Willaykuwayku warmacha kasqaykimanta.

Italia nacionpim 1943 watapi nacerqani. Uchuychalla llaqtachapim wawqi-paniykunawan kuska wiñarqani. Taytaymi chakrapi llamkaq hinaspa carpintero karqa. Tayta-mamaykum uywawaqku catolica religionpi.

¿Imanasqataq cura kayta munarqanki?

Warmachaymantapacham sapa kuti misaman rispa curapa rimasqanta uyariq kani. Misapi ima ruwasqanwanpas admirakuqmi kani, gustawaqmi rimasqanpas. Chaymantapacham cura kayta munarqani. Chaymi 13 wataypi kachkaptiy mamay aparuwarqa warmachakuna curakuna kanankupaq yachachiq escuelaman.

¿Bibliatachu chay escuelapi estudiarqanki?

Manam anchatachu. 15 wataypi kachkaptiymi profesorniy quykuwarqa Jesuspa vidanmanta rimaq huk librota, chaytam achka kutikama leerqani. 18 wataypiñataqmi Roma llaqtaman ripukurqani curakunapa cuentallikusqan universidadpi estudiaq. Chaypim estudiarqani latín, griego, historia, filosofía, psicología, teología nisqanta. Chaymantapas Biblia leesqaykutam sapa kuti umallaykumanta niq kaniku, chaynallataq sapa domingo misapipas chayta uyariq kaniku. Ichaqa yanqa-yanqallatam estudiaq kaniku.

Chaymantapas, ¿ima ruwayniyuqraqtaq karqanki?

Curakuna kananpaq wasipipas cuentallikuqmi karqani, chaynataq iglesiapa leyninkunamanta yachachiqpas.

¿Imanasqataq iglesiaykimanta iskayrayayta qallaykurqanki?

Karqam kimsa razonkuna: qawarqanim iglesia catolica politicawan chaqrukusqanta, curakunapas hinaspa runankunapas mana allin ruwasqanta, chaynataq iglesiapa yachachikuyninkuna mana Bibliapa nisqanman hina tupasqantapas. ¿Imaynamá kuyakuq Diosqa wiñaypaq ñakarichinman wañukuq runata? ¿Chiqaptachu kuti-kutirispa santo rosariota rezakunanchikta munan? *

¿Imatam ruwarqanki?

Diospa yanapakuynintam waqaykuspay mañakurqani, hinaspaymi chayllaraq lluqsimuq italiano rimaypi Biblia de Jerusalén nisqantapas rantiruspay leeyta qallaykurqani. Domingo punchawmi misa ruwasqay pachayta warkuchkaptiy iskay runakuna yaykuykamurqa. Paykunam Jehova Diospa testigon kasqankuta niwarqa, hinaptinmi rimayta qallaykurqani. Yaqa huk hora masnintam rimarqani Bibliamanta chaynataq achka religionkunamantapas.

¿Imataq admirachisurqanki paykunamanta?

Admirakurqanim Diosmanta imam kaqta willawasqanwan chaynataq mana sasachakuspallan catolica Bibliata servichikusqanwanpas. Mario sutiyuq testigom watukamuwayta qallaykurqa sapa sabado madrugaw ninakusqayku horapi.

¿Ima niqkutaq wakin curakuna watukamusuptiki?

Paykunatapas nirqanim estudiasqaykupi kanankupaq, ichaqa manam mayqanninkupas sunqumanta Biblia estudiaytaqa munarqakuchu. Ñuqam ichaqa yachayta hinalla munaspay yacharurqani imanasqa Dios sasachakuykunata chaynataq ñakariykunata saqisqanmanta, chayqa admirachiwarqam.

¿Pipas harkasurqankichu Biblia estudiasqaykita?

1975 kaq watapim Roma llaqtaman rirqani testigokunawan Biblia estudiasqaymanta willakuq, chaymi curakunamanta cuentallikuqkuna niwarqa pantayta yachachiwasqankuta. Ichaqa manam Bibliawanchu chaytaqa niwarqa. 1976 kaq watapa 9 enero killapim huk cartata ruwarqani catolico kasqaymanta lluqsikunaypaq, hinaspam Roma llaqtaman apachirqani. Iskay punchaw pasaytañataqmi chay curakuna kanankupaq cuentallikuq kasqaymanta lluqsikurqani, hinaspaymi Jehova Diospa testigonkunapa huñunakuyninman chayllaraq rirqani. Chayqa Jehova Diospa hatun huñunakuyninmi karqa. ¡Admirasqan tarikurqani! Llapallankupam Biblianku kasqa, llapallankutaqmi Bibliankupi maskaqku yachachimuqpa nisqantapas.

¿Ima nirqataq wasikipi kaqkuna?

Yaqa llapankum piñakururqaku. Ichaqa huknin wawqiymi Bibliata estudiachkarqa Jehova Diospa testigonwan Lombardía (Italia) nisqan llaqtapi. Chaymi watukuq rirqani, hinaptinmi chaypi testigokunapas yanapawarqa imapi llamkanaypaq hinaspa maypi yachanaypaqpas. Chay watam Jehova Diospa testigonña kanaypaq bautizakurqani.

¿Kusisqachu tarikunki testigo kasqaykiwan?

Arí, kunanqa kusikunim Dios riqsisqaywan, Bibliallam yachachiwarqa pim Dios kasqanmanta. Manam Bibliapa nisqanman hinaqa huk yachachikuyqa kanchu. Kunanqa mana iskayrayaspaymi pim Dios kasqanmanta runakunaman willakuni.