Aeropuertota cuidaqkunam pasaq 10 watakunapi pasajerokunamanta qechurqaku 50 millon mana apanapaq kaqkunata. 2011 watallapim qechurqaku 1.200 tukuy rikchaq armakunata. Yaqa lliwmi chay armakuna apasqankumanta mana cuenta qokusqankuta nirqaku. Kaytam willakun terroristakunapa contranpi kaq institucion.

Educacionmanta cuentallikuqkunam mana rikuy atina uchuy aparatochata estudiaq warmankunapa pachanpi churayta qallaykunku, chaynapi estudiaq risqankuta otaq mana risqankuta yachanankupaq. Hinaspapas tayta-mamakunam celularninkupi huk mensajeta chaskinku warmanku escuelaman chayaptin otaq punchawyaruptinpas.

Luterana sutiyoq Iglesiam Noruega nacionpa religionnin karqa. Ichaqa congresistakunam chay nacionpi leyninkuta cambianankupaq tantearurqaku, chaynapi chay iglesia manaña Noruega nacionpa religionnin kananpaq.

Chay nacionpi llamkaqkunata tapuptinkum kimsa runamanta iskay runakuna nirqaku, llamkayninkumanta mensajeta apachimuptinku otaq qayamuptinku mana llamkasqanku horapi contestanankupuni kasqanta. Wakinkum piensanku mana chaylla contestayqa mana allin kasqanta.

Pasaq 20 watapim parten mastaraq kawsaykunaqa yapakurqa, waqaychasqataqmi trigowan arrozpas kachkan yaqa 6.000 millon arrobantin. Kaymantaqa manam partellantapas aypunkuchu chay nacionpi runakunamanqa, chayqa pasakun aypuqkuna suwakusqankurayku otaq usuchisqankuraykum.