Bibliapiqa manam tarinchikchu chayna ruwaypa contranpi nisqantaqa.

Bibliapa achka willakuyninkunapim tarinchik wakinpi ayata otaq wañusqapa tullunta kañasqankumanta (Jos. 7:25, Chuya Qellqa, 2012; 2 Cron. 34:4, 5). Chayna ruwasqankuqa ichapas qawachiq chay wañuqkuna mana pampanapaq hina kasqankuta. Ichaqa, manam chayraykuchu wakinpiqa kañaqku.

Rimarisunchik rey Saul hinaspa paypa kimsan churinkuna wañusqankumanta Bibliapa willakusqanta. Llapankum wañururqaku Filistea runakunawan peleasqankupi. Huknin churinmi karqa Davidpa amistadnin Jonatan. Galaad lawpi Jabes llaqtayoq Israel runakuna chayna wañurusqankumanta yacharuspankum tawan ayakunata hoqariramuspanku kañarqaku, tullunkutañataqmi pamparurqaku. Chayna ruwasqankumantam David paykunata alabarqa (1 Sam. 31:2, 8-13; 2 Sam. 2:4-6).

Bibliapa nisqanman hinaqa, Jehova Diosmi wañukuq runakunata kawsarichimunqa. Wañusqapa tullunkuna kañasqa otaq mana kañasqa kaptinpas, Jehova Diosqa mosoq cuerpoyoqtañam kawsarichiyta atinman. Rimarisun Jehova Diosta serviq Sadracta, Mesacta hinaspa Abed-negota, rey Nabucodonosor kamachiptin rupachkaq hornoman wischuykusqankumanta. Paykunaqa manam manchakunankuchu karqa cuerponkuta nina ruparuptin Jehova Dios mana kawsarichiyta atinanmantaqa (Dan. 3:16-18). Chaynatam nichwan Nazi tropakunapa carcelninkupi wañuchispanku kañasqa cristianokunamantapas. Diosman sonqo wakin cristianokunañataqmi imapas toqyaruptin otaq imawanpas wañukuptinku tullullankupas mana karqachu. Chayna kaptinpas, kawsarimunqakum (Apoc. 20:13).

Jehova Diosqa manam wañuqkunapa tullunkunataraqchu huñunan kawsarichinanpaqqa. Chayna kasqantam qawachiwanchik hanaq pachapi kawsanankupaq cristianokunata kawsarichisqan. ‘Espiritupa yanapakuyninwan kawsarimuq’ Jesus hinam paykunapas kawsarimuspankuqa hina kaqlla kanku piensayninkupi hinaspa imayna kayninkupi. Ichaqa manam aycha cuerpoyoqñachu kanku. Hanaq pachamanqa rinku manam aychayoq tulluyoqchu (1 Ped. 3:18; 1 Cor. 15:42-53; 1 Juan 3:2).

Kawsarimunapaq suyakuyninchikqa manam ayanchikta ima ruwasqankumantachu. Aswanqa, imapas nisqankunata ruwaq Diospi iñisqanchikmantam (Hech. 24:15). Ichapas mana allin-allintaqa entiendesunchu wañusqakunata ñawpaqpi imayna kawsarichisqanmantaqa otaq hamuq tiempopi imayna kawsarichinanmantaqa. Chayna kaptinpas, Jehova Diospim hapipakunchik, paymi ‘creenanchikpaq’ Jesusta kawsarichirqa (Hech. 17:31; Luc. 24:2, 3).

Wañuqpa ayanwan ima ruwanankumanta tanteaspankuqa, cristianokunaqa yachanankum chay llaqtapi runakuna chayna ruwaymanta imayna piensasqankuta chaynataq autoridadkuna imayna qawasqankuta (2 Cor. 6:3, 4). Hinaptinqa, ayata kañayqa otaq mana kañayqa sapakamamantam otaq sapa familiamantam.