Brasil nacionpi kaq Ronaldo sutiyoq runam carrowan accidentemanta salvakururqa, ichaqa chaypim tayta-maman chaynataq kimsa ayllunkuna wañururqaku. Ronaldom nin: “Iskay killam hospitalpi karqani ichaqa manam yacharqanichu familiaykuna chay accidentepi wañurusqankumantaqa.

Wañukusqankumanta willawaptinkuqa manam creerqanichu, yanqa rimasqankupaqmi piensarqani. Ichaqa niwasqanku ciertopuni kasqanmanta cuenta qokuruspaymi mana imanakuytapas atirqanichu. Manam haykapipas chayna llakipiqa tarikurqanichu, sonqoymi yawarta waqarqa. Manañam kawsaytapas munarqaniñachu tayta-mamay manaña kaptin. Achka killakunam sapa punchaw waqarqani. Puramentetam ñakakurqani carroyta huk manejananpaq saqesqaywan. Ichapas kikiy manejaptiyqa mana wañunmankuchu karqa.

Chay accidente kasqanmantaqa 16 watañam pasarun, vidaypiqa allinñam tarikuni. Chaywanpas sonqoypiqa hinallaraqmi familiaymanta llakisqa tarikuni”.

Waqanayasuptikiqa waqay. Bibliapa nisqanman hinaqa kanmi tiempo waqanapaq (Eclesiastes 3:1, 4). Ronaldom nin: “Waqanayawaptinqa sapa kutim waqaq kani; mana waqaspayqa hukmanmi sientekuq kani, waqaruptiymi ichaqa sonqoy tiyaykuq”. Ichaqa wakillankum llakisqa kasqankuta waqaspa qawachinku. Wakinñataqmi mayna llakisqa kaspankupas mana waqankuchu, chayna kasqaykiqa manam imananchu.

Amistadnikikunamanta ama karunchakuychu (Proverbios 18:1). Ronaldom nin: “Sapallay kayta munaspaypas pi watukamuwaptinqa sumaqllatam chaskiykuq kani. Chaymantapas imayna sientekusqaymantam señorayman chaynataq amistadniykunaman willakuq kani”.

Imatapas nisuspayki sonqoykita pipas nanachiptinqa ama sientikuychu, wakinqa ichapas nisunkiman “amaña llakikuychu” nispa. Ronaldom nin: “Consuelawayta munaspankum imatapas niwaqku, ichaqa chayna rimasqankuqa astawanmi hukmanyachiwarqa”. Rimasqankupi piensanaykimantaqa Bibliapa kayna nisqanta kasukuy, “ama creeychu llapa rimasqankuta” nisqanpi (Eclesiastes 7:21).

Wañusqakuna imayna tarikusqankumanta yachay. Ronaldom nin: “Eclesiastes 9:5 nisqanpim Biblia willakun wañuqkunaqa imawanpas manaña ñakarisqankumanta, chayta yachasqaymi kallpanchawan. Nintaqmi kawsarimuspanku kay Pachapi kawsanankumantapas. Chaywanmi piensani wañukuq familiayqa viajepi hina kasqankumanta” (Hechos 24:15).

Diosmi prometen: wañuyta wiñaypaq chinkachinanpaq (Isaias 25:8). *