¿Sasachu Jehova Diospa munasqanta ruwayqa? . . . Chayna kasqantam achka runakuna ninku. Ichaqa manam chaynatachu Bibliaqa yachachin. Willawanchikmi Josias mozomanta, payqa Diosta servinanpaqmi anchata kallpanchakurqa. Chaypaqmi yanaparqa amistadninkunata allinta akllasqan. Astawanyá yachasunchik Josiasmanta hinaspa allin amistadninkunamantapas.

Josiaspa taytanmi karqa Juda nacionpi kamachikuq Amon sutiyoq runa. Payqa mana allin runam karqa, taytacha-mamachakunatam yupaycharqa. Amon wañukuptinmi churin Josiasña Juda nacionta kamachirqa. ¡Ichaqa pusaq watallanpiraqmi karqa! ¿Payqa taytan hinachu mana allin runa karqa? . . . Manamá.

Josiasqa warmacha kasqanmantam Jehova Dios serviyta munarqa. Chaymi allin amistadkunata maskarqa. Paykunaqa karqaku Diosta kuyaqkunam, hinaspapas Jehova Diosta kasukunanpaqmi yanaparqaku. ¿Pikunataq Josiaspa amistadninkunaqa karqaku?

 Huk kaqninmi karqa Diosmanta willakuq Sofonias. Paymi Juda nacionniyoq runakunata nirqa: “Pantay dioskunata hinalla yupaychaspaykichikqa, mana allinpim tukunkichik”, nispa. ¿Imatam Josiasqa ruwarqa? ¿Kasukurqachu Sofoniaspa nisqanta? Chaytamá ruwarqa. Chaymi payqa Jehova Diosllata haykapipas yupaycharqa, manam pantay dioskunatachu.

Josiaspa huk kaqnin amistadninñataqmi karqa Jeremias. Payqa wiñaymasinmi karqa, mozo kaspankum kuskanku wiñarqaku. Chaymi Josias wañukuptin, Jeremiasqa llakisqa kasqanmanta huk takita qellqarqa. Jeremiaswan Josiasqa yanapanakurqakum Jehova Diosta servinankupaq.

¿Imatam Josiasmanta yachachwan? . . . Payqa warmacha kasqanmantapacham Diostaqa kasukuyta munarqa. Chaypaqqa, Jehova Diosta kuyaq amistadkunatam akllanan karqa. ¿Qampas Josias hinachu Jehova Dios serviyta munanki? Chaynaqa, ancha allinmi kanman Diosta kuyaq amistadkunata akllaynikiqa.