KAYPI YUYAYMANAY: Qanmi kachkawaq ñawpa qillqakunata churananku wasipi. Chay wasipi qillqakunaqa yaqa llapanmi mawkallaña hinaspa lliki-llikillaña. Wakinqa partellanñam kachkan. Ichaqa huk qillqatam rikuruwaq mana imanasqata. Hinaspam riqsichisuqniki runata tapuwaq: “¿Musuqllaraqchu?”, nispa. Payñataqmi nisunki: “Manam. Wakiqninkunamantapas aswan ñawparaqmi kay qillqaqa, manataqmi haykapipas allichaparqakuchu”, nispa. Qamñataqmi ninki: “Maypipas sumaq waqaychasqachá karqa ¿aw?”, nispa. Payñataqmi kaqmanta nisunki: “Manam. Kay qillqataqa rupaypas nitaq parapas manam imanarqachu. Hinaspapas mana allin runakunam chinkarachiyta munarqaku”, nispa. Chayrayku ichapas tapukunki: “Hinaptinqa, ¿imamanta ruwasqamá kay qillqaqa?”, nispa.

Chayna qillqamanmi rikchakun bibliapas. Wakin qillqakuna hinam ñawpaqtaraq qillqasqa karqa. Ichaqa chay ñawpaq qillqakunaqa watakunapa risqanman hinam mawkaña kachkan. Hinaspapas nisqankunaqa watakunapa risqanman hinam allichasqa karqa. Yaqa llapanpitaqmi imawan hampikunapaq nisqankunapas mana allinninchikpaqchu. Chaymantapas, yaqa llapan ñawpaq qillqakunapam kunanqa partenkunallaña kachkan.

Bibliam ichaqa mana chaynachu. Qillqarqakum 3.500 wata masnin ñawpaqtaraq, chaywanpas yachachikuyninkunaqa hina kaqllam kachkan. Tukuytam ruwarqaku chinkachiyta munaspanku, ichaqa manam atirqakuchu. Chaymantapas, yachachikuyninkunaqa yachaysapa runakunapa nisqankuwanmi tupan (qaway “¿Bibliaqa wakin qillqakuna hinachu?” niq yachachikuyta).

Chayna kaptinpas, ichapas tapukunki: “¿Hinallachu bibliapa yachachikuyninkunaqa yanapawachwan?”, nispa. Chayta yachanapaq kay tiempopi runakuna imakunawan sasachakusqanpi yuyaymanasun. ¿Imakunataq astawan sasachawanchik? ¿Manachum guerrakuna, allpa pachanchik qachachasqanku, maqakuq runakuna hinaspa suwakuq autoridadkuna? Bibliapa yachachisqanta kasukuptinchikqa manam chaykunaqa kanmanchu. Chaymantam qatiqninpi qawasun.

HAWKALLA KAWSAKUYTA MASKANAPAQ

‘Mayna kusisqam hawkalla kawsakuyta maskaqkunaqa, paykunamiki “Diospa churin” nispa sutichasqa kanqaku’ (Mateo 5:9). “Atisqaykichikman hinayá kallpanchakuychik llapallan runakunawan hawkalla kanaykichikpaq” (Romanos 12:18).

LLAKIPAYAKUQ HINASPA PAMPACHAKUQ KANAPAQ

“Mayna kusisqam llakipayakuqkunaqa, paykunaqariki llakipayasqam kanqaku” (Mateo 5:7). “Chaymantapas piñanakunaykichikpaq razon kaptinpas hinallayá aguantanakuychik hinaspa tukuy sunqumanta pampachanakuychik. Imaynam Jehova * Diospas tukuy sunqunmanta pampachaykusunkichik, chaynayá qamkunapas pampachanakuychik” (Colosenses 3:13).

MANA PIMANPAS SAYAPAKUNAPAQ

Diosqa “huk runallamantam rikurichirqa tukuy nacionpi llapallan runakunata chaynapi enteron kay pachapi yachanankupaq” (Hechos 17:26). ‘Diosqa mana pimanpas sayapakuqmi, Diosqa chaskinmi lliw nacionkunapi respetaqnin hinaspa allin ruwaq runataqa’ (Hechos 10:34, 35).

ALLPA PACHANCHIKTA WAQAYCHANAPAQ

‘Tayta Diosmi runata Eden huertaman churarqa chaypi llamkaspa nanachikunanpaq’ (Genesis 2:15). Diosqa ‘kay pacha purmachiqkunatam chinkachinqa’ (Apocalipsis 11:18).

