Rosam nirqa: “Ima llakipipas tarikuptiyqa chayllapiñam umay kaq, piensaqmi kani aswan sasachakuypi tarikunaymanta”, nispa. ¿Bibliapa ima nisqantaq yanaparqa? Mateo 6:34 nisqanmi, chaypim Jesus nirqa: “Amayá llakikuychikchu qatiqnin punchawmantaqa, qatiqnin punchawpas kanqam imamantapas llakikuyqa. Sapa punchawmi kan ima sasachakuypas”, nispa. Chayta yacharusqanraykum Rosaqa manaña qipa punchawmantaqa llakikurqachu. Paymi nirqa: “Llumpaytam qipa punchawpi ima pasawananmanta llakikuchkarqani, allillaqa sasachakuyniykunatapas manam atiparqaniraqchu”, nispa.

Yasminpas llumpaytam imamantapas llakikuq. Paymi nirqa: “Sapa punchawmi waqasqallaypi kaq kani, wakin tutaqa manam puñuypas chayawaqchu. Llakillaypiñam piensaq kani”, nispa. ¿Bibliapa ima nisqantaq yanaparqa? Paymi willakurqa 1 Pedro 5:7 nisqan yanapasqanta, chaypim nin: “Tukuy llakikichiktapas Diospa makinpi saqiychik, payqariki qamkunamantam nanachikun”, nispa. Yasminmi nirqa: “Jehova Diostam mana saqiykuspay mañakurqani, qawarqanim imayna yanapawasqanta. Llasaq qipiyta saqichkaymanpas hinam karqa. Kunanqa manañam llumpaytaqa llakikuniñachu”, nispa.

Isabelam nin: “Imapas ruwayniykunatam chaymantaña ruwanaypaq saqini televisionta qawanayrayku utaq samakunayrayku, taytaymantachusmi chaynaqa kani. Chayna kasqayraykum imapas ruwayniykunata hawanpi ukunpi ruwani”, nispa. Bibliapi 2 Timoteo 2:15 nisqanmi yanaparqa, chaypim nin: “Anchata kallpanchakuy Diospa chaskisqan kanaykipaq, mana imamantapas pinqakuspa allin llamkaq kanaykipaq”, nispa. Isabelam nin: “Bibliapa chayna nisqanmi yanapawarqa imapas ruwayniyta allinta ruwanaypaq, manam munarqanichu Dios pinqawanantaqa, chaymi kallpanchakurqani”, nispa.

Carolañataqmi nirqa: “Imapas ruwayniytam chaymantaña ruwanaypaq saqiq kani. Mañawanankupaq hichpallaña kaptinmi muspaypi hina ruwaq kani, manam allillaqa puñuqchu kani, wakinpiqa waqakuqmi kani”, nispa. Proverbios 13:16 nisqanmi Carolataqa yanaparqa, chaypim nin: “Allinta tanteakuspa ruwaq runaqa yachaywanmi imatapas ruwan, mana tantearikuq runam ichaqa mana yachayniyuq kayninta qawachikun”, nispa. Paymi nin: “Bibliapa chayna nisqanmi yanapawarqa ruwayniykunata imayna ruwanaypaq tiempochawanraq tanteanaypaq, chaymi kunanqa papelpiña qillqaruni ima ruwayniykunata puntata ruwanaypaq”, nispa.

Cristinam nirqa: “Tawa uña wawayuqtam qusay saqiruwarqa”, nispa. ¿Bibliapa ima nisqantaq yanaparqa? Proverbios 17:17 nisqanmi, chaypim nin: ‘Chiqap amigoqa tukuy tiempom kuyakun, sasachakuy tiempopipas chiqap wawqi hinam’, nispa. Chaymi Cristinaqa pay hina Dios serviqkunawan aswan hukllawakurqa. ¿Imaynatam Dios serviqmasinkunaqa yanaparqa? Paymi nirqa: “Wakin iñiqmasiykunam mikuychata haywaykuwaqku, wakinñataqmi waytata. Kimsa kutikama huk law wasikunaman astakuptiykupas iñiqmasiykunam yanapawarqaku. Huk iñiqmasiytaqmi llamkaychatapas maskarapuwarqa. Iñiqmasiykunaqa manamá sapallaytaqa saqiwarqakuchu”, nispa.

Ñawpaqpi rimamusqanchik Dianapas sapallan hinam tarikurqa llakikuna qatirusqanrayku. Paymi nirqa: “Mana aylluyuq hinam tarikurqani, mana pipapas qawarisqan kasqaytam piensarqani”, nispa. Ichaqa Salmo 68:6 nisqanmi yanaparqa, chaypim nin: ‘Diosqa mana piniyuqkunamanmi aylluta qun’, nispa. Dianam nirqa: “Jehova Diosqa pay yupaychaqkunatam aylluyta hina quykuwarqa, chayna kasqantam entienderurqani. Ichaqa paykunawan huk sunqulla kanaypaqmi Jehova Diosmanraq asuykunay karqa. Chayta ruwayniy ancha allin kasqanmantam cuentata qukurqani Salmo 37:4 nisqanta ñawincharuspay, chaypim nin: ‘Tayta Diospi anchallataña kusikuy, paymi sunquykipa munasqanta qusunki’, nispa.

“Cuentatam qukururqani Jehova Diospi astawan hapipakuyniyqa allinniypaq kasqanta. Pay hinaqa manam pipas kanchu. Jehova Diosta yupaychaqkunawan astawan imatapas ruwanaypaqmi tantearurqani. Pantasqanku qawanaymantaqa allin ruwasqanku qawaytam yacharurqani, hinaspapas pampachakuq kayta”, nispa.

Jehova Diosta serviqkunapas pantaqmi kanku. Wakin runakuna hinataqmi imawanpas sasachakunku. Ichaqa kallpanchakunkum runamasinkuta llakinkupi yanapanankupaq. Chayna runakunapa amistadnin kayqa mayna allinmi ¿aw? Ichaqa, ¿yaqachum bibliaqa sunqunchikta tiyaykachinman ayllunchik wañukuptin utaq mana hampiy atina unquywan ñakariptinchik?