Diospa atiyninwan tentacionkunatawan hukmanyasqa kayta atipasun

‘Chuya espiritu qamkunaman hamuptinmi atiyta chaskinkichik.’ (HECH. 1:8.)

1, 2. ¿Imatam Jesusqa qatiqninkunaman prometerqa, hinaspa imanasqam necesitananku karqa?

JESUSQA yacharqam tukuy kamachisqanta qatiqninkuna kikillankumanta mana cumpliy atinankuta. Tukuy hinastinpi predicanankuta, cheqnisqa kanankuta hinaspa pisipaq kasqankuta yachaspanmi, paykunaqa necesitananku karqa Diospa yanapakuyninta. Chaymi hanaq pachaman manaraq kutichkaspan prometerqa: ‘Chuya espiritu qamkunaman hamuptinmi atiyta chaskinkichik. Chaymi ñoqamanta willakunkichik Jerusalen llaqtapi, lliw Judea lawpi, Samaria lawpi hinaspa kay pachapa cantonkama’, nispa (Hech. 1:8).

² Chay prometesqanqa cumplikuytam qallarirqa 33 wata Pentecostes fiestapi, chaypim Jesuspa qatiqninkuna Diospa chuya espirituntakama atiyta chaskirqaku lliw Jerusalenpi predicanankupaq. ¡Manamá pipas harkayta atirqakuchu! (Hech. 4:20.) Chaymantapacham hinaspa tukupay punchawkamam kasukuq cristianokunaqa anchata necesitarqanchik Diospa atiyninta (Mat. 28:20).

3. a) ¿Imanasqam chuya espirituqa mana chaynallachu atiywanqa? b) ¿Imaynatam yanapawanchik Diospa qowasqanchik atiyqa?

³ Yuyarisun qatiqninkunaman Jesuspa kayna prometesqanta: ‘Chuya espiritu qamkunaman hamuptinmi atiyta chaskinkichik’, nispa. Ama pantasunchu, espirituwan atiyqa manamá chaynallachu. Chuya espirituqa Diosmanta lloqsiq kallpanmi, chaytam pimanpas qoykun otaq imamanpas huntaykun paypa munaynin rurakunanpaq. Atiymantañataqmi huk diccionario nin, “imatapas ruranapaq otaq rikurichinapaq” kallpa kasqanta. Chay atiyqa runapi otaq imapipas hinallam kanman, imatapas rurayta atinankama. Hinaptinqa chuya espiritutaqa tupachichwanmi bateria cargasqa kananpaq corrientepa yaykusqan kallpawan, atiyñataqmi tupanman bateriapi huntasqaña kaq kallpawan. Chuya espirituntakama Jehová Diospa qowasqanchik atiyqa yanapawanchikmi Diosman qokuspa prometekusqanchikta cumplinapaq hinaspa mana allinkunata atipanapaq (leey Miqueas 3:8 hinaspa Filipenses 4:13 *).

4. ¿Imamantam kay estudiopi yachasun hinaspa imapaqmi chaymanta yachasun?

⁴ ¿Imaynatam qawachichwan Diospa chuya espirituntakama atiy chaskisqanchikta? ¿Imaynatam yanapawanchikman sasachakuypi tarikuptinchik? Cristianokuna Diosta kasukunapaq kallpanchakuptinchikpas, achka sasachakuykunapim tarikunchik Satanaspawan mana allin runakunapa rurasqankuwan hinaspa pantaq kasqanchikwanpas. Chay sasachakuykunataqa atipananchikpunim, chaynapim Diosman sonqo kasun, sapa kuti predicasun hinaspa Dioswan amistadninchikpas allinlla kanqa. Qawasunchik imaynatam chuya espiritu yanapawanchik tentacionkunata, pisipasqanchikta hinaspa hukmanyasqanchikta atipanapaq.

 Tentacionkunata atipanapaq

5. ¿Imaynatam Diosta mañakuyqa kallpanchawanchik?

⁵ Jesusmi qatiqninkunata yachachirqa kaynata mañakunankupaq: ‘Amayá kachaykuwaykuchu pruebamanqa, aswanqa libraykuwaykuyá Diablomanta’, nispa (Mat. 6:13). Diosqa uyarinqapunim kasukuq serviqninkunataqa. Huk kutipim Jesusqa nirqa chuya espirituta Dios mañakuqninkunaman qonanmanta (Luc. 11:13). ¡Maynatam hawkayachiwanchik allinkunata ruranapaq chay atiyta qowananchikpaq prometewasqanchikqa! Arí, chaywanqa manamá nichkanchu mana tentasqa kananchikmantaqa (1 Cor. 10:13). Aswanmi nichkan tentacionkunapi tarikuptinchik Diosta astawan mañakunapaq (Mat. 26:42).

