Leeqkunapa tapukuyninkuna

¿Imatam rurayman Biblia leesqaymanta tapukuyniy kaptin otaq imapas sasachakuyniy kaptin?

Proverbios 2:1-5 nisqanmi kallpanchawanchik ‘qollqe [. . .] pakasqata hina’ yachayta maskanapaq. Kaywanqa niwachkanchiktaqmi Bibliamanta tapukuyninchik kaptin maskanamanta, hinaspa sasachakuyninchik kaptinpas allichanamanta. ¿Imaynatam chayta rurawaq?

Chaypaqmi “allin yuyayniyoq confianza sirviente” yanapakuyta qowanchik Benefíciese de la Escuela del Ministerio Teocrático qellqapa 33-38 paginakunapi “La investigación eficaz” niq yachachikuywan (Mat. 24:45). Chaynallataqmi 36 paginapipas kachkan Índice de las publicaciones Watch Tower qellqata allinta servichikunapaq yanapakuy, chaypim yachachikuykunata hinaspa Bibliapa textonkunata entiendenapaq kachkan. Chaypim atinki palabrakunapa hinaspa textokunapa ima niy munasqanmanta, chaynataq hukkunatapas yachayta. Yachay munasqaykimanta maskaspaykiqa ama apurawllamanñaqa ruraychu. Yuyarinaykim ‘qollqe [. . .] pakasqata hina’ maskasqaykita, chaypaqqa kallpanchakunam hinaspa tiempochakunam.

Nichwantaqmi qellqanchikkunapiqa manam llapallan versiculokunachu nitaq yachachikuykunachu tarikun. Wakin textokunamanta yachachikuy kaptinpas, manam yachay munasqanchikman hinachu kachkan. Chaymantapas Bibliaqa manam wakinpiqa lliwtachu willawanchik. Chaymi yachay munasqanchikta mana chayllachu tarinchik. Chayna kaptinqa manam allinchu kanman piensasqanchikman hina chayta tanteayqa. Manachayqa ‘yanqa atipanakuyllamanmi chayaruchwan’, manataqmi yanapawasunchu Diosmanta astawan yachanapaqpas (1 Tim. 1:4; 2 Tim. 2:23; Tito 3:9). Manam Diospa llaqtanpi punta apaqkunapas llapallan tapukuykunapa kutichiynintaqa tarinmankuchu, qellqanchikkunapi mama kaqmantaqa. Ichaqa kusisqam kananchik Biblianchik kapuwasqanchikmanta kaymi yanapawanchik imayna kawsakunanchikpaq. Wakinkunamanta mana yachaptinchikpas Bibliaqa yanapawanchikmi Diospi iñinanchikpaq (qaway Acerquémonos a Jehová qellqapa 185, 186 paginankunata).

Yachay munasqaykimanta tukuy imata maskaspaykipas mana tarispaykiqa, ¿imakunatam rurawaq? Atiwaqmi congregacionnikipi huk ancianota otaq yuyayniyoq cristianota tapuyta. Kay cristianokunaqa anchatam Bibliamanta yachanku chaynataq experienciankupas kanmi. Imapas sasachakuyniki kaptinqa, imayna tarikusqaykiman hinam yanapasunki. Chaynataq imapas hukmanyachisuptikiqa ama qonqaychu Diosta mañakuyta. Arí, chuya espirituta mañakuy, ‘Diosqa yuyay qokuqmi. Paytaqmi [. . .] entiendechikuqqa’ (Pro. 2:6; Luc. 11:13).