Leeqkunapa tapukuyninkuna

Genesis 6:3 Dios kaynata nirqa: ‘Manam wiñaypaqchu espirituyqa runawan yachanqa, cheqaptapunim payqa runalla, kawsanqaqa pachak iskay chunkan watallatañam’. Chaynata Jehová Dios nispanqa, ¿120 watallataña runakuna kawsanankutachu nichkarqa? Otaq, ¿nichkarqachu chayna watakunata Noey predicananmanta?

Iskaynin tapuymantam nichwan mana chayna kasqanta.

Manaraq Llumpay para chayamuchkaptinqa achka runakunam pachaknintin watakuna kawsarqaku. Noeypas Llumpay para chayamuptinqa 600 watayoqmi karqa hinaspa 950 watanpi wañukurqa (Gen. 7:6; 9:29). Llumpay para qepata naceqkunapas 120 wata mastaraqmi kawsarqaku, Arfaxadmi wañukurqa 438 hinaspa Salañataq 433 watanpi (Gen. 11:10-15). Moisespa tiemponpiqa runakunam 70 otaq 80 watallataña kawsaqku (Sal. 90:10). Chaymi, Genesis 6:3 nisqanqa manam qawachinchu 120 watata runakuna kawsananmantachu nitaq chayna watayoq kanankamalla kawsanantachu.

Hinaptinqa, ¿Noeymanchu Dios willachkarqa 120 wata pasaruptin paypa wiñaymasinkunata puchukachinanmanta willananpaq? Manataqmi. Wakinpim Bibliaqa sutillata willawanchik Noeywan Dios rimasqanmanta. Ejemplopaq, nisqanpa qatiqnin 13 versiculopim kaynata nin: ‘Chaymi [Dios] nirqa Noeyta: “Tantearunim llapa runakuna chinkarachiyta kay pachaqa paykunarayku dañanakuyllapiña kasqanrayku”’, nispa. Watakuna pasaptin buque rurayta tukuruptinpas ‘Noeytam Tayta Dios nirqa: “Qamqa wasikipi lliw kaqkunapiwanyá yaykuy buqueman”’, nispa (Gen. 6:13; 7:1). Huk versiculokunapipas tarinchikmi imakunamantapas nisqanta (Gen. 8:15; 9:1, 8, 17).

 Ichaqa, Genesis 6:3 versiculopiqa manam chaynachu, manam Noeypa sutin rikurinchu nitaq qawachinchu paywan Dios rimasqantapas. Chaymi kay textopa nisqanqa kanman ima rurananmanta otaq tanteasqanmanta Diospa nisqan (tupachiy Genesis 8:21). Runa manaraq unanchasqa kasqan tiempopipas Bibliaqa achka kutitam kaynata nirqa: “Chaymantam Dios nirqa”, nispa (Gen. 1:6, 9, 14, 20, 24). Jehová Diosqa manam runawanchu rimachkarqa, manaraqmi Adantaqa unancharqachu.

Genesis 6:3 versiculopiqa Diosmi chay tiempopi mana allin ruraq runakunata puchukachinanmanta nichkarqa. Llapan juezkunamanta aswan allin Juez Diosqa tantearurqam 120 wata tukuyta chayta rurananpaq, chaytaqa Noeyqa manaraqmi yacharqachu. ¿Imanasqam chaynata tantearurqa? ¿Imanasqam suyarqa?

Pedrom chaymanta nin: ‘Paykunatam pacienciawan Dios suyarqa [. . .] buqueta Noey ruranankama. Buquepiqa pusaq runakunallam yakumanta salvakurqaku’, nispa (1 Ped. 3:20). Qawasqanchikman hinaqa, Jehová Dios 120 wata suyananpaq tantearuptinqa tukuy imakunaraqmi pasanan karqa. Chay nisqanmanta 20 wata pasaruptinmi Noeypa punta churin nacerurqa (Gen. 5:32; 7:6). Chaymantam 2 qari churinkunaraq karqa, kimsankum wiñaspanku casarakurqaku chaymi llapankuqa karqaku ‘pusaq runakuna’. Chaymantam buqueta rurarqaku, unay tiempopichá rurarqaku hatu-hatun kasqanrayku hinaspa ruraqkuna aslla kasqanrayku. Chaymi Diosqa pacienciakuspam 120 watata saqerqa tukuy chaykuna rurakunanta, chaynapi kawsaqkuna mana chinkarunanpaq. Chaynapim kasukuq pusaq runakuna “yakumanta salvakurqaku”.

Bibliaqa manam willanchu Llumpay para chayamunanmanta Noeyman Jehová Dios haykapi nisqantaqa. Ichaqa, yachanchikmi Noeypa churinkuna nacesqanmanta casarakunankukama chunkantin watakuna pasasqanta, chaymantañataq suyananku karqa 40 otaq 50 watataraq Llumpay para chayamunankama. Imayna kaptinpas, Diosmi Noeyman nirqa: “Tantearunim llapa runakuna chinkarachiyta”, nispa. Hinaspanmi willarqa buqueta rurananpaq hinaspa familiantin chayman yaykunanpaq (Gen. 6:13-18). Qatiqnin chunkantin watakunapas Noeyqa manam allin kawsaqllachu karqa. “Salvacionmanta willakuq” otaq predicaqmi karqa, chay willasqanwanmi clarota qawachirqa chay tiempopi mana allin ruraq runakunata puchukachinanpaq Diospa tanteasqanmanta. Chaynaqa, ima watapi Llumpay para chayananta Noey mana yachaspanpas segurom karqa pasananmanta, chaytam tukuy imapa pasasqanpas qawachirqa (2 Ped. 2:5).