6. ¿Imatam Jesusqa servichikurqa Satanaspa munachisqanta qepanchananpaq?

⁶ Diablo tentaptinmi Jesusqa Bibliapa nisqanta qawachirqa. Chaypaqqa allintachá Bibliamanta yacharqa. Qawasun kayna nisqanta: “Bibliam nin”, “Bibliapiqa nichkantaqmi” hinaspa “Pasaway kaymanta Satanas, Bibliam nin: ‘Señor Diosllaykitam adoranki, payllatataqmi servinkipas’”, nispa. Jehová Diostawan Palabranta kuyasqanmi, Jesustaqa yanaparqa Diablopa munachisqanta qepanchananpaq (Mat. 4:1-10). Chay tentacionkunapi mana wichiykuptinmi Satanasqa pasakurqa.

7. ¿Imaynatam Biblia yanapawanchik tentacionkunata atipanapaq?

⁷ Jesusqa Bibliapa nisqanpim hapipakurqa Diablopa tentasqanta atipananpaq, ¡ñoqanchikqa astawanraqchá Bibliapiqa hapipakunanchik! Satanasta qepanchanapaqwan toqllankunapi mana urmanapaqqa, puntataqa yachananchikmi Diospa nisqankunata hinaspapas kasukunanchikmi. Achka runakunam chayta ruranku Bibliata estudiaruspanku hinaspa Diospa yachayninmantawan allin ruraq kasqanmanta entienderuspanku. Arí, “Diospa Palabranqa” atiyniyoqmi, runakunapa ‘piensasqankunatawan munapayasqankunata’ reqsichisqanrayku (Heb. 4:12). Chaymantapas Bibliata astawan leespa hinaspa yuyaymanaspaqa, astawanmi entiendesun Jehová Dios confianapaq hinaspa cheqap kasqanta (Sal. 25:10). Biblia atiyniyoq kasqanraykum, tiempochakuna sapa kuti pantasqanchikpi yanapawaqninchik textokunapi yuyaymananapaq.

8. ¿Imakunatam rurananchik Diospa espiritunwan huntasqa kanapaq?

⁸ Jesusqa tentacionkunatam atiparqa manam Bibliata allinta reqsisqanraykullachu, aswanqa ‘chuya espiritupa huntasqa’ kasqanraykupas (Luc. 4:1). Pay hinam ñoqanchikpas kallpayoq kachwan Jehová Dioswan allin amistad kaspanchikqa. Hinaptinqa, ¿imaynatam Diosman asuykuchwan? Bibliata estudiaspa, mañakuspa hinaspa huñunakuykunamanpas rispa, chaykunatam allintapuni servichikuna espiritunwan huntasqa kananchikpaq (Sant. 4:7, 8). Achka iñiqmasinchikkunam reqsikunku Dios serviypi afanasqa kayqa allinpuni kasqanta. Ninkum iñiyninkuta kallpanchaq allin piensaykunata qosqanta.

9, 10. a) ¿Ima tentacionkunam llaqtaykipi astawan qawakun? b) ¿Imaynatam yuyaymanayqa hinaspa Diosta mañakuyqa yanapawachwan tentacionkunata atipanapaq, aswanraq pisipasqa kaptinchik?

⁹ Piensasun kay tentacionkunapi: Casado kaspaqa, ¿munapayarqanchikchu hukta? Otaq soltero kaspanchikqa, ¿iskayrayarqanchikchu Diosta mana serviqkuna lloqsinanchikpaq invitawaptinchik qepanchanapaq? Televisionpi otaq Internet nisqapi millakuypaq kaqkuna lloqsiramuptin, ¿hinallachu qawayta munarqanchik? Kaykunapi mana wichiykunapaqmi piensananchik imapi tukunanmanta: pisi-pisimantamá hatun huchakunata ruraruchwan (Sant. 1:14, 15). Piensasuntaq, chay mana allin rurasqanchikwanmi Jehová Diosta, iñiqmasinchikkunata hinaspa familianchiktapas llakichichwan. Ichaqa Diospa nisqankunata kasukuptinchikqa conciencianchikmi hawka kanqa (leey  Salmo 119:37 hinaspa Proverbios 22:3). Rimamusqanchik tentacionkunapi haykapipas tarikuspaqa, Diosta mañakusun kallpanta qowananchikpaq.

