Internetta allinta servichikusun

KUNAN tiempopi Internet rikuriramuspan ancha yanapakusqantam, tupachinku qellqakunata ruranankupaq ñawpaqpiraq rikurimuq maquinakuna ancha yanapakusqanwan. Kay Internet rikurimusqanmantapacham willakuykunataqa chaylla enteron Pachamanpas apachiyta atichwan. Arí, tarichwanmi imaymana willakuykunatapas.

Jehová Diosqa unanchawarqanchikmi piensasqanchikkunamanta rimarinapaq hinaspa willakunapaqpas. Paymi willakuykunatawan rimanakuyta qallarichirqa, Adantawan Evata imayna kusisqa kawsanankupaq kamachispan (Gen. 1:28-30). Ichaqa tiempopa risqanman hinam willanakuykunataqa mana allinta servichikuyta qallaykurqaku. Satanasmi Evaman pantay willakuykunata nirqa. Creeruspanmi qosan Adanmanpas willarqa, paypas creerurqam. Chayraykum kunanqa llapallanchik ñakariypi tarikunchik (Gen. 3:1-6; Rom. 5:12).

¿Imatam nichwan Internetmanta? Kanmanmi allinpaq hinaspa mana allinpaqpas. Arí, yanapawanchikmanmi imakunatapas tarinapaq hinaspa tiemponchikta mana usuchinapaqpas. Ichaqa mana allinkunamanpas wichiykachiwachwanmi, hinaspapas tiemponchiktam usuchichwan. Hinaptinqa, ¿imaynatam allinninchikpaq servichikuchwan?

¿Allinchu llapallan willakuyninkuna?

Amayá piensasunchu Internetpi llapallan willakuyninkuna allin kasqantaqa. Internetman yaykuspaqa allinta otaq mana allin willakuykunatam tariruchwan, chaymi yuyayniyoq kananchik musyakunanchikpaq.

1993 watapim ancha reqsisqa huk dibujo rikurirurqa. Chaypim computadorapa ñawpaqninpi iskay allqokuna tiyarqaku, hinaptinmi huknin hukninta nirqa: “Internetpiqa manam pipas yachanchu allqo kasqaykitaqa”, nispa. Arí, Internetpiqa pipas pakanmanmi pi kasqantaqa. Kay rurayqa manam chayllaraqchu, ñawpaqtaraqmi Satanasqa culebrata servichikuspan Evata pantarachirqa Dios hina kananmanta. Kunanpas Internetpiqa pipas pantarachiwachwanmi imayna kasqankuta  pakaspanku. Imapas munasqantam ninman hinaspa ima fotokunatapas churarunmanmi.

Chaynaqa, amayá engañachikuq Eva hinaqa Internetpi lliw niwasqanchikkunataqa creerusunchu. Chaymi kaynata tapukunanchik: 1) ¿Pitaq qellqamuwachkan? 2) ¿Imapaqmi qellqamuwachkan hinaspa imatam munan? 3) ¿Yachakunchu imamantam horqosqa kachkanku chay apachimuwasqanchik? 4) ¿Chay apachimuwasqanchikqa cheqapchu kanman? Chaymi allinpuni apostol Pablopa Timoteoman kayna nisqanta kasukuyqa: “Yachasqaykikunatayá sonqoykipi takyachiy, amayá uyariychu mana respetowan yanqapas-yanqa rimaqkunataqa nitaq iñisqanchikpa contranpi: ‘Ñoqaykuqa yachaywanmi rimaniku’ nispa yanqa rimaqkunatapas” (1 Tim. 6:20).

¿Allintachu tiempoyta servichikuchkani?

Internetta allinta servichikuspaqa manam usuchinchikchu tiemponchikta, qollqenchikta hinaspa kallpanchiktapas. Chaymantapas wasinchikmantam chaylla imakunapapas precionta yacharuchwan hinaspa rantichwanpas, qollqenchiktapas Bancomantam horqochwan, telefonokunapa numeronkunatapas tarichwanmi hinaspa imakunatapas. Jehová Diospa testigonkunapa oficinankunapas chaytam servichikunku imapas chaylla ruranankupaq.