LLUMPAY MUNAPAYAYTA HINASPA HUCHAPAKUYTA CHIQNINAPAQ

“Cuidakuychik imatapas llumpay munapayaymanta, runapa vidanqariki tukuy imayuq kaptinpas manam kapuqninkunamantachu kanqa” (Lucas 12:15). “Qamkunaqa Diospa runankunam kankichik, chaynaqa amayá rimayllapas-rimaychikchu huchapakuymantaqa, tukuy rikchaq millakuypaq kaqkunamantaqa nitaq imatapas llumpay munapayaymantaqa” (Efesios 5:3).

MANA SUWAKUNAPAQ ASWANQA ANCHATA LLAMKANAPAQ

“Ñuqaykuqa munachkanikum tukuy imapi allin kawsakuyta” (Hebreos 13:18). “Pipas suwakuqqa amañayá suwakuchunchu, aswanqa anchata llamkachun” (Efesios 4:28).

LLAKIYUQKUNATA YANAPAYKUNAPAQ

‘Hukmanyasqakunatapas kallpanchaykuychik, mana kallpayuqkunatapas yanapaykuychik hinaspa llapallanwanpas pacienciakuychik’ (1 Tesalonicenses 5:14). ‘Mana tayta-mamayuqkunata hinaspa viudakunatam llakinkunapi yanapaykunaykichik’ (Santiago 1:27).

 Bibliaqa manam chaykunataqa yachanallapaqchu niwanchik aswanmi kallpanchawanchik ruwayman churananchikpaq. Sichum yaqa lliw runa bibliapa chayna nisqankunata kasukuptinchikqa aswan allinmi kay pachapi kawsakuyqa kachkanman ¿aw? Arí, bibliapa yachachikuyninkunaqa astawanmi kunan tiempoqa yanapawachwan. ¿Imaynata? Chaymantayá yachasunchik.

Jesusmi nirqa: “Runapa allin ruwasqankunam qawachin yachayniyuq kasqanta”, nispa (Mateo 11:19). Chayna nisqanqa allinmi ¿aw? Imapas niwasqanchik allin utaq mana allin kasqantaqa yachanchik ruwayman churaspallanchikmi. Ichapas chayrayku tapukunki: “¿Allinchu kawsakusaq bibliapa nisqanta kasukuspayqa? ¿Yanapawanmanchu sasachakuyniyta atipanaypaq?”, nispa. Qawasun bibliapa yanapakuyninwan sasachakuyninta Diana * imayna atipasqanmanta.

Dianaqa allin llamkayniyuq hinaspa kusisqam kawsakurqa. Ichaqa qunqayllamantam sipasña kaq wawan wañukurqa, yaqa chay tiempopitaqmi qusanpas saqirurqa, chaymantapas qullqimantam sasachakurqa. Chaymi payqa muspaypi hina tarikurqa.

Dianam bibliapa kayna nisqanta astawan entienderurqa, bibliam nin: “Runapa kawsakuyninqa qanchis chunka watallam, kallpasapankunallam  pusaq chunka watakama chayanku, chaywanpas unay kawsakuyqa sasachakuytawan waqakuytam apamun. Imaynam watakuna chaylla pasarun, chaynam vidaykupas tukurun”, nispa (Salmo 90:10).

Chay sasachakuyninkunapi tarikuspanmi Dianaqa bibliata ñawincharqa, chayna ruwasqanqa ancha allinmi karqa. Qatiqnin yachachikuykunapim qawasun achka runakuna bibliapa nisqanta kasukusqankurayku allinña kawsakusqankumanta. Arí, bibliaqa qallariyninpi rimamusqanchik suma-sumaq qillqa hinam. Manam runakunapa ruwasqan qillqakuna hinachu huk tiempollapaq servikun. ¿Imanasqataq chayna? Diospa palabran kasqanraykum (1 Tesalonicenses 2:13).

Qampas ninkichá runapa vidanqa llakikuywan sasachakuypa huntasqan kasqanta. Sasachakuypi tarikuspaykiqa, ¿pimantaq asuykunki yanapaykusunaykipaq?

Qawasunchik kawsakuyninchikpi imaynata biblia yanapawasqanchikmanta. Yanapawanchikmi:

1. Sasachakuykunapi mana tarikunapaq.

2. Sasachakuykunata imayna atipanapaq.

3. Sasachakuykunawan mana hukmanyarunapaq.

Chaykunamantam qatiqnin yachachikuykunapi qawasun.