¹⁰ Jesuspa pasasqan tentacionkunamanta willakuyqa, kaytawanmi yachachiwanchik. Payqa 40 punchawñam mana mikusqa kachkarqa Satanas chunniqpi tentaruptinqa. Diabloqa yacharqachá chayna tarikusqan tentananpaq allin ‘punchaw’ kasqanta (Luc. 4:13). Kunanpas chaynatam ruran, iñiyninchikpi hukmanyasqa kasqanchikta qawaspanmi tentawanchik. Chaymi iñiyninchikpi qaqa hina kayqa ancha allin. Pisipasqa otaq hukmanyasqa kaspanchikqa astawanmi Jehová Diosta mañakunanchik waqaychawananchikpaq hinaspa espiritunta qowananchikpaq (2 Cor. 12:8-10).

Pisipaytawan hukmanyayta atipanapaq

11, 12. a) ¿Imanasqam kay tiempopi achka runakuna hukmanyasqa tarikunku? b) ¿Imam kallpanchawasun hukmanyasqa kasqanchikta atipanapaq?

¹¹ Pantaq kasqanchikraykum wakinpiqa hukmanyanchik, aswanraqmi ima tiempomantapas llumpay sasachakuypi kawsasqanchikrayku (2 Tim. 3:1-5). Armagedon punchaw asuykamuptinmi qollqemanta, imayna tarikusqanchikmanta hinaspa imakunamantapas astawan sasachakunchik. Chaymi achka runakuna llumpayta sasachakunku familiankuta uywanankupaq. Hukmanyasqa kasqankum llumpay pisipasqata tarichin. Chayna tarikuptikiqa, ¿imataq yanapasunki atipanaykipaq?

¹² Yuyariy, Jesusmi chuya espirituta prometewarqanchik yanapawananchikpaq (leey Juan 14:16, 17). Chayqa mana tupachiy atina kallpam. Chaywanmi Jehová Diosqa ‘llimparichkaq’ kallpata qowanchik ima sasachakuytapas atipanapaq (Efe. 3:20). Apostol Pablom niwanchik Diospa chuya espirituntakama ‘hatu-hatun atiy’ chaskisqanchikta, aswanraq “kaylawmanta-waklawmanta” sasachakuykuna hamuptinqa (2 Cor. 4:7, 8). Jehová Diosqa manam niwanchikchu hukmanyayta chinkachinanmantaqa, ichaqa niwanchikmi espiritun kallpanchawananchikta (Fili. 4:13, NM).

13. a) ¿Imaynatam Stephanie atiyta chaskirqa onqoyninta aguantananpaq? b) ¿Reqsinkichu pi cristianotapas chayna tarikuqta?

¹³ Qawasun 19 watanpi Stephanie sutiyoq precursoramanta. 12 watanpim cerebronpi venachan toqyarurqa hinaspa tumortapas tarirurqaku. Chaymantam iskay kutikama operarqaku, radioterapia nisqata rurarqaku hinaspapas iskay kutikamaraq cerebronpi venachan toqyarurqa, chayraykum manaña allintachu  rikukun nitaq ichoq law cuerponpas allintaqa kuyunñachu. Chaymi payqa kallpanta allinta servichikun huñunakuypaq hinaspa predicananpaqpas. Ichaqa cuentatam qokun aguantananpaq Dios imayna yanapasqanta. Ejemplopaq, qellqanchikkunapi rikuriq experienciakunam hukmanyasqa kaptin anchata kallpanchan. Iñiqmasinkunam kallpanchan tarjetakunata apachispanku hinaspa manaraq huñunakuy qallarichkaptin chaynataq tukuruptin paywan rimaspanku. Bibliamanta yachay munaq wakin runakunapas Stephanie yachachinanpaqmi wasinman rinku. Chaykunaraykum payqa Jehová Diosta anchata agradecekun, hinaspam Salmo 41:3 gustasqan texto paypi cumplikun.

14. ¿Imatam mana rurananchikchu pisipasqa otaq hukmanyasqa tarikuspanchik hinaspa imanasqa?

¹⁴ Pisipasqa otaq hukmanyasqa kaspanchikqa ichapas allinninchikpaq kasqanta piensaspa manaña llumpaytaqa Bibliata estudiachwanchu nitaq predicachwanchu otaq huñunakuchwanchu. Ichaqa aswan mana allinninchikpaqmi kanman chayqa. ¿Imanasqa? Dios serviypi rurayninchikkunam yanapawanchik chuya espirituta chaskinapaq, chaymi kallpanchasqa tarikunchik (leey Mateo 11:28, 29). ¿Manachu huñunakuyman pisipasqallaña rispanchikpas tukuruptinqa aswan kallpanchasqaña tarikunchik?

15. a) ¿Diosqa nirqachu Jesuspa qatiqnin kay facil kasqanta? Kutichisqaykita huk textowan qawachiy. b) ¿Imatam Diosqa prometewanchik, hinaspa ima tapukuymi kan?

