Leeqkunapa tapukuyninkuna

¿Haykapim pipas kaqllamanta bautizakunman?

Wakinpiqa pipas piensanmanmi bautizakusqan mana valorniyoq kasqanta hinaspa kaqllamanta bautizakuytapas. Ejemplopaq, chayqa kanman bautizakusqan tiempopi mana pipa yachasqallanta hatun huchata ruraptinmi, chayna hucha ruraqqa congregacionmantam qarqochikun. ¿Chayna kachkaspanqa Diosman qokuyta atinmanchu karqa? Manam. Diosman qokusqan chaskisqa kananpaqqa mana allin ruraykunatam puntata saqenan karqa. Huchata rurachkasparaq bautizakuspanqa, kaqmanta bautizakuyninqa allinmi.

Kunanñataq rimasun hukmantaña: huchata mana rurachkaspan pipas bautizakurunman hinaspa tiempopa pasasqanman hina hatun huchata ruraruptin congregacionpi ancianokuna juzganmanku. ¿Ninmanchu chay tiempopiqa manam allinta entienderqanichu chaymi bautizakusqay mana servinchu, kaqmanta bautizakusaq nispa? Huchanmanta ancianokuna juzgaspankuqa manam bautizakusqanmanta iskayrayachinankuchu nitaq chaymanta ima piensasqantapas tapunankuchu. Bautizakuspanqa uyarirqam bautizakunanpaq tanteasqanmanta rimaq huk discursota. Diosman qokuymanta hinaspa bautizakuymanta discurso qoqpa tapusqantapas iskaynintam arí nispa contestarqa. Chaymantañam pachanta cambiakuspan bautizakurqa. Rurasqanmantaqa entienderqam, chaymi ancianokunaqa juzgananku bautizasqa iñiqmasinchikta hina.

Bautizakusqanmanta iskayrayaptinqa, ancianokunam ninmanku kay revistakunata leenankupaq: La Atalaya 1960 watapi 15 de agosto, 511 paginata hinaspa 1964 watapi, 15 de julio, 443-446 paginankunata, chaypim kaymanta allinta yachachichkan. Sichu ima razonraykupas pipas kaqmanta bautizakuyta tantearunman, bautizakusqan tiempokama Bibliapa nisqanta mana allinta entiendesqanrayku, hinaptinqa paymantañam chayqa kanqa.

¿Imakunamantam cristianoqa tanteanan huk wasillapi hukkunawan yachayta piensaspaqa?

Wasita llapallanchik necesitaptinchikpas, achka runakunam mana wasiyoq kanku. Ichapas qollqe mana kaptin, onqospa otaq imanasqapas wakinkuqa karu ayllunkuwan huk wasillapi yachanku. Wakin nacionkunapiqa achkallañam aylluntin ñiti-ñiti yachanku huk cuartollapi, chaymi sapallanku kayta mana atinkuchu.

Jehová Diospa llaqtanqa manam imayna yachanamanta willawananchikpaqchu obligasqa kachkan. Ichaqa cristianokunatam kallpanchan Bibliapa yachachikuyninman hina allinta tanteanankupaq, chaynapi imayna yachasqanku Diospa munasqanman hina kananpaq. ¿Imatam Biblia consejan?

 Piensanankum hukkunawan yachaspanku imayna tarikunankupi hinaspa Dios servisqankupi imayna kanankupipas. ¿Imayna runakunawantaq yachanqaku? ¿Jehová Diosta serviqkunachu kanku? ¿Kasukunkuchu Diospa Palabranpa nisqankunata? Manam haykapipas qonqanachu Pablopa kayna nisqanta: “Amayá engañachikuychikchu [. . .]. Mana allin amistadkunaqa urmachinmi allin kawsaqkunatapas” (1 Cor. 15:33).

Chaynataq, Bibliaqa sutillatam nin huchapakuyta Jehová Dios cheqnisqanta (Heb. 13:4). Paypaqqa manam allinchu manaraq casarakuspa warmi-qari kuska yachasqankuqa. Cristianoqa manam yachananchu huchapakuyqa allinmi niqkunawanqa.

Jehová Diosqa favornin maskaqkunatam nin: “Amamá huchapakunkichikchu”, nispa (1 Cor. 6:18). Manachá allinchu kanman hukkunawan yachasqanchikpi huchapakunapaq tentacionkuna kaptinqa. ¿Kanmanchu haykapipas tentacionkuna huk wasillapi achka cristianokuna yachaptinku? ¿Imataq pasanman wakinku lloqsiruptin huk qariwan warmi sapallanku tarikuptinku? Manataqmi allinchu kanman casarakunankupaq reqsinakuqkuna chay wasillapi yachayninkuqa. Tanteoyoq runaqa chaykunamantaqa cuidakunanmi.

Manataqmi allinchu kanman divorciakuqkunapa chay wasillapi yachayninkuqa. Paykuna allinta reqsinakusqankuraykum huchapakuyman chaylla wichiykunmanku (Pro. 22:3).

Piensananchiktaqmi vecinokunapa ima ninankumantapas. Cristianopaq hukkunawan kuska yachay allin rikchakuptinpas, wakinpiqa vecinonkunam mana allinta rimanmanku. Manam munanchikchu Jehová Diospa sutinmanta mana allinta rimanankutaqa. Apostol Pablopa kayna nisqantam kasukunanchik: “Amayá huchallichiychikchu judiokunatapas nitaq mana judiokunatapas nitaq Diospi iñiqkunatapas. Ñoqaqa llapallankutam agradayta munani lliwpi, manam maskani kikiypa allinniytachu aswanqa wakinkunapatam chaynapi salvasqa kanankupaq” (1 Cor. 10:32, 33).

Wakinpiqa sasam kanman Jehová Diospa nisqanman hina rurayqa. Chayna kaptinpas, llapallanchikmi cristianokunaqa Jehová Diosta ‘agradananchik’. Segurakunanchikmi yachasqanchik wasipi imapas allin kananpaq (Efe. 5:5, 10). Chaymi Diosta mañakunanchik yanapawananchikpaq hinaspa atisqanchikta rurananchik imayna yachasqanchikpi cuidakunapaq hinaspa Jehová Diospa sutinta mana qachachanapaq.