Qechwapi Diospa sutinta qawaychik

SAINT MORITZ. ¿Uyarirqankichu kay sutita? Yaqapaschá, kayqa ancha reqsisqa sumaqllaña llaqtam. Kayqa Suiza nacionpim kachkan, Italia nacionpa waqtanpi hinaspa sumaqllaña ritiyoq Engadina sutiyoq qechwapi, kay lawmanmi achka wataña runakuna watukunku. Watukunkutaqmi Parque Nacional Suizo nisqata qawanankupaqpas, chaypim tukuy rikchaq plantakunawan animalkunapas kan hinaspa kuyayllapaq kasqankuwan Unanchawaqninchik Jehová Diosta alabanku (Sal. 148:7-10). Alabantaqmi 1600 watakunapi chay llaqtapi runakunapa rurasqanku costumbrenkupas.

Chay qechwa llaqtapa wasinkunam admirakuypaq. Yaqa llapam wasikunapa perqanpim astawanraq punkunkupa hawanpi rikurin Diospa sutin. Pachaknintin wata qepatam,  runakunaqa costumbraqku wasikunapi sutikuna churayta, wakinpim pintaspanku, rumikunata tallaspanku otaq dibujaspankupas. Bever sutiyoq llaqtapi wasikunam fotopi rikurimun, chaypim qawanki perqankupi kayna niq qellqasqata: “Kay wasim rurakurqa 1775 watapi. Jehová Diosmi qallariypas, Jehová Diosmi tukuyninpas. Tukuy imapas Dioswanmi paywanqa manam imapas”. Qawasqanchikman hinaqa, kay qellqasqapim rikurin iskaykama Diospa sutin.

Sichu risunchik Madulain llaqtaman, aswanraqmi tarisun ñawpaq tiempopiraq qellqasqankuta, ninmi: “Salmo 127. Sichu wasita Jehová Dios mana hatarichiptinqa, yanqapaqmi albañilkunapas llamkanqaku Lucio Rumedio. 1654 wata”, nispa.

¿Imanasqataq Diospa sutinqa wasikunapa perqankunapi rikurin? Yaqa 1500 kaq watapim Bibliaqa rurakurqa romanche idiomapi chaytam Engadina llaqtapi rimanku. Arí, chay Bibliatam romanche rimayman puntataqa tikrarqaku. Biblia leesqankum chay lawpi runakunapaq allinpuni karqa. Chaymi wasinkupa perqanpi sutinkuta churaqku hinaspapas Bibliapi Diospa sutin rikuriq textokunatapas.

Pachaknintin watakuna pasaruptinpas wasikunapi qellqasqankuqa Diospa sutintam alaban. Kay llaqtayoq otaq watukuqlla kaptikipas, kallpanchaykikum Bever llaqtapi Jehová Diospa Testigokunapa Huñunakunanku Salonpi kay sumaqllaña Diosmanta astawan yachanaykipaq, chaypipas rikurinmi Diospa sutinqa.

[7 kaq paginapi reqsikusqanchikmanta]

© Stähli Rolf A/age fotostock