¹⁵ Arí, sasamá Cristopa qatiqnin kayqa, anchatam kallpanchakuna hinalla qatiqnin kananchikpaqqa (Mat. 16:24-26; Luc. 13:24). Pisipasqa tarikuptinchikqa Jehová Diosmi espirituntakama atiyninta qowasun. Isaiasmi nirqa: “Diospi confiakuqkunam ichaqa mosoqmanta kallpanchakunqaku [. . .] anka hinaraq pawarinqaku. Kallpaspankupas manam pisipanqakuchu. Maynata purispankupas manam desmayanqakuchu”, nispa (Isa. 40:29-31). Ichaqa tapukuchwanmi, ¿imanasqam wakinkuqa Dios serviypi ruraykunata llumpay pisipanapaq hinata qawanku?

16. ¿Imatam rurachwan pisipasqa otaq hukmanyasqa mana tarikunanchikpaq?

¹⁶ Bibliam lliw cristianokunata niwanchik aswan “allin kaqkunata” maskanapaq (Fili. 1:10). Cristianokunapa vidantam Pablo tupachirqa karu-karuman kallpaywan, hinaspam nirqa: “Llasawaqninchik qepita saqechkaq hinayá [. . .] kallpasqanchikta pacienciawan seguisunchik”, nispa (Heb. 12:1). Kay rikchanachiyqa qawachichkanmi, mana ancha valorniyoq ruraykunata saqenapaq. Ichapas tiemponchik mana haypawaptinchikpas llumpayta ima ruraykunapipas afanakuchkanchik, hinaspa pisipasqa otaq preocupasqa tarikunchik. Chaynaqa allinmi kanman kayna tapukuyninchikqa: “¿Llumpaytachu llamkayman qokuchkani? ¿Sapa kutichu kusirikunaypaq viajachkani? ¿Hayka tiempotataq pukllayman otaq huk kusirikuymanpas qochkani?”, nispa. Yachayniyoq kaymi hinaspa atisqanchikta otaq mana atisqanchikta reqsikuymi, yanapawasun mana ancha valorniyoq kaqkunapi mana afanakunapaq.

17. ¿Imanasqam wakin cristianokunaqa hukmanyasqa tarikunku, hinaspa Diospa ima prometesqanmi kallpanchanman?

¹⁷ Wakin cristianokunaqa ichapas hukmanyasqa tarikunku unay watataña Diospa piñakuyninta suyasqankurayku (Pro. 13:12). ¿Imataq paykunata kallpanchanman? Habacuc 2:3 nisqanmi, chaypim nin: “Ñoqapa señalasqay tiempopim kay revelacion qosqayqa  cumplikunqa. Tukupay tiempokunapim cumplikunqa. Manapunim llullachu kayqa. Unamuptinpas suyaykuyá qamqa. Chayamunqapunim chay punchawqa”, nispa. Qawasqanchikman hinaqa, Diosqa prometewanchikmi señalasqan tiempopi piñakuynin chayamunanta.

18. a) ¿Diospa ima promesankunam kallpanchawanchik? b) ¿Imamantam qatiqnin estudiopi yachasun?

¹⁸ Arí, Diosta kasukuq serviqninkunaqa munanchikmi pisipaywan hukmanyasqa kayninchik tukurunantaña, hinaspa llapallanchik mozo-sipas hina kallpayoq kayta (Job 33:25). Kunanpas Diospa chuya espiritunwanmi kallpanchasqa kachwan Dios serviypi rurayninchikkunata ruraspaqa (2 Cor. 4:16; Efe. 3:16). Amayá pisipasqaykiwanqa harkachikuychu hamuq tiempopi bendicionkuna chaskiytaqa. Mosoq pacha chayamuptinmi llumpay pisipayqa, tentacionkunaqa hinaspa hukmanyayqa tukunqaña. Qatiqnin estudiopim yachasun imaynatam chuya espiritu atiyta qowanchik qatikachasqa kayta, mana allinkunata ruranapaq hikutawasqanchikta hinaspa huk sasachakuykunatapas atipanapaq.

[Willakuy]

¿Imatam niwaq?

• ¿Imaynatam Biblia estudiasqanchik kallpanchawanchik?

• ¿Imaynatam Diosta mañakuyqa, yuyaymanaypas kallpanchawanchik?

• ¿Imatam rurananchik hukmanyasqallaña mana tarikunapaq?

[Kay yachachikuypa tapukuyninkuna]

[24 kaq paginapi dibujo]

Huñunakuykunaqa iñiyninchiktam kallpanchan