Ichaqa manam llapallanpichu allin kanman. Wakinkuqa Internettam servichikunku pukllanallankupaq. Una-unay chaypi kaspankum familiankuta, amistadninkunata hinaspa iñiqmasinkunatapas qepancharunku. Arí, chayllapiñam kachkanku. Kayqa sapa kutiñamá qawakun. 2010 watapi huk estudio rurasqankum qawachin Corea nacionmanta achka (18,4%) mozo-sipaskuna Internetllawan allin tarikusqankumanta. Alemania nacionpi yachaysapa runakunapas kaynatam ninku: “Sapa punchawmi casarasqa warmikuna ninku qosanku Internetllapiña tarikusqankuta”, nispa. Huk kaqninmi llakikustin qosanmanta nirqa Internetpi llumpayta kasqanrayku casado vidanku yanqachakurusqanmanta.

Betel wasipi kaqkunam huk runamanta cartata chaskirqaku, paymi reqsikurqa Internetman llumpayta qokurusqanta. Wakinpiqa chunka horapunis Internetpi kasqa. Qallariypiqa allinmi rikchakurqa, ichaqa pisi-pisimantam huñunakuykunamanpas manaña rirqañachu hinaspa Dios mañakuytapas saqerurqa. Chaymantapas wakillanpim huñunakuyman rinanpaq preparakuq hinaspapas chayllam kutikamuyta munaq Internetman yaykunanpaq. Kusikuypaqmi ichaqa, mana allin rurasqanmanta cuentata qokuruspanmi kallpanchakurqa saqenanpaq. ¿Imatam kaymanta yachachwan? Tiemponchiktam  allinta servichikuna Internetman yaykuspaqa, mana chayqa kay runa hinam tukuruchwan.

¿Allinninchikpaqchu kanman?

1 Tesalonicenses 5:21, 22 kaynata niwanchik: “Tukuy ima nisqankuta pruebaspayá allin kaqta waqaychaychik. Waqaychakuychikyá tukuy mana allinkunamanta”, nispa. Kallpanchakunanchikmi tukuy rikusqanchikkuna Jehová Diospa munasqaman hina kananpaq. Amayá Internetman yaykuspaqa mana allin kaqkunataqa qawasunchu. Chaypiqa millakuypaq qalalla qawaykunam tarikun, mana cuidakuspaqa chaypim wichiykuchwan.

Chaynaqa tapukusun: “¿Penqakuymanchu qonqayllamanta tayta-mamay, iñiqmasiy, señoray otaq qosay yaykumuspan ima qawasqayta tariruwaptin?”, nispa. Chayna kaptinqa pipas wasinchikpi kaptillanmi Internetman yaykuchwan. Cheqaptamá Internetqa yanapawanchik rantipakunapaq hinaspa hukkunawan parlanapaqpas, ichaqa ‘sonqopim hukwan pierdekuy huchata ruraruchwan’ (Mat. 5:27, 28).

¿Allinchu kanman kaqmanta apachiy?

Internetman yaykuspaqa atichwanmi imapas maskayta hinaspa hukkunaman imapas apachiyta. Chaymi imatapas apachispaqa kallpanchakunanchik allin kananpaq. Tapukusun: “¿Segurochu kachkani cheqap kasqanmanta? ¿Pikunamanpas apachiymanchu? * ¿Allinchu hinaspa kallpanchakuqchu? ¿Imanasqataq apachiyta munani? ¿Allin qawawanankuta munaspaychu?”, nispa.

Internetpi qellqaspa apachiyqa yanapawachwanmi, ichaqa chayllamantaqmi qokuruchwan. Wakinkum achka noticiakunata hinaspa yanqa willakuykunata lliw amistadninkunaman apachinku, chaynapim tiemponkuta usuchinku. Chaypi mana wichiykunapaqmi allinta tanteakunanchik apachinapaqqa. Ñawpaqpi runakunaqa cartatam qellqarqaku familiankuman hinaspa amistadninkunaman imayna tarikusqankumanta willanankupaq. ¿Manachu kunanpas chaykunallata willanapaq servichikuchwan? ¿Allinchu kanman mana cheqap kaqkunata apachiyqa?

Kaykunawanqa manamá nichkanchikchu Internetman mañana haykapipas yaykunamantaqa. Ichaqa wakinpiqa yaqapaschá chaynata rurana kanqa, hanaypi rimamusqanchik Internetman qokuruq runa hina. Allinta tanteaspa Internetta servichikuptinchikqa allintamá yanapawasun (Pro. 2:10, 11).

[Willakuy]

[4 kaq paginapi dibujo]

¿Imanasqam cuidakunanchik Internetpi willakuykunamanta?

[5 kaq paginapi dibujo]

¿Allinta tanteaspachu tukuy imatapas Internetpi apachinchik?