Achka watakunam qillqanchikkuna nirqa bibliapi Magog nacionmanta Gogqa satanaswan tupachisqa kasqanmanta. ¿Imanasqam qillqanchikkunaqa chaynata nirqa? Apocalipsis qillqam nirqa Diospa llaqtanpa contranpi satanas huqarikunanmanta (Apoc. 12:1-17). Chayraykum entienderqanchik satanaspa huknin sutinqa Gog kasqanmanta.

Ichaqa chayna entiendesqanchikmi cambianqa. Qawasun imanasqa. Gog chinkachisqa kananmanta rimaspanmi Jehova Dios nirqa tukuy rikchaq alton pawaq animalkunaman chaynataq purun animalkunaman aychanta mikunanpaq qunanmanta (Ezeq. 39:4). Nirqataqmi: ‘Gog sutiyuq runamanqa Israel nacionpimá chay tiempopi qusaq pampakunanpaq huk sitiota’, nispa (Ezeq. 39:11). Satanasqa manamá aycha-tulluyuqchu, chaymi animalkunaqa mana mikunmankuchu nitaq allpapiqa pampakunmanchu. Chaymantapas, bibliaqa ninmi satanas waranqa wata wichqasqa kananmanta. Chaymi paytaqa mana ima animalpas mikunqachu nitaq allpapipas pampachikunqachu (Apoc. 20:1, 2).

Bibliaqa nintaqmi waranqa wata tukuruptin satanasqa kacharisqa kananmanta, chaynapi nacionkunata utaq Gogtawan Magogta engañananpaq, paykunatam guerrapaq huñunqa (Apoc. 20:8). Satanas Gog kaspanqa kikillanchá engañakuchkanman. Chaytaqa manamá kikillanqa ruwanmanchu. Ezequiel hinaspa Apocalipsis qillqakunam sutillata qawachin satanasqa mana Gog kasqanmanta.

Hinaptinqa, ¿pitaq Magog nacionmanta Gogqa? Chayta yachanapaqqa bibliatam estudiananchik hinaspa yachananchik Diospa llaqtanpa contranpi pi hatarinanmanta. Bibliapa willakusqanman hinam, hatarinqaku: Magog nacionmanta Gog, ‘norte lawmanta rey’ hinaspa ‘kay pachapi reykuna’ (Ezeq. 38:2, 10-13; Dan. 11:40, 44, 45; Apoc. 17:14; 19:19). Yaqachusmi kimsanmanta rimaspanpas hukllamanta rimachkan. ¿Imanasqam chaynata ninchik? Bibliam nin kay pachapi lliw kamachikuqkuna Diospa llaqtanpa contranpi hatarinankumanta, chaywanmi Armagedon guerraqa qallaykunqa (Apoc. 16:14, 16).

Diospa llaqtanpa contranpi hatarinankumanta rimaq lliw textonkunata allinta tupachispam, musyakunchik Magog nacionmanta Gogqa mana satanas kasqanta. Aswanqa, Magog nacionmanta Gogqa achka nacionkunam.  Chaynaqa, ¿pitaq chay nacionkunata umallinqa? ¿‘Norte lawpi reychu’? Chaymantaqa manam allintachu yachanchik. Ichaqa yaqachusmi chayna kanqa, Jehova Diosmi Gogta kaynata nirqa: ‘Norte lawpi nacionnikimantam hamunki achkallaña runakunapiwan hinaspa achkallaña caballopi sillasqa tropakunapiwan kuska’, nispa (Ezeq. 38:6, 15).

Diosmanta willakuq Danielpas norte lawpi reymantam yaqa chaynallata nirqa: ‘Intipa qispimunan lawmantawan norte lawmantam uyarirunqa mancharikuypaq noticiakunata, piñakuyllawanñam lluqsinqa tukuy imatapas purmachinanpaq hinaspa achka-achka runakunata wañuchinanpaq. Chay reyqa sumaqllaña carpankunatam sayachinqa lamar quchamanta Diospaq sapaqchasqa kuyayllapaq muquman riq ñanpi, ichaqa chayllapi wañunan tiempo chayaramuptinmi manaña pipas yanapanqachu’, nispa (Dan. 11:44, 45). Arí, Danielpa kayna nisqanqa yaqa chaynallam Gogmanta Ezequielpa willakusqanwan (Ezeq. 38:8-12, 16).

¿Imataq pasanqa Diospa llaqtanpa contranpi hatariptinkuqa? Danielmi nirqa: ‘Chay tiempopim rikurimunqa Miguel sutiyuq hatun kamachikuq angel, payqariki llaqtamasikikunata nanachikuq angelmi. Chay tiempoqa ñakariy tiempom kanqa. Nacionkunapa rikurisqanmantapas manam karqachu chayna tiempoqa. Manataqmá chayna ñakariyqa karqachu chay tiempokamaqa. Ichaqa chaywanpas chay tiempopim llaqtamasikikuna librasqa kanqaku. Libropi qillqasqa sutiyuqkunam lliw librakunqaku’, nispa (Dan. 12:1). Kaypi nisqanman hinam Jesucristoqa Armagedon guerrapi yanapawasun. Paymi nanachikuchkan 1914 watamantapacha. Chayna yanapawananchikmantam Apocalipsis 19:11-21 nisqanpipas willakun.

Ichaqa, ¿pitaq Apocalipsis 20:8 nisqan Gogwan Magogqa? Paykunaqa kanku waranqa wata tukuruptin Jehova Diospa contranpi churakuq llapallan runakunam. Paykunam Dios yupaychaqkunata Magog nacionmanta Gog hina chiqninqaku. Diosqa Armagedonpi Magog nacionmanta Gogta hinam paykunatapas wiñaypaq chinkachinqa (Apoc. 19:20, 21; 20:9). Chayraykuchá bibliaqa nin Gogwan Magogqa waranqa wata tukuruptin Diospa contranpi churakuq llapallan runakuna kasqankuta.

Jehova Diospa testigonkunaqa yachaytam munachkanchik ‘norte lawpi rey’ pi kasqanmanta. Pi kananña kaptinpas, kaykunamantam mana iskayrayanchikchu: 1) Magog nacionmanta Gogqa hinaspa soldadonkunaqa chinkachisqam kanqaku. 2) Kamachiqninchik Jesucristom waqaychawasun hinaspa yanapawasun musuq pachapi hawka hinaspa kusisqa kawsakunanchikpaq (Apoc. 7:14-17).