Rimarisun Angela * sutiyoq soltera cristianamanta, payqa 30 masnin watanpim kachkan. Congregacionpi ancianokuna watukamunanta yachaspanmi, payqa manchakuywan hina kachkan. Paymi kaynata tapukun: ‘¿Imataya ancianokuna niwanqa? Manamá wakin huñunakuykunamanqa rirqanichu, ichaqa llumpay pisipasqamá kutimuni yuyaq runakunata cuidaspay llamkasqaymanta’, nispa. Manam chayllachu, Angelaqa llakisqataqmi kachkan maman onqosqanrayku.

Angelata watukuq huk kaqnin anciano kaspaykiqa, ¿imatam ruwawaq kallpanchanaykipaq? (Jer. 31:25.) ¿Imaynatam preparakuwaq Angela hina pisipasqakunaman watukunayki kaptinqa?

Llapanchikmi wakinpiqa pisipanchik llamkayninchikwan otaq congregacionpi imapas ruwayninchikwan. Diosmanta willakuq Danielpas revelacionninpi rikusqanmanta mana entiendeyta atispanmi ‘eqoyasqa’ otaq pisipasqa tarikurqa (Dan. 8:27). Ichaqa angel Gabrielmi rikuriykurqa yanapaykunanpaq. Paymi entiendeykachirqa hinaspanmi nirqa mañakuyninta Dios uyariykusqanmanta chaynataq ‘llumpayta kuyasqanmantapas’ (Dan. 9:21-23). Huk kutipipas, yaqa chayna rimaykunawanmi huk angel kallpanchaykurqa (Dan. 10:19).

Chaynaqa, pisipasqa otaq hukmanyasqa iñiqmasikita kallpanchanaykipaq watukunayki kaptinqa paypi piensariy. ¿Ima  sasachakuyniyoqmi kachkan? ¿Imaynatam chayqa hukmanyachichkan? ¿Ima sumaq kayninkunatam qawachin? 20 masnin wataña anciano hina serviq Richard iñiqmasinchikmi nin: “Iñiqmasiykunapa sumaq kayninpim astawan reparani. Allintapunim kallpanchanaypaq yanapawan manaraq watukuchkaspay imayna tarikusqanmanta piensayqa”, nispa. Huk ancianomasikiwan rinayki kaptinqa, allinmi kanman iskaynikichik imayna tarikusqanmanta yachaynikichik.

Penqakunapaq hinamá imayna tarikusqanchikmanta rimayqa. Chaymi pi iñiqmasinchikpas imayna tarikusqanmanta ancianokunaman willakunanpaq sasachakunman. ¿Imatam ruwawaq mana chayna kananpaq? Chaypaqqa allinmi kanman asiriykuspa kallpanchaykunanpaq hina imatapas niykuy. Michael iñiqmasinchikmi 40 wataña anciano, paymi iñiqmasinkunata watukuspan kaynata nispan qallarin: “Ancianokunapa huk kaqnin sumaq llamkayniykuqa iñiqmasiykuta allinta reqsinaykupaq watukuyniykum. Chaymi kunan watukaykamusqaywan anchata kusikuni”, nispa.

Allinmi kanman imamantapas manaraq rimachkaspa kuska Diosta mañakuynikichik. Mañakuspanmi apostol Pabloqa rimarqa iñiqmasinkunapa iñiyninmanta, kuyakuyninkumanta hinaspa ñakariykuna aguantasqankumantapas (1 Tes. 1:2, 3). Diosta mañakuspayki iñiqmasikipa sumaq kayninkunamanta rimaspaykiqa, yanapakuchkankim allinta parlarispa kallpanchanakunaykichikpaq. Chayna ruwasqaykiqa yanapakunmantaqmi iñiqmasiki hawka tarikunanpaq. Ray sutiyoq ancianom kaynata nin: “Wakinpiqa Dios serviyninchikpi tukuy ruwasqanchiktam qonqanchik, pipas yuyarichiwaptinchikmi ichaqa kallpanchasqa tarikunchik”, nispa.

