetachkanmanchu casado vidata nitaq Diostapas. Chaymantapas, Jehová Diosqa yachanmi mayqanninpas sacrellawanña tanteasqantaqa. Arí, tukuy imam ‘sutilla kachkan Diospa qayllanpiqa, paymanmi cuentata qosunchik’ (Hebreos 4:13). Llumpay sasachakuypi tarikusqanrayku, cristiano rakikunanpaq tanteaptinqa manam pipas juzgananchu. Imayna kaptinpas, “lliwchanchikmi Diospa qayllanman rikurisunchik juzgawananchikpaq” (Romanos 14:10-12).