IMATAM BIBLIA NIN
Castakunapa cheqninakusqankumanta
¿Maymantam castakunaqa rikurimurqaku?
“Chaymantam warminta runa suticharqa Evawan, payqa llapallan kawsaq runakunapa maman kasqanrayku.” (Genesis 3:20)
¿IMATAM KAYMANTA YACHAQ RUNAKUNA NINKU?
UNESCO sutiyoq huk organizacionmi kaynata nin: “Lliw runakunam hina kaqllamanta kanchik hinaspa rikurirqanchikpas”, nispa (Declaración sobre la Raza y los Prejuicios Raciales, de 1978).
¿IMATAM BIBLIA NIN?
Diosmi unancharqa Adantawan Evata, hinaspam nirqa: “Wawa-churiyoqyá kaychik, kay pachamanyá huntaychik”, nispa (Genesis 1:28). Chayraykum paykunaqa llapallan runakunapa tayta-mamanchik. Chaymanta achka watakuna qepatam sinchi para yaqa llapallan runakunata wañurachirqa. Pusaq runakunallam kawsarqaku: Noeywan señoran hinaspa kimsa churinkuna señorantinkama. Bibliam nin Noeypa churinkunamanta lliw runakuna mirasqanchikta (Genesis 9:18, 19).
¿Mayqan castataq aswan allinqa?
“Huk runallamantam [Dios] mirachirqa tukuy hinastinpi kaq runakunata chaynapi enteron kay pachapi yachanankupaq.” (Hechos 17:26)
WAKIN RUNAKUNAPA NISQAN
1900 watakunapim huk castakunawan cheqninakuyqa astawan qallaykurqa, nazi runakunam piensarqaku wakin castakunamantaqa paykuna aswan allin kasqankuta. Ichaqa ñaqa rimamusqanchik UNESCO organizacionqa ninmi lliw runakuna hina kaqlla kasqanchikta.
¿IMATAM BIBLIA NIN?
Hechos 10:34, 35 nin: “Diosqa manam pimanpas sayapakunchu, payqa chaskinmi lliw nacionkunapi payta kuyaspa manchakuywan allin ruraq runakunataqa”, nispa. Chaynaqa, manam pipas huk castamanta aswan allinqa kanchu.
Cristianokunaqa Jesuspa kayna nisqanpim hapipakunku: “Qamkunaqa wawqentillanmi kankichik”, nisqanpi (Mateo 23:8). Jesucristom Taytanta mañakurqa qatiqninkuna “chullallaña kanankupaq” otaq huk sonqolla kaspanku mana cheqninakunankupaq (Juan 17:20-23; 1 Corintios 1:10).
¿Haykapipas tukunqachu cheqninakuyninku?
“Tukupay tiempokunapi[qa] Tayta Diospa templonpa kasqan orqoqa [. . .] aswan hatunchasqam kanqa. Chay orqomanmi rinqaku llapallan nacion runakunaqa.” (Isaias 2:2)
WAKIN RUNAKUNAPA NISQAN
Castakuna astawan cheqninakusqankuta qawaspam, achka runakuna tapukunku sichu haykapipas cheqninakuy tukunanmanta. Wakinñataqmi ninku mana haykapipas tukunanta.
¿IMATAM BIBLIA NIN?
Jehova Diosqa manam wiñaypaqchu saqenqa castakuna cheqninakunankutaqa. Aswanqa paypa Gobiernon ukupim “llapallan nacionkunamanta, ayllukunamanta, castakunamanta hinaspa tukuy rikchaq rimayniyoqkunamanta” runakuna huk sonqolla servinqaku hinaspam kuyanakusqankutapas qawachinqaku (Apocalipsis 7:9). Diospa Gobiernonqa kay allpa Pachatam kamachimunqa, chaypim runakunaqa Diospa munasqanman hina wakin castakunawanpas manaña cheqninakuspa kawsakunqaku. *
^ par. 15 Astawan yachayta munaspaykiqa ¿Imatapunim Bibliaqa yachachin? niq libropa 3 kaq yachachikuyninta leey, kayqa Jehova Diospa testigonkunapa ruwasqanmi. Kachkantaqmi www.ps8318.com/quy nisqapipas.