Pablo hinam qampas iñiqmasikita kallpanchayta atiwaq Bibliapa huk kaqnin textollantapas servichikuspa (Rom. 1:11). Ichapas  huk kaqnin iñiqmasinchik llumpay llakisqa kasqanrayku mana valesqanta piensanman. Salmistapas chayna tarikuspanmi ‘qosnipi chakiruq odrewan’ tupachikurqa. Chaywanpas nirqam: “Decretoykikunataqa manam qonqarunichu”, nispa (Sal. 119:83, 176). Pisillapi chay textopa nisqanmanta rimaruspaykim, iñiqmasikita niwaq Diospa kamachikuyninkunata paypas mana qonqasqanmanta.

Dios serviyninpi hukmanyaruq otaq congregacionmanta karunchakuruq cristianapa sonqonmanmi chayanman qollqenta chinkarachiq warmimanta rikchanachiy (Luc. 15:8-10). Chay qollqeqa ichapas achka qollqemanta ruwasqa ancha chaninniyoq collarpa parten karqa. Chay rikchanachiymanta cristianaman willaspayki musyachiy congregacionpi kaqkunamanta huk kaqnin ancha chaninniyoq kasqanta. Chaymantañataqmi niwaq Jehova Diospa huk kaqnin ovejachan kasqanrayku paymanta Dios ancha nanachikusqanta.

Iñiqmasinchikkunaqa yaqa llapanpim leesqanku textokunamanta rimariyta munanku. Chaynaqa, ¡manam qamllachu rimanaykiqa! Iñiqmasikiwan huk textota leeruspayki ichapas chay leesqaykichikpi mayqen palabratapas akllaykuspayki niwaq chaymanta pay rimarinanpaq. Ichapas 2 Corintios 4:16 nisqanta leeruspan ancianoqa tapunman: “¿Haykapipas musyakurqankichu hinalla ñawparinaykipaq Jehova Dios kallpanchasusqaykita?”, nispa. Chayna tapukuykunata ruwayqa yanapakunmanmi allinta ‘kallpanchanakunaykichikpaq’ (Rom. 1:12).

Chaymantapas kallpanchawaqtaqmi iñiqmasikitaqa paypa tarikusqanpi hina tarikuq Bibliapa willakusqan mayqen runamanta willaspaykipas. Pipas hukmanyasqa tarikuptinqa ichapas Diosta serviq Anamanta otaq Epafroditomanta willasqayki kallpanchanman, paykunam wakinpi llumpay hukmanyasqa tarikurqaku. Chayna tarikuspankupas Diospaq ancha chaninniyoq kasqankumanta willay (1 Sam. 1:9-11, 20; Filip. 2:25-30). Chaynaqa, atikuptinqa ¿willawaqchu Bibliapa huk kaqnin ejemplonmanta?

Iñiqmasikikunamanta interesakusqaykitam qawachiwaq watukusqaykimanta qepa punchawkunapipas (Hech. 15:36). Ichapas manaraq pasakuchkaspayki niwaq huk punchaw kuska Diosmanta willakunaykichikpaq. Piensariytaq Barnard sutiyoq anciano imayna ruwasqanpi. Payqa yanapasqan iñiqmasinwan kaqmanta tupaykuspanqa sumaqllatam tapun: “¿Imaynam kachkanki parlarisqanchikwan?”, nispa. Iñiqmasikikunamanta interesakuspaykiqa, astawan yanapanaykita munasqankutam yachanki.

Kunanmi haykapimantapas iñiqmasinchikkunaqa waqaychasqa, yanapasqa hinaspa kuyasqa kayta munanku (1 Tes. 5:11). Chaynaqa, manaraq watukuchkaspayki imayna tarikusqankupi reparay. Jehova Diospa yanapakuyninta mañakuy hinaspa kallpanchaq textokunata akllay. Chaynatamá atinkipuni ‘pisipasqakunata’ kallpanchayta.